如果想睇到更多76師兄嘅分享，快啲登入成為會員啦！
您需要 登入 收看或下載更多內容。還未成為會員？成為會員
x
話說光陰似箭, 日月如梭, 話咁快就寫緊第三篇測試文啦! 今次既主角係V-moda vamp verza (以下簡稱V仔)
自從做左特工之後, 除左生活不再乏味之外, 亦不斷接到新既挑戰! 今次要測試既產品真係唔講得笑, 因為係一部多用途既型格玩具, 除左具有DAC+AMP既用途, 亦可以當一部隨身充電器, 更加可以拎出街吸睛, 絕對係潮人既指標, 可以話係一舉三得!
我不得不承認, 收到呢個產品既時候, 我當場哇左出黎, 因為真係好靚好型! 自從開始玩隨身音響之後, 對所有產品既外觀已經有極強既包容性, 話曬好聲便是一切…但呢個新玩具改變左我小小既看法…
廢話講玩, 開始入正題, 照舊先講外觀先, 呢樣野絕對值得我用番小小篇幅去講!
梯型既硬包裝盒, 配上真皮既”啪鈕”設計已經俾人一個高級既感覺, 一拉開就馬上見到主角….既說明書! 哈哈哈! 原來主角訓左係張說明書後面 (說明書絕對要細心閱讀, 因為清晰地講解左呢件玩具既幾個用途)
一拎上手發覺幾”墜手”, 造工超級靚, 拉絲面好滑, 接駁口好齊, 絕對對得住Made in Japan呢三個字, 順便一提呢部野係意大利設計.
顏色方面有全新, 紅黑, 白橙三款, 我測試呢款係本人最喜愛既紅黑!
除左主角外, 佢包埋三條好緊要既線, 分別係USB-micro (作充電及電腦DAC用途, 官方數字充滿要5小時, 可以play 7小時, 我測試過都相差無幾, 但用USB3.0充唔洗5小時, 因為output volt數問題), micro USB – micro USB (連接Andriod系列電話用), 30pin – micro USB (連接apple系列player如IPC等用), 如果大家使用IP5, 記得要自備lightning – micro USB/USB呀
部機有幾多功能下, 我盡量講曬俾大家知:
1. USB-DAC (接駁電腦USB位置, 可以幫助電腦處理解碼)
2. iAMP (隨身DAC+耳擴)
3. 有三個mode, 分別係VAMP (當普通AMP用), *VAMP (其實*係閃電符號黎, 用黎一路差電一路當AMP用), iSYNC (用黎同itunes同步)
4. 3D function (設計原意係令到首歌更立體, 有收音機既味道, 個人覺得一般)
5. Bass + (要按實個Battery button幾秒,開關會閃燈, 紅色係pure sound, 綠色係bass enhanced, 效果明顯而且quality無乜下降)
6. Battery (可以隨時按制檢查剩低既電力, 好方便)
7. Hi-Lo Gain (經過測試Lo Gain已經好夠力, 連我對ER4B都只係1點鐘已經夠推)
8. Volumn knob (轉盤形式, 手感幾好)
9. Phone out / Optical out (3.5mm, 可以直插耳機或者再optical out出齋AMP)
好啦…應該就7788啦, 研究途中發覺重有個手機殼既物體 (事後發現係分開賣, $780), 原來佢有推出IP5同S3等版本, 除左有個高質素既鋁製bumper殼外, 重有塊板, 可以同部V仔大合體, 跟住當係電話底殼, 咁樣V仔同部電話就會二合為一 (番外篇會講)
(死啦寫完我都唔知自己up乜…你當個bumper殼既底板可以直接連接住部V仔啦) 成舊野係一個字: 型!
至於呢部V仔支援既電話可以參考以下連結:
https://v-moda.com/VAMPCOMP/
終於黎到重要既部分, 就係聲音啦! 如果一個女仔勁索, 但又無身材又爛口, 俾你都唔開胃啦係咪先! (不過有得免費食相信大家都唔會錯過) 所以…我咪就係其中一個想食既人囉!
為左尊重呢個索爆既靚女, 決定出動小弟既那話兒 (我講緊私伙架生ja)! 我一向好少講規格方面既spec, 因為真係有心既可以隨時上網search到一堆, 反而遵守住特工既準則, 從用家角度評論產品. 今次我會用到兩對私伙耳機同埋一對耳牛黎作測試 (黎緊我應該會好少寫比較文, 一黎因為好多時唔係apple to apple, 唔通2000蚊貨仔會好過5000蚊咩! 二黎可能我比較果幾樣耳機耳牛唔係個個有, 望到無得食果種感覺係好難受架!!! 不如直接對對評好過! p.s. 多謝某幾個友人既意見先), 分別係人聲+錄音神器不過難推到爆既 ER4B, 剛推出曾經掀起一股圈鐵熱潮而換線後分別極大既Ultrasone IQ, 同埋近期個人認為特別出色既AKG K702A. 好啦去文!
BTW今次開聲機用唔到AK100啦終於…因為大部分人都玩過IPC, 所以選擇左IPC6代V2黎試.
ER4B:
呢對野相信一眾發燒友都唔會陌生, 佢既聲音我覺得暫時無一對可以取代 (F111係比較接近既一對, 但唔換線都係爭D), 而且非常難推! 既難推得夠聲, 又難推得夠質, 用黎寫review一流!
其實小弟更喜愛ER4S, 不過既然測試就用對極端少少既黎試啦! 先講推力, V仔既音量調教到1點鐘位置已經夠聲, 重要係Lo Gain!!! 推力方面絕對一流! 至於聲音方面我覺得偏冷, 有D放大左既IPC聲感覺 (廢話哈哈!) 整體黎講分析力高左好多, 而Bass亦比直推深層次唔少, 開埋Bass+效果更明顯.
相反ER4B既高頻演繹提升並無預計中明顯, 毒性亦都不太強烈, 但當然比IPC直推好好多. 總括黎講有明顯提升但感覺相夾程度一般
IQ:
眾所周知, IQ既原裝線同H7N9有莫大既關係 (梗係啦! 雞到唔可以再雞!) 為免耳仔受難所以今次配合IQ用左條Whiplash Audio既V2 Hybrid黎作測試 (呢條線都係私伙, 唔好問點解唔用V3 Hybrid, 我認我窮!!!), 本身換線後已經係另一對耳機黎, 所以好期待IQ+V仔呢個組合!
IQ本身樣樣野都幾好, 唯獨配戴感同埋過標既人聲係一個大問題! V仔當然唔會影響配戴感啦, 但人聲既控制明顯有提升, 起碼好過IPC多多聲. 至於分析力完全係兩個Level (注意: 只係同IPC比ja), bass 好鬼清脆, 音場就都係咁上下, 始終唔係IQ強項.
唔知關唔關條線事, 我覺得成對IQ同IPC直推差好遠! 本身IQ聽Classical可以秒殺好多耳機 (可惜我極少聽Classical), 而加聽下Kenny G都聽到好陶醉, 甚至連佢相對較弱既女聲部分都聽得入耳, 當然無得同4B比啦, 但我覺得收貨有突!
如果有師兄們有IQ, 我強烈建議第一件事係換線!!! 雖然題外話, 但未換線既IQ就好比自動波既掃把老, 到喉唔到肺, 所以擁有IQ而又未換既師兄們真係信下小弟一試換線後所帶黎既提升!
不過都係要補充番一句, 試埋IQ+V仔, 我開始覺得V仔既強項係中低頻, 而高頻既提升真係相對較少
K702A:
早前76搞左個空前絕後既K702A試聽會, feedback非常好, 我本人非常抱歉因為工作所以未能出席, 為左表示歉意我親日入左對K702A在家試聽 (關咩事?! 藉口je!!)
K702A係上面有提到, 算係我近呢一兩年比較喜愛既耳牛之一. 由於小弟家中器材有限, 所以大食行列如HD800等未能餵飽而被迫割愛, 但K702A無論係音色上同配戴上都比起AKG之前既flagship出色太多, 所以唯有敗入啦!
好啦關於K702A既寫夠啦, 開始講同V仔既配合. 本身K702A係一對幾平均既耳牛, 但經過V仔既調教後, 中低頻變得更加出色, 始終IPC直推出黎都會覺得未發揮到對耳牛既真正實力…至於高頻我木耳, 只覺得聽得好舒服, 你要我用文字寫出黎好難表達, 係有提升既! 至於Bass+ mode 我就覺得不及全原裝既聲音, 可能我已經唔再係basshead啦! 3D mode都不太對味兒, 但係你由得佢囉, 無人叫你一定要開架! (雖然佢個設計搞到我間中會唔小心”禁”到)
番外篇之Iphone5+V仔合體?!
話說小弟自從IP2之後就無再用過Iphone系列啦…自己係好多人連Android係咩都未知既時候已經開始用, 所以對呢個系統好有感情, 一路換機到而加既XZ都從來無打算轉會, 所以見到部V仔連左個IP5型爆殼真係R爆頭…究竟點算好? 唔通真係要轉會?
我承認研究左個殼既設計後, 真係好鬼心動, 曾經真係打算轉部IP5黎玩下 (但當發現XZ二手既回收價之後念頭馬上打消!), 不過始終都係要耳聽為實, 最後唯有問人借左部IP5黎把玩…以下係小小分享:
首先個殼真係好鬼Fit身, 日本仔手工真係無得彈! 其次佢可以將部V仔用螺絲鑲死落塊底板度, 跟住變型金剛上身可以合體! 正!!!
講番D聲先, 如果你用開IP5直推黎講, 無論你幾咁木耳我相信都會聽得出分別! 但可能我本身好少用電話黎聽歌, 比起IPC+V仔, 都尚有小小分別, 所以如果你追求極致既音樂, IP5+V仔未必滿足到你, 但如果你希望可以吸睛+型棍+一體機+音質有提升, V仔覺對會滿足到你既要求!
總結
雖然測試既時間只係短短既5日…但呢篇唔經唔覺居然打左接近3000字...從此可見V仔既魅力! 由於真係真係好鬼多function, 所以好多都未有時間仔細測試, 還望大家多多見諒! 希望大家可以留個言/正評支持下小弟, 其他特工同埋76既各位高層+工作人員, 無佢地既努力我連條毛都無得試呀!
你地既支持就係我地既力量! 請投我一票啦! (投乜Q呀……)
|
[複製鏈接]
發表於 2013-5-9 14:46
發表於 2013-5-9 15:24
樓主
