[定の影評] Lego Movie is AWESOME (劇透位回覆才能觀看)

阿定 · 發表於 2014-2-7 11:21

本帖最後由阿定於 2014-2-7 12:35 編輯

基本上成個小學時期我都係玩Lego為主，每到放長假，就會鋪到成地都係Lego，到宜家人大左，都會耐不耐買盒Lego番去玩下，所以當知道會拍成電影時，已經非常期待，直到最近呢兩三個月，各式各樣的Trailer，Behind the Bricks的短片出現，熱情就更加高漲，戲都未上就買左佢地的minifigures(人仔)番去了(上圖為其中少部份主要角色)，所以昨晚第一日上畫就迫不及待去睇了！

自己買左3D英語版，有不少中文字幕其實無跟英語來翻譯，所以有d位，唔係成場人都識笑，睇Trailer會令你好期待，但實際電影可能會同部份人的期待有少少出入，套戲唔係大家想像中得談笑咁簡單，套戲其實有野想講 (其中包括洗你腦睇完去買Lego)，有d訊息帶比你，有嚴肅的一面，講笑料，我個人覺得唔會比"壞蛋掌門人2"少，不過入面好多場境，其實你要有玩開Lego才會識笑(不過我唔認為入得場的人會有可能完全未玩過Lego)，同樣亦有不少對白，你要有睇開電影才識笑(魔介都無睇，BatMan都無睇，抵你唔識笑啦)，當然就咁當卡通片睇，仍是一流的，華麗的場境，搞笑的Stop Motion Lego加後期加工，一流的配音(英語版配音星光熠熠)，淨係大長老(Morgan Freeman)的配音都笑得死你！

電影主線好普通，不過其實笑位就係呢個普通設定上，傳說中的救世者，好打得的女主角，一個智慧老人，再加一個好多野講的配角(第二主角)，再送多一大推經典角色穿穿插插，成個故事非常之 Lord of the Rings，，戲情推進發展唔難估，但尾聲結局位老實講，我完全估佢唔到，但真係好合情合理，好值得大家深思，電影唔係太長，100分鐘，千奇唔好去廁所，戲情去到好快的，快到呢頭講緊點去打大佬，果頭已經打緊大佬！

成套戲無咩特別音效，3D效果一般，但絕對值得一睇，大人細路都一定鐘意，如果對Lego有熱情，我唔推薦你都會睇，如果對Lego無熱情，睇完包你想買兩盒返去玩，呢套戲放唔到賀歲檔真係非常非常可惜！

強烈建議睇晒片尾才走人

以下有少量劇透，不建議未睇戲的人閱讀

成套戲其實就係講緊 Lego迷終極玩法，MOC (My Own Creation)，大家細細個一定除左會跟說明書玩外，亦會亂咁自由創作，但人大左，就會開始越來越少 MOC，買左番來，整好後就會放Display，連人仔的企位都會指定晒，無晒MOC精神，極端d的，甚至會用戲中的終極武器加工，唔比其它人搞亂檔，失去左Lego的原意

戲入面的手法，睇落雖然好低B，好天馬行空，但亦正正係我地平時玩Lego的方法，唔同series的Lego都放埋一齊玩，你以為Batman好Cool咩，但我就當佢係好朋友，大家有講有笑，睇魔介又好，睇哈利波特都好，主角都係The Special One，都係由一個智慧老人預言出來，而Lego Movie入面所謂的Special One，其實就係玩Lego的我地，自己老點出來的，而咩都管的機器，其實亦係講緊玩Lego的我地，成套戲，神又係我地，鬼又係我地，呢d就係Lego的魔力！

個人好期待出Blu-Ray，好想睇製作花絮，最好有埋加長版，隱藏片段等等，唔知睇過的大家又點睇呢！