一個不能不分享的報告 - Mordaunt-Short Performance 5C

siuping · 發表於 2012-4-6 01:16

本帖最後由 siuping 於 2012-4-6 01:17 編輯

喜歡玩AV、音響既 ching 都知要有好效果，影音分家係不二法門，不過礙於種種原因 (包括環境家人和$$等等)，真係未必事事如願，祇能選其一又或取個平衡，既要滿足「戲氛」，又可欣賞「樂韻」。小弟雖然已經有一段時間將一套膽前後冰封床底，但係對樂感表現仍然有著一份執著 (前級係一部全摩 Allegro 用telefunken 12AX7 配 Proac Tablette II，生動活潑且分析力一絕)，最簡單要求係睇戲達到緊張剌激之餘，聽到背景插曲都應有柔揚悅耳之感。

今年係小弟既升級年，自從年頭接左呢度ching 放既 LX83 取代舊有入門 Onkyo Amp，眼同耳都「被逼」開封，換電源線後就開始到AV音效其中最重要既中置。舊有的 NHT absolute center 雖然聲線柔和舒服兼定位也不俗，不過就欠缺 AV 需要既澎湃同分析力，呢兩個禮拜就參考左 ching 既意見出去親身感受一下幾個牌子，在配合個人口味 + 現有一對前置的大前提下，用左一星期再思考結果選定答案，一個比較冷門的選擇 -- Mordaunt-Short Performance 5C。

與其話冷門，不如話違忘。根據該公司網頁同埋 Yuppi 兄補充既資料，Mordaunt-Short係英國高級喇叭品牌，創立於1967年，Performance 系列就係前B&W設計師 Graeme Foy 想 Mordaunt-Short 靠此產品翻身更上一層樓之作，英國CHOICE雜誌評為繼鋁帶高音後最具突破性的設計，香港雜誌跟音響迷則評為最平價的HI-END頂級喇叭，現在馬仔 Reference 級既 amp 廠方都係用 Performance 6 作為開發參考。好喇，用左咁多口水介紹自己既取向同M-S既歷史，入正題 - 開箱報告!

真係好耐未試過要身水身汗，仲要著住裇衫西褲去抬隻十幾kg(連箱)，大過三份一個鞋櫃既喇叭返屋企…

流線型設計配黑色鋼琴漆面

ATT高音背後既設計

原有位置放唔入P5C，唯有暫放上櫃頂，等六月搬屋後再安排擺位

試播Eason 演唱會，蒲開聲已經有驚喜，最搞笑是老細從廁所走出來話: 「把聲真係好似 Eason 響個廳開咪唱緊!」第一次開聲，P5C在小弟現有器材下配合得總算融合，M-S 個性不偏不倚，還原自然，不禁讓我順讚一下當代Pioneer 聲調方面好有進步，起初有擔心LX83推會不會好薄，不過聽過一首又接一首，已經投入得跟著去唱...。Eason 人聲細緻清晰，空氣感強，密度充足，所以一出聲會令身在廁所既老婆(冇關門)都聽到效果。冇開十仔之下，鼓聲低音結實有力，有一下子以為開了十仔，確實，我這次升級其中目的是量感，基本保住人聲表現就可以了，現在卻是第一個驚喜。

接著試播 Hellboy II，有一幕王子揮舞長矛，劍尖表現出鋒芒銳利的質感，ATT 高音在分頻處理下真不簡單，既不抑壓高頻仍表現出中高頻的順滑，且非常細緻；在打鬥場面中做到拳拳到肉，乾淨利落；爆破場面中的沖擊震撼，量感充足，這幾方面足已令我再沒有多求。

完成二項測試後特意跑了一次MCACC (keep speaker system)，完成後的 EQ 表現不合理想，上下波幅較多，於是再人手平整一下，再在中置加上0.5db，出來的效果大致滿意，最後來了試播 Black Swan。片中有一幕幕的管弦樂曲扣人心弦，帶起整套戲劇高潮，尤以尾段樂曲最為澎湃，當下係想像不到整個音場覆蓋得如此緊密又如此寬大，我訂了還未到貨用作 front height 的 genie 402在這情況下還有更大作用嗎?? 真想像不到 P5C 在這個情景下竟能和我一對細少 Tablette 配合得如此緊密，這亦是我最感動的一刻…

本來小弟家裡器材只屬半咸淡組合，唔算得上乘，只係想各方面取得平衡，發揮所長。同好多ching 一樣會問相同問題: 睇戲50%，聽歌…%，打機…%，在現今眾多選擇當中，想要靚人聲又不失睇戲feel，如果你既要求同我相若，不妨參考我呢個選擇，可能都帶俾你不一樣的驚喜~!

P.S. 在此要再多謝 Yuppi 兄~