阿仙奴出戰英超 2012-2013球季

kenny.k · 發表於 2012-11-6 20:16

睇見尼篇嘢.....唉!!
廠魂何在？究竟係亨利晨早帶走咗，定係法比加斯上季拎埋去巴塞？呢個星期嘅阿仙奴唔係我熟悉嘅兵工廠，呢場亦唔係我睇慣嘅曼阿大戰；因為呢隊阿仙奴冇晒靈魂，佢哋唔似嚟贏波，似係踢吓衞生波，贏輸都唔在乎。
可能有人會話早失波打沉咗阿仙奴嘅士氣，亦可能有人話韋舒亞被逐令兵工廠無力進攻；但我仲記得季初利物浦對曼聯，雖然紅軍踢少個，但佢哋冇放棄，照㩒住曼聯嚟攻，呢啲就係求勝嘅慾望！仲記得車路士對曼聯，藍戰士要踢少兩個，但都可以踢出隊形，呢啲係強隊嘅氣質！雖然利物浦同車路士最後都輸波，但輸得光彩，至少佢哋要逼到曼聯出真功夫，將勝負嘅懸念拖到比賽最後！呢啲先係經過熊熊烈火同漫長試煉嘅班霸！
但阿仙奴呢？當尹佩斯喺3分鐘入波後，比賽勝負已定。明明落後緊，但阿仙奴班球員唔逼、唔搶、唔快，繼續懶懶閒；到曼聯入到第2球、韋舒亞被逐，曼聯已經踢得越嚟越hea，但最嬲嘅係阿仙奴仲hea！感覺呢隊好似韋根咁，嚟到奧脫福輸少當贏，兩球就兩球啦！
成隊阿仙奴最有鬥心就係新加盟嘅辛迪卡索拉，係得佢戰鬥至最後，幫阿仙奴破蛋。呢個入球唔係畀我哋球迷睇，係應該畀艾朗藍斯、基奧特、普多斯基佢哋擘大對眼睇清楚咩叫鬥心！我想問佢哋見到呢個入波有冇慚愧？有冇內疚？望住安德里山度士半場就同尹佩斯交換球衣，我望唔透、望唔清，究竟係邊個偷走阿記嘅鬥心？