《大鈍裁者》The Dictator : Blu-Ray / DVD

Ken704

《波叔出城》班子笑破千萬大支嘢製作 出盡淫、賤、茅招　反轉玩嘢獨裁國

BLU-RAY / DVD / 9月4日推出


Blu-Ray影碟規格 :
語言：英語、泰語
音效：DTS-HD MA 5.1
字幕： Chinese 中文(粵語 / 國語) 、英文、泰文
片長：83分鐘
視像比例： 2.40:1
建議零售價：約$268

特別收錄：
‧刪剪片段
‧阿拉甸將軍與Larry King對話
‧音樂MV – Your Money Is On The Dresser 阿拉甸將軍主唱


故事內容:
阿拉甸﹙沙格畢朗高漢 飾﹚係北非國家華狄耶嘅獨裁者，一次踩入聯合國會議交代核子設施，竟然俾陰濕皇叔﹙賓京士利 飾﹚發動政變，尊貴地位更被一個傻仔替身取代！堂堂一國之首突然變得身無分文，唯有流落美國街頭四圍騰，期間多得民權女鬥士蘇兒﹙安妮花拉絲 飾﹚收留，仲幫呢條大支嘢融入佢個溫馨小社區，兩人關係亦開始曖曖昧昧……呢個平時歎盡荷里活男女巨星嘅鹹濕昏君，最終會愛上普通人落地生根，定還是痛定思痛發奮圖強，親手攞返本來屬於自己嘅嘢？

  阿拉甸上將「搶攤」攻陷紅地毯實錄：
[YoutubeHD]mhAg0COnqds&feature=related[/YoutubeHD]

阿拉甸上將現身”TODAY”直播現場：
[YoutubeHD]VASlohcM7js&feature=related[/YoutubeHD]

阿拉甸上將接受“THE PROJECT”訪問:
[YoutubeHD]lVGV6DLxRT8&feature=related[/YoutubeHD]

BLU-RAY殿堂至尊級特別收錄：阿拉甸上將永久珍藏版專訪及MV

阿拉甸上將 舌戰 CNN名嘴Larry King
被問及最欣賞邊個國家領導人？阿拉甸上將居然話係金正日，講講吓仲一時感觸流下男兒淚！之後佢仲當住鏡頭大吐口水，公然侮辱對方嘅猶太人血統，激到Larry King越講越燥，終於還拖殺入正題：「你到底有冇核子武器？」問題咁尖銳，到底阿拉甸上將會點樣拆招？

上將自導自演MV力作 “Your Money is on the Dresser”
生性浪慢多情嘅阿拉甸上將，獲頒「最佳情歌」獎簡直係實至名歸，賽果宣報一刻當然笑到四萬咁口，不過有人仲開心過佢，到底點解？阿拉甸上將喺MV入面仲會有超Sexy嘅演出，唔單止露底仲要露埋毛，全球死忠Fans絕對不容錯過，務必火速搶購作永久珍藏！

《波叔出城》無道德班底 再度嗱渣出招金球笑匠 沙格畢朗高漢 踩入主流廣招新Fans
近年崛起的性格笑匠沙格畢朗高漢(Sacha Baron Cohen)，憑騎呢笑片王《波叔出城：哈薩克鄉下佬去美國搵著數》全球狂收20億，奠定比星爺更無厘頭、比王晶更踩界的不文笑匠地位之後，再憑《波兒出城之妖壇教祖三點畢露搞硬美國佬》盡顯扮鬼扮馬本色，繼續笑冧全宇宙。今年，他再度出招扮演《大鈍裁者》，夾埋《波叔出城》導演，一齊玩轉世界，更在香港取得過千萬票房佳績，足以證明呢條最愛大玩鹹濕、屎、尿、屁嘅戇Cult佬，今日經已成功上位打入主流電影巿場，跨界招攬到更多唔同嘅新Fans！

飛彈核武當玩具 毆打細路當有趣 獨裁北非離晒譜 落難得罪美國佬！
今次沙格畢朗高漢飾演一名意外被奸臣謀害，因而流落美國街頭的瘋狂北非獨裁者、華狄耶(Wadiya)國家元首阿拉甸上將(General Aladeen)。一代狂人，身無分文，現身美國四圍騰，可以點樣翻身？亦如《波叔》及《波兒》一樣，沙格畢朗高漢不但幕前演出，同時亦包辦編劇一職；實行貫徹以往啜核抵死兼針針到肉的風格，令觀眾喪笑到肚皮抽搐再標眼淚。今時今日已經上晒位的沙格畢朗高漢，除了自己擔任男主角之外，更請來《搞乜鬼奪命集作》系列搞鬼女星安妮花拉絲(Anna Faris)出任女主角；再加上首任《變形金剛》索女美瑾霍絲(Megan Fox)、《芝加哥》金像提名男星約翰韋利(John C. Reilly)及《甘地傳》金像影帝賓京士利(Ben Kingsley)助陣；幕幕笑料再加上星光熠熠，真係點睇都咁精彩！

聯合國頭號敵人：阿拉甸上將率領一眾猛人 現身《大獨裁者》

阿拉甸上將 (沙格畢朗高漢 飾)
北非國家華狄耶嘅獨裁者、金正日嘅死黨、前獨裁者奧瑪‧阿拉甸嘅獨子。佢7歲就手握軍政大權，家中石油多過食水，財產多到爆！有錢自然身痕，阿拉甸仿傚康熙大帝，將全國3,000詞語統一成一個字：「Aladeen」，導致國家大亂！除咗文學有心得，佢運動更加「了得」。佢曾經舉辦「私家」奧運會，仲破天荒囊括14個金牌添！另外，阿拉甸上將亦深得荷里活女明星「歡心」，傳聞Katy Perry、荷莉巴爾、美瑾霍絲為咗「錢途」，紛紛同佢鬼混。

今次，阿拉甸「勇闖」聯合國交代核子計劃，竟遇上皇叔塔米爾發動政變。一代狂人瞬間變成美國Nobody！其後遇上民權女鬥士蘇兒，喺美國街頭上演連場癲到爆、喪到喊嘅奇遇！

蘇兒 (安妮花拉絲 飾)
外表似男仔多過似女仔，身材似細路多過似大人嘅美國民權女鬥士。崇尚女權主義、標榜素食文化。一次支持華狄耶爭取民主自由嘅示威上，佢遇到俾人剃哂鬚兼無人認得嘅阿拉甸。火星撞地球，二人做咗朋友。蘇兒幫助阿拉甸迅速融入美國社會，同時開始對佢產生好感。之但係，要阿拉甸愛上一個男人婆，佢又肯唔肯！？

塔米爾皇叔 (賓京士利 飾)
阿拉甸嘅親生皇叔。一直以嚟眼見阿拉甸敗壞朝政，心裡面極之唔妥佢！借住出訪美國嘅好機會，塔米爾佈下天羅地網，剃光阿拉甸嘅「招牌」鬍鬚，又用替身偷龍轉鳯；更將阿拉甸踢落美國街頭，勢要佢永不超生！

美瑾霍絲 (美瑾霍絲 飾)
熱情如火、身材索爆嘅美瑾霍絲，喺《大鈍裁者》入面飾演嘅角色係…佢自己！據知美瑾仲會同阿拉甸有場超激床上戲！Fans敬請期待。


神秘客串：  愛德華諾頓 (愛德華諾頓 飾)
據知情人士透露，愛德華諾頓都會出現喺《大鈍裁者》入面。佢仲會有犠牲色相嘅破天荒演出添。大家記住留意！

命硬好人

呢套好睇！
不過個定價就~


- 發送自我的 iPhone 大板凳應用

Ken704

呢套好睇！
不過個定價就~


- 發送自我的 iPhone
命硬好人 發表於 2012-8-31 12:05

不過個定價就 x 2

mttmax

好貴下wor, 83分鐘膠盒版賣>$268???

emuho888

$268

@肥狗仔@

唔係加長版~~

SonSon

呢套好笑, 但個價就一D都唔好笑

劉一舟

嗰個係建議零售價啫，樂悠網之前都標呢個價，但而家已回落$217
講真我冇睇過波叔亦冇乜興趣睇呢套，所以我可以慳番買過第二隻碟。

朗

嗰個係建議零售價啫，樂悠網之前都標呢個價，但而家已回落$217
講真我冇睇過波叔亦冇乜興趣睇呢套，所以我 ...
劉一舟 發表於 2012-8-31 13:14

之前冇完整地睇過波叔啲戲, 呢套有入戲院, 都可以收貨!

Ken704

冇錯！Suggest Price一定貴過街價！即係好似硬件都一樣！我估最平開賣22幾啦！