KRELL FOUNDATION報告

蒲東 · 發表於 2014-2-4 06:06

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

首先向各位brothers講聲sorry，由於小弟呢幾個月事忙，所以到拖咗幾個月先還呢筆債呢，真係唔好意思～～～～
首次接觸Krell係喺一個十分有米嘅發燒友屋企，佢用Audio+video standard（AVS）前級，後級就用咗Mark仔，用嚟推動前置三隻B﹠W大肥婆，後置同隻炮都係用全套B﹠W。
當時覺得用AVS聽兩聲道水準非常高，好有貴氣，一貫krell聲底，絕對係hi-end級數，但睇戲就無我要求嗰種狠勁，最大原因歸咎於AVS係肥佬Dan搞嘅第一部AV processor，而佢出咗名唔聽人講，好自然佢就以佢搞兩聲道嘅經驗同技術去製作呢部AVS，於是出咗嚟嘅結果，我覺得佢似一部「兩聲道前級附帶AV Processor功能」多於係一部「多聲道前級附帶兩聲道解碼功能」。
AVS誕生6年之後，Krell再次推出Home Theater Standard7.1同埋Showcase兩部唔同級數嘅影音前級，呢兩部嘢聲底比起老祖宗AVS已經似樣好多，事實上而家重有師兄用緊呢兩部老古董，從此可以推想到佢嘅市場價值有幾利害。不過若比較同期同級嘅Proceed AVP2前級嚟講，筆者更鍾意AVP，佢聲底更狠更勁，更啱我口味……（Krell粉絲唔好打頭！）
好嘞，到咗2009年，Krell一前一後又推出咗S﹣1200同旗鑑嘅E﹣707，兩部我都試過，後者更係攞埋返屋企試（707我亦會出包膠，但各位師兄等得嚟可能Krell已經出咗新型號，正所謂無期望就無失望，所以各位師兄都係唔好等啦……）
不過可以先同大家講一聲，就係小弟今次終於覺得呢「兩兄弟」可以做到多聲道及兩聲道質素有hi-end水準嘅地步，不過S﹣1200都要成十皮嘢，我呢啲死窮鬼試完咪又係得個恨字囉。
終於，Krell喺CES2013公佈咗一部史上價錢最親民嘅多聲道前級Krell Foundation，（定價都係要5萬6，哈哈），我當然第一時間問代理借返屋企玩……

機芯
雖然Foundation外型比起兩個阿哥單薄好多，但係只要你捧上手，就知道佢貫切Krell嘅宗旨﹣﹣﹣用料同重量必定斤兩十足。打開頂蓋，你會見到前面板左邊有一隻大環牛，用喺前級嚟講絕對份量十足，而次級供電就再分為幾個獨立模組，大家都知，咁樣可以減少相互干擾，提高訊噪比。線路板採用多層式設計，穏壓部分重直接接上機殼，咁即係話成個機殼都係散熱器。
廠方話，Foundation嘅技術同用料係 S﹣1200嘅簡化版，觀乎佢線路走位同晶片用料，筆者覺得佢哋冇吹水﹕
DSP環迴立體聲處理部分，Foundation用咗兩塊Cirrus Logic CS497024-CVZ 32bit雙核DSP芯片處理音頻數據，雖然未算頂班，但都提供到高達1.8GOPS嘅高速運算，再加上兩粒8416﹣CS2作輔助，要處理多聲道音響解碼，可謂輕而易舉。
處理好DSP後，訊號會交由最高支援32bit嘅ESS9018S DAC芯片處理D/A轉換。好多市面上嘅旗艦多聲道處理器都係用呢粒芯片，佢巴閉之處係內置咗8個頻道嘅D/A模塊，大大咁簡化咗D/A轉換線路的設計，喂，呢樣好重要，唔好講干擾同衰減問題，成本都低啲先吖。呢粒芯片重可以解埋DSD信號，但Foundation依然採用T.I DSD1793芯片作為獨立DSD解碼，可以見到Krell嘅認真程度。至於視頻方面，佢用2粒Silcon Image Sil9334CTU、2粒 Sil9489，同Analog Devices ADV7842嚟處理10入2出嘅HDMI數據，順帶一提，Foundation兩個輸出都係1.4，具備ARC音頻迴路，即係輸出視訊俾投影機／電視機同時，亦可接收電視／投影回傳嘅音訊。

玩機心得﹕
先小人後君子，先講Foundation一啲小bugs﹕佢冇內置Pink Noise，調校聲壓時要用碟放入去校，如果你同時有藍光機、PS3，最好就每部都放隻碟入去校。其次佢內置嘅楊聲器距離調校，並非使用常見嘅「米／呎」，而係用ms，即係微秒也，而前置、後置、後中置只可分做三組調校，即係話唔可以逐隻咁獨立調校，好似筆者嘅影音廳四四正正、一對後置同後中置距離差不多就話易調校啫，如果你啲後置同後中置擺位距離不一就真係要花一番功夫。
另外筆者最初接上HDMI後出現咗有聲冇畫嘅情況，要換咗兩條唔同品牌嘅HDMI先冇事。但同代理及資深網友YUPPI兄傾過呢佢問題，佢哋話從來都冇試過呢個情況，可能都係筆者樣衰之過……點都好，接通晒之後，就再無出現在聲無畫嘅情況，而以上種種嘅小bugs，玩慣歐美多聲道前級嘅兄弟應該「駕輕就熟」，完全接受晒歐美機嘅「臭皮氣」，尤其只追求靚聲嘅發燒友，呢啲小缺點絕對唔係問題嚟。
Foundation並無GUI／On Screen Display嘅功能，所以只可以睇住機上面顯示屏調校，又或者以佢嘅Ethernet連接電腦，喺電腦上面進行設定，但就筆者經驗，我建議阿鬼你都係講返中文…..Sorry，係用番部機嘅顯示展校算罷啦。
同代理傾過，佢話用返 Foundation嘅獨家研發嘅Auto Setup（ARES，Automatic Room Equalization）已經可以好準確咁度到距離、聲壓、相位、crossover咁，不過我個人屎忽鬼，用咗佢支咪度完之後再用人手量度佢嘅聲壓同距離，發覺爭少少，再試幾次之後都係咁，於是打畀代理，終於發現問題﹕原來度聲嗰陣，支咪最好喺皇帝位人耳水平同豎直支咪，另外最好要喺有咁靜得咁靜嘅環境之下作Auto Cal（筆者玩嗰陣開咗兩部冷氣，死未？）得出嚟嘅數字先會準確。我依照代理嘅說話，出嚟嘅數字的確準咗好多。之後我再用 ARES做咗次Auto EQ設定先開始測試。順帶一提，佢嘅Auto EQ可以獨立針對低頻作處理。

測試器材﹕
後級﹕Cinenova Grande 7
藍光機﹕Oppo93
前置﹕Procella P8 x3
後置、後中置﹕Procella P6 x4
重低音箱﹕Procella P18 + M&K SOUND MX350SFXL
投影機﹕SONY 55ES
投影幕﹕Visione THX認證120”梗幕
地盒﹕Entreq Tellus

由於不知不覺已寫到天光，所以測試部分要待續，各位師兄真係唔好意思，呢兩日搞埋佢……