如果想睇到更多76師兄嘅分享，快啲登入成為會員啦！
您需要 登入 收看或下載更多內容。還未成為會員？成為會員
x
本帖最後由 roychong 於 2015-12-3 17:16 編輯
我係一個七十後既香港仔，同好多人一樣公屋長大，我接觸音響係由初中時代聽倫伯嘅歌開始，第一盒流行曲卡式帶就係愛情陷阱，〜〜這陷阱〜這陷阱〜嘩正呀，幾好炸呀！用乜機炸? 哈〜咪呀媽部「山水」單卡式收音錄音機囉，連雙喇叭果隻喎〜中一時有返學無讀書，放學同啲同學去鴨寮街浦，有檔土炮喇叭好勁㗎！D喇叭，大小，兩單元，三單元乜都有，重成日炸張國榮隻暴風一族tim，勁! 又去浦穌記、聯與，邊會有錢買吖，但齋睇都好鬼開心！到中四好不容易獲得家人買咗部 SONY 微型組合比我，有雙卡式自動反帶㗎!重可以駁黑膠同CD〜當時要四千幾蚊嫁! 我古都用咗我老豆大部份人工，真係無限感激！ 之後學人聽下 KennyG, Jazz, 古典 噤，又間中買本「音響技術」睇下，學下乜叫線材，擺位，空氣感呀....HiFi 癮就係咁培養出嚟啦，從始就夢想如果自己有經濟能力，有屋一定要有地方放對喇叭有腳架，要四四正正嘅！聽下音樂，玩下音響，可以話係我由細到大嘅興趣，keep住有D燒，亦交咗唔少學費，時至今日，有自己地方，有的不是什麼貴價影音，但天天玩得不亦樂乎!
阿叔講故完畢 ，講返我啲玩具，不是什麼精品，獻醜兼失禮！我每天有時間都會聽下歌，尤其用咗CAS更玩得開心，方便至極。
我影音有分家的，兩聲道方面用了馬仔的 KI Pearl Lite 合併AMP配 KEF LS 50, 兩者合計不到兩萬，表現都有板有眼㗎！CAS音源就用Mac mini + Audirana 去 ARCAM rDAC。
其實我都幾信「What HiFi？」班英國佬，欣賞佢地唔會一尾叫人買貴野，鬼唔知越貴越好咩!（一般來講） ，我lee 幾樣野都係比佢地導嘅。
陶回來的隔離牛供電比 rDAC 嘅，當然比原廠隻"雞"牛好好多啦.
CD 盤就係CEC3300.
影方面，我要求唔高，事關我少睇D好爆嘅戲，睇音樂碟多，怕自己同隔離屋個心臟頂唔順! 而且亦唔想放太重量級既環繞聲喇叭, 想在外觀，質素及成本上找個平衡點，所以現時用左MS 細中置，Mirage MX 做 Surround 同MM8 subwoofer 就算了，AV AMP 就用馬仔1602 再preout 去Pearl Lite 推 LS50 做front LR，TV 就係47" Panasonic LED.
Source 就用Dune Smart H1同PS3，無乜講究，方便至上。
重有乜想要?  如果中咗七千萬六合彩，我會買多個單位做發燒房！攞三幾佰萬嚟買器材噤囉! 請祝我投注好運! 如果返回現實，下一步想買 Foundation DII 喇叭腳同買個 HiFi rack, 不過都唔平，努力中。
| 
[複製鏈接]
發表於 2013-6-21 23:18
多謝分享呀
