《變形金剛》（Transformers） JJ report (含少許內容)

lkljason

《變形金剛》因為唔係我個年代，我嗰時係睇《六神合體》 (好out呀)，所以對《變形金剛》個故仔認識唔多，極其量知道柯柏文係貨櫃車 (成日叫錯佢做刀柏文~，仲知道係有分兩派 (只知係一忠一奸，但其實連名都唔知)，所以開頭知佢開拍呢套嘢都擔心會好兒童向 (即係驚佢會好低B)，就算出左第一條預告片時都覺得佢唔慌好睇，但到第二條預告片出嚟嘅時候有少少另眼相看，感覺精彩好多，但另一隱憂就係佢點樣變身呢？會唔會好鬼假呢？所以睇前都諗左好鬼多嘢。

到首日上畫後，各界評論呢套野都係讚不絕口，對我嚟講就更加期待，所以趁啱啱過左嘅星期日睇睇呢套戲。故事其實好簡單，就咁形容我諗幾句已經講晒，兩派機械人喺佢自己星球內訌，跟住壞果邊既機械人「狂派」唔知乜野原因流落地球，跟住「狂派」就為左爭奪果個方形既能量體，點知個能量體原來同男主角既曾曾曾祖父有關，所以狂派就要對男主角不利，當然忠果邊嘅機械人「博派」唔會袖手旁觀啦，結局係點就自己睇勒。

睇完後覺得144分鐘絕無冷場，變身過程我之前嘅憂慮係多餘，好耐未睇過齣咁多電腦CG特技既戲 (比《蜘蛛俠3》還多)，動作打鬥過程好快，令到我有小小頭暈嘅感覺，除左柯柏文同大皇蜂比較易認d外，其餘都唔知邊個打邊個，而尾段嗰part打鬥我直頭覺得有點兒過長添，反而公路追逐嗰度我覺得可以加長些少。

男女主角呢套戲黎講都係配角，我覺得基本上邊個做都冇問題，而女主角之前有朋友睇完覺得個樣麻麻地，我就反而覺得唔錯勒。一套有特技、笑位幾多，再加上動作多得嚟又精彩，一次過滿足晒三個要求，呢套戲絕對值回票價，都係果句~~~呢期唔睇呢套戲，出嚟邊有話題呀！

[ 本帖最後由 lkljason 於 2007-8-3 16:46 編輯 ]

lkljason

其實話時話呢套野犯駁野都唔小，不過anyway.....套野.好睇就得啦！Smilies010

nlcc_

原帖由 lkljason 於 2007-7-30 18:19 發表
其實話時話呢套野犯駁野都唔小，不過anyway.....套野.好睇就得啦！Smilies010

ya
同意

LAWSON

THX, 唔算含啦. 算係大岡啦

lkljason

含左無蝕底嘛Smilies010

jayjay

Great report