大家講講印象最深刻既怪夢係點樣? (綺夢除外)

Billy · 發表於 2012-2-15 21:39

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

本帖最後由 Billy 於 2012-2-15 22:02 編輯

小弟自細就已經成日發一個怪夢:

喺夢境入面, 本來乜野都無; 無人, 無路, 無建築物..... 係一個空盪既黑暗世界 (但依然隱約有少少光線)
身處其中, 本來都無乜野好驚..... 但每次呢個夢, 都一定突然出現好多好巨大既物體 (太暗睇唔到係乜, 只知道好巨大, 而且肯定唔係生物..... 感覺就好似有四五個人咁高既巨石)
呢啲巨型物體, 喺附近不停出現; 望住佢地時, 明明係靜止既......... 但每次眨眼或者望向第二處之後, 都會發覺佢地位置唔同咗, 就好似專門 "吼" 住我唔為意時, 就偷偷地郁動
我開始覺得唔對路, 佢地似乎威脅到我既安全; 於是我就會開始跑............. 但不論我跑去邊, 都會莫名奇妙地有呢啲物體出現喺附近! 而且出現既位置越嚟越接近我!
結果, 就會有一啲貼住我身邊出現; 雖然唔郁, 但感覺就彷彿隨時會壓到我身上! 我於是出手去推, 想推開佢地.... 但佢地好重, 根本推唔郁
望住佢地, 突然會覺得, 佢地好似一時變細咗, 但又一時變大咗; 又大又細..... 大既時候好似隨時壓得死我, 但又突然細粒到好似砂咁完全唔重.......令我頭暈轉向, 唔知自己到底喺邊

通常發夢到呢個地步, 就會醒咗, 發現自己成身大汗
細個時, 試過好多次唔識醒, 一味喺喥大叫..... 係屋企人搖醒我; 有幾次, 醒咗之後, 第二日就病到七彩
屋企人話, 試過要兜巴冚我先識得醒, 而且醒咗之後好似三魂唔見七魄, 完全唔知自己發生乜事

tennishk · 發表於 2012-2-15 22:00

小弟自細就已經成日發一個怪夢:

喺夢境入面, 本來乜野都無; 無人, 無路, 無建築物..... 係一個空盪既黑暗 ...
Billy 發表於 2012-2-15 21:39

最深刻既夢，就係夢見同李嘉欣...，跟住醒左，要入廁所換褲。

Billy · 發表於 2012-2-15 22:02

最深刻既夢，就係夢見同李嘉欣...，跟住醒左，要入廁所換褲。
tennishk 發表於 2012-2-15 22:00

標題已改~

成成 · 發表於 2012-2-16 00:55

本帖最後由成成於 2012-2-16 00:56 編輯

我經常發夢,個個都好深刻,唔知係咪工作壓力大,由其事成日夢見同事
我打低甄子丹兩次,殺死埋樊少皇
變形金剛第四集幾好睇
異形第五集睇咗一半就醒咗
由幾十樓跌落街,落到地仲未醒,不過原來係一啲都唔痛,但有種好特別的感覺,好似浮下浮下咁
同事比人殺死,不過我幫佢報了仇
我同位男同事好恩愛,係我架車廂內攬攬錫錫,但我哋喺個夢度係男女嗰種恩愛,不過唔知邊個係仔邊個係女,錫錫下醒咗
殺死咗四個同事,其中兩個係上司
去美國旅行遇到布斯韋利士,佢好好人,同佢玩咗3日,之後坐車去日本玩咗兩日,再坐車返香港
去咗西伯利亞駕駛破冰潛艇
去咗南斯拉夫,渣住支大炮打坦克
我同同事走去學車,教車師傅話學車要先識換車軚先可以學,我同同事就換車軚,之後個夢醒咗,我再瞓,又繼續發落去,繼續換車軚,差不多換好,個夢又醒咗,我又再瞓過,繼續發返個夢,我換完車軚,師傅話我pass可以學車了,又醒咗,唔可以再瞓,要返工了
鄭秀文係我老婆,佢好愛我,而我同張耀榮好熟,我叫張生比檔期我太太(鄭秀文)開三場演唱會,張生一口就答應,叫我任揀日子,我揀咗4月12-15日紅館開
尖沙咀隔離就係錦繡花園
屋企隻英國短毛貓生咗五隻貓仔,但隻貓係仔仔嚟,都生到仔
939建設銀行升到99蚊
同同事一齊去冰島玩,香港出發,渣咗半個鐘頭車就到,零下廿幾度,感覺好正
太平山山頂有部大型噴雪機,一到冬天就噴人造雪,全香港都落雪
中咗六合彩頭奬,醒咗仲記得6個號碼,照住買不過一個字都唔中
我有幸地去索馬利亞,去任維和部隊工作,而劉德華就係維和部隊支揮官,有機會同劉德華工作
發夢急尿,但一定要知醒,因為真係急尿,一疴就成褲都係尿
仲有好多好多,數之不盡,多數瞓醒都記得,唔通我真係好大壓力