Martin Logan Motion 40 喇叭小評

leo25 · 發表於 2013-7-15 00:52

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

本帖最後由 leo25 於 2013-7-21 10:27 編輯

...... 掌聲係由側邊及後方傳入耳朵 ...

今次嘅主角係Martin Logan Motion 40 座地喇叭. 其實呢對喇叭係4月已經入手, 呢個可算係個遲來嘅分享. 雖然佢唔算係咩熱門野, 但之前都已經有師兄出過開箱文, 相信各位師兄都會有啲印象.

其實對上一對喇叭ELAC BS244BE 都只係上年9月買入, 半年左右嘅時間就換新喇叭, 我都覺得有點兒過份. 奈何雖然都算滿意ELAC BS244BE嘅表現, 而且佢嘅底頻可算係書架喇叭中數一數二, 不過對比座地喇叭出來的那種”量”, 始終都係兩回事. 喺偶然機會下留意到呢對Motion 40跟ELAC一樣都係用帶式氣動高音 (當然兩者唔係用同一款帶式高音). 而且價錢同我放左對BS244BE同原裝二手腳架嘅二手價差唔多. 所以膽粗粗同家中老細提出申請. 亦好彩得到老細體諒, 批准我咁短時間再換新歡. 仲同我一齊上中環代理試添.

還記得收貨插上Motion 40後, 開聲一刻佢即時”嘩”左一聲, 跟住就一句: 一早就應該買呢對啦, 係都要嘥錢先安樂…...

簡單介紹一下, Martin Logan Motion系列係有齊前中後置喇叭可以組成家庭影院. 當中Motion 40係整個系列最高級別既前置喇叭 (不過只係Martin Logan入門系列). 定價只係$16800 (當然實價再平一點), 算係相當克己. 相信主要原因係Made in China嘅關係. 而92dB既靈敏度相信亦唔難匹配合適嘅擴音機.

不經不覺對Motion 40都已經開聲3個月了, 雖然平時聽歌時間唔多, 不過照計都應該煲左超過100小時. 專業同詳細嘅報告我就唔夠班寫喇, 而且近年開始冇乜耐性專登反覆聽某幾首歌黎作A/B比較. 都係覺得隨心聽歌更為重要. 不過, 都想同大家簡單分享少少感覺.

原本都擔心2個6.5吋底音單元嘅Motion 40喺我個10尺半x.11尺嘅細廳會有Bloom 出現, 好彩最後效果比我想像中好, Bloom嘅情況基本上唔覺, 只係偶爾有某些歌某一兩下會比較嚴重, 希望日後會搵到改善方法. 不過而家聽Jazz嗰種氣氛, 真係同我以前用過嘅幾對喇叭完全唔同哂, 可以令我更加投入.

呢對喇叭嘅特點, 亦可以話係帶式高音嘅特點, 就係離箱感好, 唔難擺出一個闊度同深度唔錯既音場. 好有印象聽<Belafonte at Carnegie Hall> LPCD時, 明顯聽到當中有啲掌聲係由側邊及後方傳入耳朵, 包圍感蠻好. 高音表現亦係預期嘅通透, 冇搶耳情況出現.. 但稍稍嫌唔夠圓滑.

Motion 40嘅5.5吋中音令到中頻冇斷層現象出現. 而聲音取向較中性, 清通, 無添加味精. 呢點是否好處就好睇個人口味. 不過聽起人聲時, 有時都會懷念以前曾經擁有嘅國產喇叭”唯美2號”嗰種半球高音嘅質感同韻味. 不過冇辦法, 始終針係冇兩頭利嘅.

可能有啲師兄想知口型大細係點? 會唔會好似成個人企左出嚟唱咁? Sorry, 小弟都唔知口型標準係點. 我只覺得口型大細好睇首歌錄音係點, 而每首歌出嚟嘅效果都會唔同. 至於”好似成個人企左出嚟唱咁”? ...... 用HiFi重播 (尤其是在家居環境之中) 真係咁易做得到嗎? 小弟就唔太認同喇.

Motion 40有一大敗筆, 就係原裝釘腳非常唔掂, 又幼, 做工又差, 睇落跟淘寶幾蚊雞嘅貨仔差不多, 比”唯美2號”的更差.

小弟嘅器材仲有好多需要改進嘅空間. 以上純粹個人感覺分享, 並不反映Motion 40嘅真實表現. 不過各位師兄, 尤其是剛接觸HiFi嘅新手, 千奇唔好因為我呢個不專業嘅報告而盲目買入呢對喇叭, 當然亦唔好即時判佢死刑. 市場上亦一定會有比Motion 40好嘅同價位喇叭. 都係嗰句, 每個人喜好唔同, 耳聽為實.

金屬網面以磁石貼上

Bi-wire 設計

最後嚟張全家幅

多謝各位收看