陸小弟平玩DAC之路

ykluk · 發表於 2012-6-24 19:03

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

本帖最後由 ykluk 於 2012-6-24 19:05 編輯

本來應承咗小瑟大王要寫返個報告, 不過小弟覺得, 淨係寫對一部機既感覺, 會好似有啲打手feel, 又好似唔係幾中肯. 既然係寫, 不如一次過將小弟玩DAC既過程話比大家知, 等大家知道小弟以前係聽過啲乜, 所以先會有咁樣既感想.

作為HIFI新手, 小弟一直以嚟都係以”CHEAP精”自居, 無錢無地方玩, 只能夠用一個好細既房仔裡面, 以電腦(PC – WIN7 + iTune)作為訊源(亦試過有一排用OPPO 93作訊源, 不過宜家部93要拎出廳服侍老婆). 自從年幾前買咗對ADAM A3X返嚟之後, 就一直試玩唔同既DAC去配合:

TOPPING D2全能解碼耳擴前級

小弟第一部入手既DAC, 可以話用”價廉物美”去形容. 年幾前小弟以大約7條魚魚既價錢, 就擁有一部能夠處理類比+轉盤數位輸出+電腦數位流的全能前級+耳擴. 另一吸引之處就係夠細部, 放喺電腦MONITOR下表面都非常之夠位.

TOPPING D2既數位流處理晶片用上世界一級大廠德州儀器旗下BB產PCM2704, 小弟當時最初頭就係用一條鴨記十皮USB線插入D2, 一開聲已經同電腦ONBOARD SOUND CARD差好遠啦~~!! 至於佢仲有光纖與同軸輸入, 經過DIR9001接收晶片處理, 然後解碼器AD1852處理, 可以直接處理96kHz/24bit信號. 小弟就曾經試過由OPPO 93經同軸入D2, 連SACD都聽埋添~~!! {:9_408:}

D2既輸出基本上係以RCA, 而當時小弟就自製咗條OYAIDE PA-02+紫銅CMC RCA頭去ADAM A3X, 雖然D2既輸出只有25W, 不過A3X係active speaker所以又無乜所謂. {:9_436:}

音色方面, D2係比較明快及清晰既, 雖然小弟無咩A/B TEST過, 但以喺活動上聽過既Onkyo SE-300PCIE sound card感覺去比較, 雖及唔上但唔會話太差天共地. 如果純以清晰咁表達聲音, D2的確係做得到. 不過以咁既價錢去計, 當然係有佢不足既地方, 小弟曾經用OPPO 93播放《HIT MAN RETURNS》裡面”Lara Fabian”既其中一首歌”Caruso”, 每當去到佢中段由中音爆上高音既時候, 好明顯D2有啲”頂佢唔順”, 上到高音最有力嗰嘢就拆~~!! (呢個情況無論係D2去A3X, 或者出Beyerdynamic DT-880都一樣) 所以話C/P值有幾高都好, 有時真係唔好太勉強佢去做一啲無可能做得到既事….

睿志Audio-gd NFB-12

留意到呢部祖國DAC既原因係因為POST76有兄弟搞既私人團購, 而小弟有個老友liclic兄亦pat pat痕走去買咗部NFB-3, 然後係咁同小弟講有幾好有幾好, 淨係粒clips都抵到爛咁. 基於以上講到D2出現既問題, 小弟已經心郁郁想搵過部DAC (當然又係窮人價錢啦), 又咁啱POST76師兄再一次搞私人團購, 小弟見Audio-gd NFB-12團購價又OK (15條魚仔), 又有耳擴部份啱晒小弟夜闌人靜時練吓日文~~!! 所以就擔粗粗連聽都未聽過就入手(仲枉我成日同CHING講要耳聽為實, 我買2部DAC都係未聽過就入手…)

呢部NFB-12對比D2, 輸入輸出方面基本上都係一樣, 都係有USB, 光纖及同軸輸入, 以RCA輸出及有6.5mm耳機輸出, 不過晶片上就有好大改進, 佢用上2片歐勝微電子Wolfson microelectronics的WM8741晶片(好似話Linn既Akurate DS同Klimax DS都係用呢粒晶片). 輸出有幾個選擇: HP係耳機輸; Variable係DAC出聲, 可以用NFB-12較大細聲; Fixed都係DAC出聲, 不過就固定咗大細聲. 而另一個按鈕係Gain, 主要係比耳擴既增益功能, L係0DB, H係+12DB. 另外, 打開NFB-12內部, 係有jumper可以比用家測試唔同既音色, 小弟試過4種mode, 都揀咗個最啱自己既去用.

音色方面, NFB-12比起D2有明顯既改進, 尤甚是分析, 而NFB-12無論係面對A3X或者DT880都應付有餘, 聽返”Lara Fabian”既”Caruso”唔會再有拆聲出現. 高音伸延好咗, 起碼聽《ONKYO發燒純音》第一首既”La Campanella鐘”既時候, 啲鐘聲都聽到少少尾音喺度. 低音明顯都加強咗唔少, 聲音較為實淨. 人聲亦都較為中心同較前. 以15條魚仔價錢去諗, 小弟直情係覺得可以用”物超所值”去講~~!!

NFB-12喺小弟屋企服役既時間較長日子, 一來小弟無乜銀可以經常換嘢, 二來小弟都無話留意到(或者係唔想留意)其他DAC有咩特別表現, 不過長治久安都會有風雨欲來既時候….個幾2個月前既某一日小瑟大王話借部DAC比小弟試一試, 唔八卦無乜事, 一身痕又出事….{:9_431:}

Rein Audio X-DAC

其實講真, 小弟拎部X-DAC返嚟真係純為試而試, 起初睇個spec, 會同好多網友都有同一個問題, 作為Rein Audio呢間較為新既德國牌子既第一部DAC, 點解會為呢部X-DAC用上一粒歐勝微電子Wolfson microelectronics上一代既晶片WM8740, 而唔用WM8741呢? 初初以為因為價錢問題, 8741比8740既晶片成本平一半. 跟住喺Rein Audio既官方網頁睇吓佢有無咩講先:
http://www.reinaudio.com/X-DAC.html
佢就話”專登”用8740係因為8740係被稱為”最自然”既晶片, 當然官有官講, 信唔信就見人見智喇…既然唔使用錢就有得試, 又可XLR出, 可以試吓A3X既XLR input, 咪拎嚟過癮吓囉~~!!

小弟作為HIFI新手, 好多咩數字咩DB咩技術都係得個睇字, 乜都唔識淨係信自己耳仔, 自己覺得好聽啱聽就OK, 唔使理太多咩理論咩意見. 呢次真係一個小弟用耳仔戰勝咩8741一定好過8740既事實喇. 比起小弟部用上2粒8741既NFB-12, X-DAC的確係完勝咗NFB-12~~!! {:9_426:}

本身X-DAC係無volume較大細聲, 不過佢本身個DB都係比較大. 試咗好多小弟聽開既碟(都係iTune出AIFF), X-DAC好明顯比NFB-12有”人性”, 呢一種人性係較為自然既感覺. 整體上X-DAC出嚟既聲較為厚聲及濃厚, 三頻亦較清爽, 無乜雜音同散聲. 聽”La Campanella鐘”既時候鐘聲尾音長而有味道. 低頻方面明顯清脆有力而肯定, 人聲定位結象亦較為向中, 但又唔會太前太埋身. 至於分析力同音場空間感, 小弟覺得X-DAC同NFB-12其實差唔多. 當然呢個比較係一部唔知煲咗幾耐幾多人用過既試用機X-DAC同小弟煲咗一年既NFB-12既比較啫. {:9_434:}

既然分析力同音場大致相若, 不過小弟對X-DAC既”人性”感覺吸引到, 最後既結果係…..小弟家下屋企就係用緊X-DAC, 至於D2同NFB-12, 就分別借咗比2條老友喇.....而對於一啲仲堅信8741同8740分別既朋友, 小弟真係乜都唔識, 絕對無任何理據支持, 只可以講一部DAC既成功唔係只係粒百幾二百蚊既晶片, 當中既設計線路等等好多嘢都會影響到. 唔理大家信唔信, 反正我信了, 仲買埋返屋企添~~!

打咗好多字講咗咁耐, 相信各位CHING都應該覺得悶死, 以上純粹個人耳仔+個人感覺, 不喜勿打頭, 多謝觀看!!