黃貫中：以你為偶像同目標 (轉載)

245141525

轉載自BEYOND MUSIC

「你的聲音原是那麼近，就似安慰劑撫慰着舊情人。昔日舞曲，無聲告別，留下了無盡空虛，不再猶豫。」黃貫中（Paul）於05年寫了這首歌曲《故事》，悼念逝去的好兄弟——黃家駒！

別了家駒20年，Paul仍不忘兄弟教誨：「佢對我最大影響係實力，講乜都冇用，實力最緊要，另外仲有努力，家駒可以一晚寫幾十首歌，我最多只係寫到6、7首，佢係超人，一晚可以諗到好多嘢，我好佩服佢，以佢為偶像同目標，希望可以寫更多好歌，對社會更敏感。」

人去留聲
《故事》由34首Beyond的歌名串連成歌詞，05年完成錄音，前年才收錄在《A小調協奏曲》專輯內，惟從來沒有公開演繹，他說：「呢首歌已經講晒我對家駒嘅懷念，歌詞用咗好多首Beyond歌名，我作咗30分鐘就完成，包辦曲詞，結他都係自己彈埋，寫呢首歌時特別有感觸，歌詞嘭嘭聲嚟，只係想講自己心事。」

Paul將這首歌送給家駒，他形容歌曲充滿人性感覺：「我寫完呢首歌，三日冇講嘢，首歌充滿Beyond情懷同精神，好似對住家駒講嘢，我唔想宣傳呢首歌，好肉酸，呢啲係我心事，唔排除將來有機會公開唱，但需要時間做心理準備，以後都唔會再寫呢類歌。」
別了家駒20年，Paul希望對方能聽到這首歌，他說：「希望家駒留意到我音樂有冇進步，我想佢睇到我進步，希望唔會令家駒失望，如果我揸流攤唱唔到幾十年，我係一個好自我嘅人，只係靠音樂支撐，唔係偶像派，人始終會死，但音樂會留低。」

■Paul憑歌寄意，將《故事》送給家駒。