微軟短期內唔會改變現行XBOXONE 二手/連線政策

@肥狗仔@

次世代主機XBOX ONE(XB1)對微軟黎講可以話係一次沉重的打擊。因為每當提起哩部主機嘅時候，玩家會問的並非有咩game出，部機有幾勁，而係源源不絕的投訴及抱怨。

此時此刻，相信連Microsoft Studios執行主管Phil Spencer都十分不願意上youtube睇返自己係E3展前發佈會嘅表現。唔係因為自己係公佈主機售價果陣食左幾多粒螺絲，而係怕見到片段下面嘅一大堆"精彩"評論。的確，儘管次世代主機的熱戰要到年尾先正式展開，但基於幾項致命的XB1政策，令到唔少玩家已經肯定MS會戰敗。當中包括禁止二手遊戲自由買賣，主機最少24小時連線報到一次，還有499美金的高昂售價。

對於一眾玩家嘅批評，早一兩個月之前MS多次解釋玩家只係唔清楚政策的細節。而到左今日，當玩家真係清楚明白到自己中哂伏嘅時候，MS市場策略主任Yusuf Mehdi就向Ars Technica表示有關政策係基於要係玩家﹑發行商及零售商之間取得平衡。Mehdi表示MS一方面希望對玩家實行全面支援，一方面希望發行商能夠在自己的遊戲作品獲得應有的回報，另一方面又想零售商可以售賣佢地嘅產品獲利及維持營運開支，所以XB1的現行政策正是win win win三贏的最佳做法。雖然Mehdi並冇解釋到玩家邊方面贏左，但佢進一步指出相關措施實際上亦係MS將家用遊戲機"數字化"的工具。佢表示，一旦所有野都數字化，發行商就會有更多唔同嘅商業模式，而作為玩家，佢地可能會問:「喂，我哩家唔可以賣二手，咁比個理由我去買你隻game啦!」而MS相信市場到時會有一個適當的商業模式去滿足玩家的要求。

顯然，Yusuf Mehdi的言論並冇帶比玩家任何安慰，當被CVG問起MS會否改變現行的XB1政策時，Phil Spencer表示MS對於主機系統的改良係持開放態度，就好似X360的數次系統界面更新一樣。Spencer指MS會因為玩家與開發者的訴求及市場環境改變而彈性調整自身策略，所以唔排除會改變現行政策。然而，佢亦都表示XB1政策要維持一段時間先可以反映公司的對產品的立埸及理念。換言之二手遊戲限制及強制連線短時間內不會被修改。

E3 2013結束後，下一個遊戲界盛事就係GC 2013，到時玩家可以睇下MS會否回心轉意...

jayzhk

講左即係無講！

lawzelda

算了，都係先買ps4，玩家幾乎一面倒傾向sony

RiceR9

由佢啦....佢可能想同ps4平衡番個歐美市場呢

XPR

XBOX360 死都唔用 Blu-ray 衰過一次仲唔夠,
XBOXone 又要硬頸多一次?!

@肥狗仔@

XPR 發表於 2013-6-14 14:01
XBOX360 死都唔用 Blu-ray 衰過一次仲唔夠,
XBOXone 又要硬頸多一次?!

X360唔洗用到BD吧~

gkfp

24小時連線一次, 係咪我要每24小時開機一次, 唔開又點呀?

trango

gkfp 發表於 2013-6-14 19:03
24小時連線一次, 係咪我要每24小時開機一次, 唔開又點呀?

唔洗諗得咁複雜，24小時後只要連翻線就可繼續玩

@肥狗仔@

gkfp 發表於 2013-6-14 19:03
24小時連線一次, 係咪我要每24小時開機一次, 唔開又點呀?

佢哩個只係確保主機24小時處於最新的版本狀態。如果有連線的，係咪24小時開機一次應該唔會有太有影響，而且可以用智能電話報到。但完全冇連線的話，暫時只可以話部機唔太適合你(by MS)~

gkfp

我好多時一兩個月唔開機玩, 睇嚟都唔使諗xbox.