[報告+設定分享]Velodyne Spl-1200 Ultra(一年用後感updated)

tomohiro · 發表於 2013-4-7 23:22

本帖最後由 tomohiro 於 2014-3-15 13:26 編輯

大家好！！！話說小弟o係今年CNY之前入手Velodyne Spl-1200 Ultra，由於事前由資料搜習到購買到設定遇到過唔少困難，而o係呢段期間亦有出過文請教，有好多師兄幫過手

，因此決定出一個報告+設定分享o黎報答各位！

好，事不宜遲，先由選購過程講起la~~~話說小弟食左好耐樹皮之後決定用10K左右o既筆值去買一隻十仔，當時仲以為呢個筆值已經可以買到頂級無敵model，點知開始做research先知呢個筆值無疑係可以買到唔錯o既十仔，但就唔係無敵，因為我發現呢個price range入便o既十仔，要麼就係快收快放型(打心口型)，一係就深潛型。之後好快就鎖定左sunfire同velodyne，原因主要係好多forum間口啤好，同埋外國有兩個"權威"網評分高。

下一步，當然就係現場試la，當時小弟分別去過幾間店試，試過sunfire hrs10，hrs12同velodyne spl1200 ultra，片段有transformer dark of the moon 跳飛機同hulk校園段。試完後，小弟真係1516，hrs12份墊底真係好有氣氛，但係試過velodyne spl1200 後又被迷惑，o個種收放自如，一收收哂同層次真係好吸引……

好啦，咁點解最後會決定買spl1200呢，其實係因為有個sales同我講，如果買收放自如型，都可以o係setting上set到多d墊底(當然不能同hrs12比la~佢話可以crossover set 大d，如120Hz)，而因為小弟鍾情velodyne o既auto-eq同outllook，所以最後決定……

VELODYNE SPL-1200 ULTRA~!!!!!!!!!!!!!!!!!!!!!!!!

------------------------------------------------------------------------------------------------------

廢話講完，哈哈哈，開箱先！

比想象中輕，but都好重！

登登登登！

好靚仔啊！

除3先……

屁股

--------------------------------------------------------------------------------------------------------

真正o既包膠o黎la~~~~~~由買入到依家都過左兩個月，由於小弟地方有限，罷位方面基本上只有近中置同近左前兩個choose，一開始o既時候選擇左近左前，後來轉左近中置，即係下圖同防潮箱調左位。

點解呢？因為小弟發現即使用左auto-eq，近左前o既話都有d woo woo 聲，但係近中置就無，可能呢d就係所謂o既駐波，所以就放近中置。

咁因為無得再選擇罷位，之後好當然就試電源線同十仔線la。o係期間不得不提o既就係小弟有個朋友係兩channel o既超級發燒友，而雖然佢無玩surround，但佢o既意見同佢DIY o既線真係幫左我好多。

o係電源線方面，小弟一開始係用我朋友diy o既線，係大power型。但係o係使用後發現因為十仔未開聲，用大power線會收放過快，d聲好緊。因此暫時用跟機線，等個氣氛出返少少，等開聲後再試其他。

o係十仔線方面，小弟亦由BJC線改用朋友diy o既線，呢條線明顯係厚聲d，用以補充velodyne少墊底o既特性。

最後，o係音壓方面小弟依家設定為81db pink noise(使用音壓計)。小弟試過十仔細volume(20)，amp大訊號(0.0db)；十仔大volume(40)，amp細訊號(-12.0db)，發現如果十仔大，amp細的話，明顯墊底多左亦不失線條，反而十仔細，amp大的話就個人而言墊底就少左，個相對收放就更快。所以小弟最後都係選擇十仔大，amp細o既設定。

本文大致完畢la，以上都係小弟個人o既淺見，還望各位師兄不喜勿插la~~~~

多謝閱讀。多謝，多謝！

--------------------------------------------------------------------------

UPDATED on 08-04-2013 :

想補充少少小弟o既設定。

1)有auto-eq o既十仔應該set amp先定十仔先？
我分別試過amp先同十仔先，發現我對木耳黎講分別唔大，不過我喜歡amp先，因為自已覺得o係低頻方面應該係十仔個eq準d，所以最後先用十仔黎修靚返個eq數值。

2)volume 點set？
我會o係amp(onkyo 818)個audessey開始o既時候無視佢要求調整十仔音量o既部份，因為如果跟onkyo去set o既話，個十仔音量會低得好過份。之後用音壓計set低amp o既訊號輸出，達到pink noise 81db。(註：其餘speaker為75db)試過十仔75db，太細聲，唔o岩自已口味，因為直頭無哂墊底個d。

3)crossover點set？
因為小弟係用座地前置，衛星後置(canton mx150)所以前置同中置都set 80Hz，後置120Hz。之置試過前置set40Hz(audessey自動調整數)，發現低頻量感覺好似少左，所以都係set80Hz。

4)phase點set？
我用0度，主要因為十仔o係正前而我………賴……未試……

5)十仔線一條入LFE定用盡818雙十仔output入十仔左右in？
試過插哂兩邊，分別好似唔太多，最多係心理上覺得量大左少少但同時好似少左d detail，所以最後都係一條算數。

以上係個人意見，如有錯請各位師兄協助我改善。感激不盡！

--------------------------------------------------------------------------

UPDATED on 15-03-2014 :

用左一年o既設定小分享：

事緣此十仔已用左一年，深信聲已全開，個人感覺此十仔真係屬於快收快放型，潛得算深但停留時間短，如果鍾意超重氣氛十仔o既師兄未必鍾意velodyne。

用左一年之後因為已開聲o既緣故，小弟重新set過十仔，發現如果將amp o既output set太低會令低頻失去details，amp set -2db，十仔vol 為28。咁樣set會detail好多亦震撼好多。

可惜o既係，十仔始終可以放o既地方只得一個，未能試盡擺位，亦深信此十仔仍有進步空間，總括而言，我對呢隻十仔十分滿意，聽得開心。

如果有師兄o既筆值係10k至15k，喜歡快收快放型，我好建議呢隻十仔，堅正！