線材分享 - 從 Transparent 到 Tara Labs ...

cosworth01hk · 發表於 2012-4-10 00:09

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

本帖最後由 cosworth01hk 於 2012-4-10 10:39 編輯

由於最近更新左線材, 而回顧返以往所選用過既線材都係一d比較大路既品牌同型號
所以今次想同大家分享下自己既聽感, 而o係大家考慮選購有關線材既時候可以當係一個參考
當然呢d所謂聽感絕對唔係咩權威評論, 我都係想係一個用家既角度同大家分享一下

首先同大家介紹既係一條當年係有蛇買第一套AV既時候
Sales推介既一條Speaker cable
而佢就係 Tarnsparent 既 Music wave speaker cable

當年咩都唔識, 只不過係sales話好同抵玩就揀左佢喇
印象中都要成千幾蚊, 當時自己都覺得幾貴, 仲要唔知有無比人搵笨
至於聽感方面真係無咩可以同大家分享, 首先係當時所購入既組合只不過係但求人有我有
此外, 只玩AV既我, 聽感? 有聲咪收貨囉 !
不過之後係網上搜尋返有關呢條SC既評語都係話性價比幾高同音樂感, dynamic range都幾好
而且二手價仲唔錯添, 而錯既就係我當時唔識貨...

打從第一套AV組合之後, 套野就成為左屋企既其中一件傢俬
只係間唔中落街租碟下, 套野真係放係度觀賞多過觀看
但一部Blu ray player就再次燃起我對影音既火
當時經毒友解介紹, 就入左一對性價比超高既SC
Sound From Heaven President X
8呎 Double run Biwire版 2 去 4
SFH PX.jpg

呢條SC用係我既組合都用左好一段日子
速度夠, 力水好, 分析力高, 完全乎合AV既要求
況且仲要係Biwire 2去4
就連jumper都慳埋, 用係AV system 真係無咩好投訴
雖然只係DIY野, 但造工精美. 真係完全無諗過去換線

但好衰唔衰我又中左 2 ch 既劇毒
係一致好評既情況之下, 我膽粗粗就入左佢
Madison Audio Lab E3 extreme 1 speaker cable

結果 ...

由於一直都係用SFH Biwire, 所以無買過jumper
所以當插好左對Madison, 係無jumper之下唯有插返對speaker原廠銅片jumper落去聽住先
好喇, 一開聲...

後悔感覺即刻係我面上湧現左出黎

又朦, 又暗, 又... 下刪3萬字
(果刻真係有個衝動插返條生粉落去算數)
突然間醒起自己有條QED 25th Silver散線放o係床下底, 甘就不如剪d過去做jumper啦
換走左對原廠銅片再試, 今次中高明顯高清返好多
但坦白講, 整體表現MAL仍然同對SFH Double run仍有一段距離 (此刻SFH比MAL好聲係事實)
不過事到如今, 已經無得返轉頭, 因為對SFH都剛剛同另一頭好人家交收左
不過我相信MAL既表現一定不至如此, 希望時間能改變一切
而係未煲之下向MAL下判斷亦唔公平
隨住日子一日一日甘過, QED 銀線做 jumper出黎既真本性亦慢慢浮現左出黎
o係條Madison慢慢開聲既同時, QED Silver jumper 使到高頻表現好吉耳, 真係非常困擾

最後, 我用左一個平靚正既方法
就係
Madison Audio Lab Esi DIY double run jumper

原本想搵返Madison既E3 extreme 1黎做jumper
但原來Madison既散線最高級別都只係得ES1
結果就DIY左set double run jumper黎夾返對SC
哈! 出黎既效果又幾理想喎, 除左保持返Madison既聲底之外
先前用QED silver 既中高尖叫聲亦都一掃而空, 連帶人聲既中密度亦都有少許既提升
然而開聲後既Madison sc 屬全頻平衡, 而中頻亦比SFH PX潤厚
無乜音染, 屬清快聲一類, 但感覺比較硬同冷
用係2 ch既話, 感情表達方面比較差少少
不過整體黎講, 賣甘既價既廠線係我真係諗唔到有咩其他更平衡既選擇
如果入二手就更加係抵玩到爆

話明中左2 ch 毒, 當然唔少得既係接線
一開始, 我揀選左Tara Labs既Prime M1 XLR
Prime M1.jpg

空間感, 清爽分析力係Tara Labs既特性
出黎效果無咩驚喜, 入門廠線黎講叫做交足功貨甘啦

不過, 人係貪心既, 只會期望自己系統既表現會更上一層樓
咦, 市面上有一條被各方評價甚高, 表現比美THE ONE既接線開賣緊喎
而自己又係用緊Tara Labs既XLR, 既然表現比美THE ONE, 聲底大概都唔會差太遠掛
再者, 話晒都係品牌旗艦產品喎
而且價錢仲 ...

madison audio labs e3 extreme 1 XLR

呢條線破左我系統既一個記錄
就係o係我既系統出現最短時間既一條XLR
插, 聽, 抆返入盒
前後唔過5分鐘, 3個字總結 : 鬆, 郁, 朦, 講完 !

待續 ...

cosworth01hk · 發表於 2012-4-10 00:09

本帖最後由 cosworth01hk 於 2012-4-11 12:24 編輯

經Madison XLR一役之後, 我深明一個道理
原來用o係我既垃圾系統上面, 係唔配用旗艦級既線材

所以打從MAL入盒之後, 我就用返條入門級既Tara Labs M1 XLR
同埋繼續搜尋適合我既三四線既IC

其實, 對M1既表現真係收晒貨
但係, 玩2 ch既病人邊度會甘易滿意
只有時刻都諗有咩方法去提升自己系統既表現, 不斷去尋找自己心目中既靚聲
就係甘, 我就入左與 M1 同廠 Air 1 series 2 XLR

條Air 1 series 2 相比 M1 o係多方面都有所提升
當中包括Tara Labs 最拿手既空間感, 音場方面對比以前的確比來得更廣闊
此外, 由於分析力及寧靜度既提升亦都使唔少弱音, 歌者既口水聲一一展現出黎
而且有一樣野係我以往不以為然既係o係感情表達方面
真係好似感受到歌者表現出黎既情感
但呢樣唔係太肯定係真實定還是自己買入比前者更貴價線材既錯覺
不過唔理甘多, 反正自己高興就好喇

其實自己一直都好想感受一下高級線材o係系統上既表現係咪真係感神奇
各種媒體林林種種既線材評論都精彩非常
夠竟實際出黎既效果有是否如此?
而心目中最期望一試既有Siltech同埋Tara Labs 既中級系列
高級就無可能喇, 一來無甘既財力, 二來亦都唔識呢d感富貴既朋友
近排, o係機緣巧合之下終於忍痛入手Tara Labs既THE ONE speaker cable
先前曾經拜讀過多篇有關此SC既文章
而且各方對此SC既評語亦都非常正面, 希望唔會係先前經歷既翻版啦 ...

等我總結一下 Tara Labs THE ONE SC 同之前用開既Madison E3 extreme 1既分別先
首先, MAL比我既感覺正如先前所講, 係比較硬同恒, 都幾AV向
而Tara Labs就係音樂感比MAL豐富得多 (提升音樂感呢家野對於用緊ESO player既我黎講係絕對需要),
o係全頻表現方面亦都較MAL理想. 而低頻既量感同控制力亦都係我o係購入THE ONE之前所期望既,
然而以上所提及既THE ONE亦一一做到. 此外, Tara Labs o係整體結像同定位方面,
o係一切設置不變而只係更換SC既情況之下亦都遠比MAL分明同清晰, 口形亦因此收細左

始終, 兩者價格實再差太遠, 所以Tara Labs遠勝MAL既結果係非常合理.
要數THE ONE既缺點既話, 相信就係呢條線為人所共知既堅硬程度
如果大家有意入手, 甘事前真係要再三考慮閣下府上有否足夠空間俾位佢走
最擔心既係屈曲程度過大而損壞, 就甘條線就報銷
就係呢個原因, 當初我都曾經想過放棄, 但皇天不負有心人
最後條THE ONE都能夠係我屋企服役
有說THE ONE SC係非常難煲既線材,
正因如此, 所以我更加期待佢日完全投入狀態後帶俾我既驚喜.

到最後一件要講既線材係佢
Tara Labs RSC E2 Speaker Link

既然用得THE ONE, 用Madison 既DIY jumper少不免會使傳輸方面做成某程度上既樽頸或感染該種線材既味道
雖而o係配搭黎講, Tara Labs sc 配 Tara Labs jumper未必係最好
而且o係當初亦都曾經考慮配搭其他品牌既jumper以作調味
但最後因為某種原因而入手呢對RSC E2 Speaker Link
而事實係要感受THE ONE最原有既味道, 就非配合 Tara Labs jumper莫屬
首先想講既係佢既造工真係非常精美

與之前條DIY MAL jumper相比. 初步聽感主要分別係o係中高既密度提高左唔少, 感覺實在左好多
此外o係聲音細緻亦有所提升. 感覺係順耳左同速度收返慢返少少
但係, 由於對jumper係全新既關係, 所以o係各方面既表現都未能夠作準
但斷估唔會越來越差掛 ...

今次既線材分享係甘多喇, 有好多聽感都係好主觀
如果大家所感受既與小的南轅北轍既話, 請各大大多多包涵
最後想講既係未曾試過係網上打甘多隻字, 真係希望呢篇野可以幫助到大家入購線材既時候多一個參考
唔使好似我甘駛左甘多唔應該駛既錢同埋行甘多冤枉路
謝謝大家既點閱及加分鼓勵