[開箱]又一敗家之作 --- AD2000X

gahqm

無耐之前先開過 MDR-Z1000，咁快又黎開箱，我係咪天生係敗家仔 。基於男人嘅欲望?之下加上曾經擁有過 A1000X，一知道同事會去日本旅行，即時叫佢幫我買隻 AD2000X 返黎玩玩(因為幾鍾意 A1000X 嘅聲，無奈因某原因賣左)，今朝放工佢接我更時順便入手 (入手價 HK$39XX)，因為我對果啲專有名詞唔係太熟，所以我唔講果啲感覺，只講幾位女聲優/歌手聽出黎嘅感覺，呢方面請各位多多包涵


先睇睇外觀



拆出黎後，A1000X 用紅色類似絨毛好似好啲喎 ，AD2000X 用白色膠托住好似玩具咁(雖然佢真係我嘅玩具 )


盒入面有嘅野，只有說明書兩張，保用証(香港冇用)，耳筒主體同 3.5mm 轉 6.3mm 插頭，配件同 A1000X 一樣咁單簿 ，其實其他耳筒都差唔多，不過因為鐵三角耳筒主體同耳筒線係 "連體嬰" 闗係，所以感覺比較少。


AD????X 系列我最鍾意就係佢耳殼係蜂巢式設計 (比較 pro 嘅感覺)。


最後影一影佢嘅 "金潻" 招牌


首先配戴感，果然係鐵三角出品，對我黎講一樣帶得唔舒服(我就因為咁而賣左 A1000X)，不過佢就好過 A1000X，果兩隻翼比較實淨，令到戴起上黎比較穩，A1000X 果兩隻翼因為比較鬆，攪到戴得好似就跌就跌咁。另外 AD2000X 耳墊係布質? (呢種又唔係絨毛，唔知叫乜 ) 比起皮軟得多，就算頂住都冇咁辛苦(我戴親呢啲大型耳筒，耳珠後少少位置唔知點解好似成日有野頂住咁)，呢類大型耳筒都係 X1 戴得舒服。

用黎試聽嘅歌，前端係電腦接華碩老虎盒普通版冇 mod
1) York of Love --- 石橋優子 喺 "星詠～ホシヨミ～ Ar tonelico Hymmnos concert Side 蒼" 入面嘅歌，我專用黎試高音，因為石橋小姐把聲係超高，一聽之下，石橋小姐一將聲音提到最高，即時有刺耳嘅感覺，而平時音調去唱時就啱啱好。

2) もう一度キスしよう --- 金月真美喺 " 風の扉" 入面嘅歌，呢首歌我就專試低音，因為呢首係由頭到尾都有重低音伴奏嘅 "慢歌"，可以慢慢品嚐啲重低音。AD2000X 嘅低音同 A1000X 一樣係重質唔重量，不過我聽起上黎冇 A1000X 咁好，重低音嘅餘韻太強，唔係即起即收，但係普通低音就冇問題，係重低音(揼心口果一類)先係咁，希望係啱啱開聲闗啦。

3) Dance with the wind --- KOKIA 喺 "Where to go my love" 入面嘅歌，搵佢試嘅原因係想聽下一位有感性聲線嘅歌手，用呢隻耳機聽會係點，嗯，我用其他耳筒聽，佢把聲好幽怨、好正，用 AD2000X 冇左呢種 feel。

4) 外援一號 ---- 僕と生きることが君のしあわせ --- 收錄喺 "ああっ女神さまっ Singles+キャラソンcomplete Disc 2"，主唱係井上喜久子，因為試完金月真美嘅歌後，因為聽落唔錯，想再試試同類歌手會係點，井上大姐同金月真美聲線上嘅分別大概係井上大姐有溫柔 "大姐姐" 嘅感覺，而金月真美就係戀人嘅感覺，呢類女聲係咁嘅裝備下幾好聽，比較耐聽。

5) 外援二號 ---- 祈りの歌(アルテVer.)，呢首歌我懷疑有冇人識，有隻 game 叫 "天使小夜曲"，其中某張 soundtrack 就有呢首歌，歌手係 "園崎未惠"，聲線類似 KOKIA，不過真比較清爽一啲(其實係冇 KOKIA 小姐唱得咁有感情 )，呢首歌同我用其他耳機聽出黎大致上差唔多。

6) 外援三號 ---- 裸足のプリンセス，呢首係白色惡魔(唔好問我點解 ) -- 田村 ゆかり 喺 "おしえて A to Z" 嘅歌。一聽之下有少少唔對路，田村小姐聲音蘿莉化 ，呢啲係鐵三角嘅特質??? A1000X 聽出黎係點唔記得左添，但係 EXK, ZK 聽出黎係嬌嗲，但絕對不是蘿莉，搵多首田村嘅歌試下---- Butterfly*kiss...把聲真係比較 "蘿" .......  又係果句，希望係未煲好關係啦。

7) 我係一路聽一路打呢編野，睇睇下發覺冇左我最鍾意嘅女歌手 --- "水樹 奈々"，即時搵番首快歌試下先(因為之前試嘅都係慢歌)，就搵佢算係最近期嘅個人專輯 ---- "ROCKBOUND NEIGHBORS" 入面三首歌去試(以前啲個人專輯，啲背景音樂可以用聲衰黎形容，所以唔用黎試)，分別係 "アヴァロンの王冠" 、"星屑シンフォニー" 及 "Linkage"。用 AD2000X 去聽水樹啲快歌，冇左果種氣勢磅礡嘅感覺，呢一樣唔係鐵三角強項就冇計，但 Linkage 呢首歌啲樂器有少少炒埋一碟，還好呢隻耳筒啲人聲比較前，整體聽落問題都唔係咁大。因為對水樹太有愛，順道聽埋 Linkage 下一首歌  -- "Star Road"，水樹一發揮佢嘅拉音兼震音本色時，結果同石橋小姐將高音提到最高時一樣，有少少刺耳，呢啲唔會係唱功好嘅歌手，係呢隻耳筒下嘅宿命掛???

結論: 用 39xx 買呢隻耳機我覺得冇問題，如果用香港行貨價去買呢隻耳機，我一定唔會買佢，因為剩係適合聽金月真美，井上喜久子呢一類歌手嘅歌 ...... 我係想咁樣講，不過又怕俾人插死，都係保守啲講，可能係我前端 --- 老虎盒問題，或者我應該考慮考慮換左部老虎盒或者 mod 左佢。

小瑟

好堅既分享喎, 留名!!!

hiyori

師兄精彩分享啊，而且竟然有用祈りの歌(アルテVer.)去試，果然係資深既AG 音樂迷(笑
至於師兄提到既問題，我想也有可能是系統組合?因為我試聽時覺得佢歌路識性都應該幾廣，刺耳應該夾下AMP應該解決到，唔知師兄用緊什麼組合?

gahqm

hiyori 發表於 2013-5-22 15:02
師兄精彩分享啊，而且竟然有用祈りの歌(アルテVer.)去試，果然係資深既AG 音樂迷(笑
至於師兄提到既問題， ...

竟然有人識得 "祈りの歌(アルテVer.)", hiyori 果然係同道中人

我係喺電腦接 Asus Xonar Essenace One (普通版), 用 A1000X 嘅時候， 聽落去都冇乜問題，反而用更高階嘅耳筒會遇到呢啲情況，一嚟 A1000X 同 AD2000X 雖然係同廠都係有唔同嘅走向，二嚟應該都係我用華碩老虎盒嘅問題，睇黎我真係應該換走部老虎盒喇，嗯，換 opamp 調一調味唔知得唔得呢？？訓醒後再聽聽 霜月はるか 同 志方 あきこ 合唱果首 EXEC_with.METHOD_METAFALICA/.， 再同 EXK 做比較，點講好呢，背景音樂 EXK 偏向 sterero 味道而 AD2000X 就有少許 surround sound 嘅感覺, 聽演唱會果類應該 AD2000X 會比較爽，但人聲就 EXK 暫時比較討好，大概係因為 EXK 有超過 LV 100（100 hrs) 嘅關係吧？？ AD2000X 嘅人聲有少少 “萌" (只係同音字，唔係果個意思 ），或者幫 AD2000X 練一練功再同 EXK 做比較會好啲，唔同 ZK 做比較嘅原因係因為隻 ZK 仲排隊練緊功，太多耳筒又有少少麻煩 。

萬花筒

刺耳有機會係唔夠力推耳機

gahqm

萬花筒 發表於 2013-5-23 09:06
刺耳有機會係唔夠力推耳機

我諗唔會唔夠力掛??? 基本上華碩老虎盒冇乜好，係推力比較好，我用 X1 時被推力虎虎生威 ，反而可能唔係咁適合推呢隻耳筒，不過等煲多一排先下定論。

hongsuki

師兄，試下換哂muse02睇下會唔會好d

gahqm

hongsuki 發表於 2013-5-23 11:22
師兄，試下換哂muse02睇下會唔會好d

Muses02 我想買好耐，好衰唔衰 digikey 依家冇得散賣

WE300B

佢把聲好幽怨、好正，用 AD2000X 冇左呢種 fee <----------------

GAHQM HING, I THINK ASUS NOT MATCH AD2000X (JUST FOR MY EXPRIENCE)
ANYWAY, HAPPY LISTING ~~   

hongsuki

gahqm 發表於 2013-5-23 11:27
Muses02 我想買好耐，好衰唔衰 digikey 依家冇得散賣

其實我都好想，不過就係唔捨得