香港精神 - 樂聞音響維修

obee

最近幾個月玩多左 2 聲度，聽某些師兄講訊源係靚聲嘅基本，因為我一直都係用squeezebox 駁 Dac 作為訊源的，心中漸漸起左一個買Cdp / cdt 嘅念頭...

然後慢慢做多些研究，發現cdpro2 光頭係一個好出名好靚嘅光頭型號，但又見原來用呢個頭嘅機都幾貴下，睇下睇下就下定決心要買一部二手 cdt／cdp , 心中已經有左目標嘅幾隻，只係等待有人放。你睇到呢度可能會問點解唔買全新？因為錢嘅問題，我自從買左部一手力士，寶華喇叭後，好後悔，因為原來可以二手入平一萬！所以自此我都盡量買二手。

講番部cdt/Cdp, 上月見有人放一個同牌子嘅cdt+Dac, 個賣家建議我買晒，因為佢覺得如果只係駁我用緊嘅 Stello da220 mkii 玩小左 i2s 個介面，我諗下又係，就咁就買左。

obee

好高興咁抬左佢地番屋企，之後就聽下買落嘅cd，wa!原來個分別都幾大 就因為咁，我去多左買cd 同上阿馬信。
直到兩個星期前，部cdt開始出問題，佢會不定期咁自己息機，我都唔知點解，好似某些碟較常發生，但過一陣又無事，初步感覺同光頭無關。但因為都好煩擾，所以我上星期決定揾人維修。

經朋友介紹得知香港有間做音響維修的叫「樂聞」，打個電話初步了解佢地可以幫手睇下，咁我上星期六就抬部cdt去佢地位於石門嘅公司擺低。

到左星期二，師父打俾我問我部機有乜問題，因為佢試唔出，我解釋後佢就話再試下。
再過兩日，師父再打俾我話佢試到啦，仲揾埋點解，報價$800。我始放下心頭大石，因為上星期放低整果時佢話最貴係要換cd頭，果份野要從法國訂，$4千幾，仲要等，唔知要等幾耐。

到左星期五，師父再打俾我話整好晒可取回，於是我今早就去取回家。

obee

今朝上到去門口個師父叫我直入，跟住就係負責我部機維修果位師父接手，佢先駁好部機試俾我睇，一路駁一路同我講：「你呢部係一部最平嘅來路cdpro2 cd 機」，我心諗，都好似係，不過我心中一直有個問題，就係究竟俾少點買個全新嘅DIY (by 高手，唔係自己DIY) 會唔會好點？起碼唔會易壞掛？...
咁我即問佢：其實嘅種機會唔會買d DIY 機用相同光頭會抵玩d 啊？

師父：DIY 野你唔好以為係平d, 如果要做到效果一樣我覺得價錢唔會有大分別。你當去出街打麻雀，有人同你玩，俾d 錢當人工都要，其實就係享受當中嘅過程

我：係

師父：當然，有d 人出嘅 DIY 係可以好過廠機，價錢都會平過廠少少，但玩廠機就係較有二手價值，好似你呢部，當你玩多幾年，放俾二手點都有五千至一萬。

我：明白，咁講番部機，其實係壞乜？

師父：呢部機開關前有一組小電路板，當你插電時佢負責做standby mode,目的只係想你唔會一插電就播，但可能因為電子野老化，佢有漏電情況，當部機需要用大電流（如開始播歌時），佢有機會因為部分元件漏電而自己跳制，因為呢塊野嘅作用就係令部機standby, 只係正常情況下佢係唔會啟動，只係你第一次開機時佢先會閘住唔俾部機開。

師父繼續：呢份電路起初無的，只係廠方後來因為市場反應而加的。我只係換左少少電子元件，好平嘅，三兩蚊。你可能會覺得咁點解要整成800蚊？因為我地做維修係賣一個技能，我依家解釋番個問題原因你就會覺得好簡單，其實我係背後用左好多時間同心機去估計佢可以出問題嘅原因。

我：呢個當然啦！呢d 味叫做經驗囉！

師父：係！我地就係整過好多唔同嘅機，你一講個問題我地心中即刻彈左好多個可能性，然後我地就會逐個逐個可能性去試下，如果係廠方，佢地有對應每部機嘅維修手冊同測試儀器可以好快咁trace 到個出問題嘅地方，而我地就係靠過往嘅經驗去試下試下咁揾出個問題。

我：即係好似買電腦程序咁，好多時找出問題都係靠經驗㗎啦

師父：就係囉，我都有寫assembly 㗎，維修就好似debug 個 program 咁, 要識得落 breakpoint. 呢d 野單睇書係學唔到！

（跟住我地吹多陣我就俾錢走左）

下續

avlam

cdt/Cdp  最好唔好買二手啦 , 其他野就冇所謂  !

tomc

最近幾個月玩多左 2 聲度，聽某些師兄講訊源係靚聲嘅基本，因為我一直都係用squeezebox 駁 Dac 作為訊源的 ...
kenneth_obee 發表於 2012-2-25 12:29

點解連續出三次？內容同主題又無関嘅？

obee

今日同阿師父吹水真係獲益匪淺！聽佢講野能夠感受到佢係一個音響愛好者，唔會當維修只係一份工，而會用心，有熱誠咁做。當我問佢關於部機嘅問題原因，佢會好耐心咁解釋俾我知箇中原因。臨走時仲教我要如何保養部機

阿師父，其實我今天聽完你話收800好似好貴云云，我想應你：你地做維修嘅就好似機器嘅醫生一樣，醫生做個應診都收幾百啦，你切莫睇少自己嘅工作，係我眼中師父你就好似一個醫生一樣。

香港難得仲有d 咁嘅維修人才，仲要咁好服務，真係香港之光

sealteam4

師兄，我都想換CDT，如果你有DAC就可以直接搵CDT唔駛買CDP
而我想換個CDT就難度高D，想要個有個Clock in的，研究中
好像hi-fi產品得d好貴如Esoteric 有
得閒一起交流下，去你度玩下或過來座下
我呢D入門新手需要互毒學習

hutmonkey

師兄，我都想換CDT，如果你有DAC就可以直接搵CDT唔駛買CDP
而我想換個CDT就難度高D，想要個有個Clock in的 ...
sealteam4 發表於 2012-2-25 13:09

ching , 你對usher 應該唔錯呀

Lester

師兄，我都想換CDT，如果你有DAC就可以直接搵CDT唔駛買CDP
而我想換個CDT就難度高D，想要個有個Clock in的 ...
sealteam4 發表於 2012-2-25 13:09

佢個CDT一d都吾平...

sealteam4

ching , 你對usher 應該唔錯呀
hutmonkey 發表於 2012-2-25 13:12

蔗楂價錢聽出燒鵝味道...........鵝only，最多能同貴好多倍比唔輸哂，畢竟只是萬六元貨