究竟準備好未? MS再次調整XBOX ONE硬件性能

@肥狗仔@

曾經講過機能唔係XBOX ONE重點嘅MS繼上個月宣佈將該主機的GPU速度由800mhz提升到853mhz之後，近日再度調整XB1性能。根據Geekwire的報導，XB1市場策劃主任Yusuf Mehdi表示新主機的CPU將會有所提升，由已公佈的1.6 GHZ提高至1.75 GHZ。

自兩部次世代主機公佈以來，不論係遊戲製作人，定硬件架構師都幾乎一面倒指PS4在機能及開發環境上存在明顯優勢。而早前PS4及XB1的APU製造商AMD，其銷售主任Marc Diana更叻唔切咁大爆PS4性能比XB1黎得強大。但與其話MS近日的舉動係補救措施，倒不如話XB1的硬件本身就並未完善。事實上從XB1的"XBOX U-Turn"事件，到近月宣佈縮減同步發售地區數量，都顯示MS未做好萬全準備。

無論如何，Mehdi已確認XB1已經進入生產階段，如今萬事俱備，只欠東風，一旦MS公佈發售日，全球玩家就可以見證哩部首發冇體感遊戲，兼硬食一隻Kinect的次世代主機誕生，儘管只有廿一個地區嘅玩家可以見證得到。

另外最近XB1官網更新了其無線手制的新一批資料，當中顯示XB1可以同時連接8個手制，而PS4就最多可以連接4個。至於他日有冇遊戲支援，咁又係另一回事了(FIFA有機會的)。