傳承Beyond精神 (轉載)

245141525

轉載自BEYOND MUSIC

傳承Beyond精神
Beyond是樂隊班霸，身為靈魂人物的家駒，曾說香港冇樂壇！他的搖滾精神對現今樂隊有很大影響。

RubberBand主音6號：
我今年32歲，細個睇劇集《淘氣雙子星》認識幾位哥哥；家駒離開時，自己唔算死硬fans，直至組成樂隊，重新聽佢哋嘅歌，覺得好有意思，作為樂隊音樂有感染力係bonus，RB仲係奮鬥緊，希望唔會令音樂變質。


Dear Jane主音Tim：
家駒係非常特別嘅人，個個玩樂隊都係講音樂，但只有佢帶到樂隊精神，搖滾唔止有憤怒仲有大愛，佢做到模範畀其他樂隊，話畀我哋知夾band除咗玩音樂，仲要有一個信念，我哋嘅信念係音樂代表語言，希望帶畀人安慰。


C AllStar成員On仔：
細個最深刻印象係家駒唱《情人》，大學二年級參加歌唱比賽，自己唱呢首歌攞第二名，冠軍係隊友阿King，之後我哋組成C AllStar做騷都翻唱呢首歌，睇番家駒嘅表演、訪問，我覺得佢嘅世界觀好強，對我哋思想影響好大。


潘先儀：好似有道光射出嚟
85年亞洲小姐亞軍潘先儀，是當年發掘Beyond的經理人公司老闆之一，當年她跟Leslie Chan合作開公司，先後簽了小島樂隊和Beyond。潘先儀好記得在高山劇場首次看Beyond表演：「Leslie話呢隊band好好，叫我去睇吓簽唔簽佢哋，去到見家駒唱緊最後幾句rock& roll，我覺得佢好有魅力，好似有道光射出嚟，我睇到起晒雞皮，覺得佢哋成就會大過小島。」

後來潘先儀跟Leslie決定簽Beyond，約他們傾了數次，感覺好奇怪：「最初接觸佢哋後，我問自己係咪要再諗吓，佢哋台上台下兩回事，台下講嘢語無倫次，成日儍笑，見到有人跌低都講一餐騎騎笑，其實家駒同我同年，我見到佢就諗自己亞視拍嘢拍到死，你仲好似仔咁，點樣可以捧佢哋呢？傾約時佢哋好多主見，不停問好多問題，就算到簽約嗰日，佢哋仲度猶豫。」

家駒多意外
四子之中，潘先儀覺得家駒最有主見：「可能因為佢最大個，家強係細佬跟住阿哥，阿榮唔係好出聲，家駒有會同Paul商量，所以我哋好多都係同家駒傾先，由家駒說服佢哋，咁我哋先冇咁辛苦，佢哋四個一齊會變周星馳嘻嘻哈哈，一個問題可能傾兩個鐘。」

Beyond仍未出碟時，家駒曾不慎撞傷鼻樑，潘先儀說：「日佢落的士撞埋搭棚支竹，因為落雨佢衝埋去，冇睇清楚就撞到鼻樑，時仲未出唱片，嚇到我死，之後入錄音室就割扁桃腺唱唔到歌，但我真係好彩，佢割完扁桃腺有豆沙喉，成為佢自己風格，係上天賜畀佢。」

當年潘先儀為Beyond設計《阿拉伯跳舞女郎》造型，毀譽參半，她坦言：「好記得試衫時，家駒係主角一定揀先，佢揀咗銀色，佢哋覺得好得意，最頂唔順係頭飾，唔係好郁到，家駒只係唔鍾意短褲孭鐵鏈，覺得唔啱佢哋，面對唔到fans，我仲迫佢哋學跳舞，成日話佢跳舞好似踩死蟻，冇考慮佢情緒。」

■潘先儀初遇家駒，已被他的舞台光芒所懾住。