葉世榮：民主領袖帶領Beyond (轉載)

245141525

轉載自BEYOND MUSIC

位於太子的二樓後座，乃當年Beyond夾band的錄音室，它屬於葉世榮家人的物業，這裏充滿Beyond喜怒哀樂的回憶！

家駒走了20年，今日世榮再踏足二樓後座，他感慨說：「諗番當時喺度夾band，家駒企家擺bass位置，佢隔籬永遠有垃圾桶，因為佢食煙有好多痰，經常唱到咁上下要吐痰。」世榮好記得初見家駒的情形，他說：「我哋琴行排練室認識，第一日見佢印象好深刻，戴紅框眼鏡，有啲暗瘡，塊面油油哋，講嘢好活潑，特別講音樂未停過，佢好迷彈結他，大家好好傾成為朋友。」

其後世榮加入家駒那隊band，他說：「佢隊band名我都唔記得咗，當時發覺家駒好似畀主音蝦，佢彈結他陶醉自己世界，主音成日鬧家駒：『你部機細聲啲，我聽唔到自己唱乜呀！』每次家駒都唔出聲，佢知自己喺band嘅身份，君臣分得好清楚。」

傳遞不死信念
後來樂隊解散，世榮、家駒跟李榮潮和鄧煒謙組成第一代Beyond，世榮說：「嗰時家駒仲喺製衣廠做布料買手，我喺保險公司做商業保險，叫家駒嚟埋我公司，因為佢喺嗰個行業識得廠多，可以賺多啲錢，加上每日返公司開完會，可以返屋企練結他，哈哈哈，可能份工太自由，佢好多時間都係喺屋企彈結他。」

之後家強和Paul加入，Beyond在家駒的帶領下成為樂隊班霸，在世榮眼中，紅了的家駒從沒改變，他說：「啲人以為家駒好火爆，睇佢對乜人乜事，家駒同家強經常嗌交，有時阿哥話細佬唔啱，家強一定反駁：『乜呀！乜嘢唔啱。』兩兄弟始終冇隔夜仇，你知家駒好長氣啦，記得有次家強話家駒欠佢100蚊，家駒話：『還咗畀你啦。』佢哋為呢個問題嗌咗成晚，當然家駒夾雜好多粗口，我喺側邊唔知好嬲定好笑，望一望錶話：『大哥，四個鐘頭夠皮啦，出去食飯啦。』」

身為band leader的家駒十分民主，世榮說：「佢比較成熟，好有智慧同頭腦，Beyond好多決策其實嚟自家駒思維，佢係好好領袖，我好佩服佢。」家駒的離開對三子打擊很大，世榮說：「我哋曾經諗過放棄Beyond，夾band時望番佢個位，人唔喺度好難受！」世榮特別寫歌《薪火相傳》悼念家駒，他說：「我覺得紀念佢之餘，應該帶訊息畀歌迷，將Beyond搖滾不死信念傳給下一代。」

■二樓後座永遠盛載着世榮對家駒的懷念。


■世榮永遠記得第一次見面時戴着紅框眼鏡的家駒。