轉貼 港產不打 的一年回顧

命硬好人

原作者 : 港產不打

2011年12月31日

【那些年】正式奪下香港歷年華語電影票房第一位

擊敗維持六年$6128萬的【功夫】

很多人解讀為「台灣電影抬頭，香港電影已死」

但大家又唔睇下其他台灣電影既香港票房

唔計上映院數少既【翻滾吧！阿信】

谷爆宣傳既【賽德克‧巴萊】，兩集合計上映左成個月都唔夠五百萬

改篇幾米同名作品【星空】，上映25日收唔夠四百萬

仲有套食住九把刀個勢原著改編既【殺手歐陽盆栽】，上映兩星期連90萬都冇

証明唔係台灣電影抬頭，只係【那些年】招頭，一齣電影既成功吧了

回顧2011年票房頭三位

第一係$8468萬既【變形金剛3】

第二係$7648萬既【哈利波特7下集】

第三係$6129萬既【那些年】

其實由1993年【侏羅紀公園】6189萬開始

港產片早已死掉，早已被外語片幹掉

翻查香港歷年電影票房

第一【阿凡達】1億7千萬、第二【鐵達尼】1億1千萬、第三【反斗奇兵3】$8873萬

第四【變形金剛3】$8468萬、第五【哈利波特7下集】$7648萬

頭五位都係外語片

我們其實最值得反思既應該係：

華語電影在本土市場被外語片攻陷



不過話說回來

電影不應單純以票房作為唯一成功指標

2011年許鞍華【桃姐】奪得金馬獎最佳導演最佳男主角最佳女主角

葉德嫻更奪得威尼斯電影節最佳女主角

回顧十年，港產片其實不乏獲得國際殊榮揚威海外既佳作

【十月圍城】、【歲月神偷】、【天水圍的日與夜】、【投名狀】、【父子】、【2046】、【花樣年華】、

【放逐】、【黑社會】等等

証明港產片亦有達到國際水準既作品

可惜既係，香港既電影市場

高質素既電影，往往得不到高票房既回報

我們值得反思既應該係：

港產片質素差？還是香港觀眾質素差？



回顧2011年，香港影壇整體票房收入較往年上升

但上升既唔係入場人數，而係票價

最大原因係今年IMAX影院及3D電影流行

票價大幅提升至$95-$120

而正常電影既正場價錢也加價到$55-$75

粗略計算睇一齣戲等於兩三碟飯既價錢

如果以Big Mac Index比較，美國賣USD4，香港只係USD1.9

但票價則和美國當地票價平均USD11-12幾近相同

明顯票價過高，相對消費水平來說，價格並不合理，非常昂貴

當然一切可以用租金高黎解釋

院商可能也非常無奈，搵埋搵埋有七成俾左業主，叫苦連天

That’s why 這就是地產霸權，唐狗你明唔明？



價格走向奢侈化，直接降低觀眾入場意欲

當然好電影一定照樣有人入場，正如【那些年】都唔係3D

但價格奢侈化，只會令普羅大眾更揀擇、更多考慮才肯入場

話題作、大製作就人人追看，其他作品則無人問津

長遠只會造成兩極化既困局，一係大收，一係大蝕

價格奢侈化，直接減少消費人數，萎縮市場

市場越細，投資風險越大，慢慢將電影推向大製作大卡士主流類型來降低風險

逐漸剝削產品多元性及創造性，扼殺小資本製作及新嘗試

越來越少公司夠膽起用新導演新編劇新演員，自然越來越少人入行

慢慢形成人才流失，壟斷，繼而惡性循環

我們值得反思既應該係：

票價是否太高？



回顧2011年話題作

上半年一定係【3D肉蒲團】

有綽頭，首部3D三級片

有卡士，港中日AV艷星共冶一爐

有話題，冇左雷神對波

有宣傳，多謝杜汶澤

三級片都收到4千幾萬

勇奪香港歷年三級片票房第二位，僅輸俾其實唔係真正三級片既【色戒】

雖然睇完會發現好重口味，3D唔係對波而係粒子彈度

親歷其境立體床上戲、3D玲瓏浮突身材既視覺效果原來都係一廂情願

但始終係近年港產片既神話，而且可一不可再



之於下半年，話題作一定係【那些年】

下至小學生，上至退休人士都話有共鳴

拍緊拖既睇左、單身獨男剩女又睇左

中學生平均睇1.7次，大學生平均睇2.1次

影壇失陷，連樂壇都失守，叱吒我最喜愛歌曲都頒埋俾佢

風頭仲勁過想當年【Titanic】！

但平心而論，【那些年】係佳作，但絕對不是神作

佢既成功，某程度上因為佢唔係港產片

如果戲中既對白變晒廣東話

「沈佳儀，我好鐘意你，非常鐘意你，總有一日，我會追到你」

冇香港人會咁講野，又痺又煩，乜能意境都冇晒啦！

只有普通話才有的詩意、台灣才有的人文情懷、香港沒有的天燈及地震情節

港男沒有的長情、港女沒有的台妹氣質

呢d都係港產片欠缺既元素，而且好難學到

論劇本細膩動人，拍攝手法清新，【那些年】其實非常非常普通

爆紅既最大原因，係隔離飯香！

港產片唔係冇青春純真愛情小品

論近年出色佳作首推麥曦茵既【烈日當空】，但又有幾多香港人睇過？

我們值得反思既應該係：

香港人有冇用兩套標準來睇港產片？有冇帶有色眼鏡來睇港產片？



回顧2011年，3D電影氾濫

全年外語片3D既足足廿部

青蜂俠、魔髮奇緣、雷神奇俠、奇鸚嘉年華、森美海底歷險、天神魔煞、魔盜狂潮、綠燈俠、變形金剛3、功夫熊貓2、美國隊長、死神5來了、大白鯊食人夜、翩娜、五月天追夢、三劍俠、丁丁歷險記、天魔戰神、亞瑟少爺救聖誕、踢躂小企鵝2

港產片都有3部，肉蒲團、夢遊、龍門飛甲

當中事後才電腦加工既有幾多部？

當中真正用3D攝影機拍攝既有幾多部？

當中真正拍出3D效果既有幾多部？

當中真正需要3D效果既又有幾多部？

3D只係電影畫面表現技術的一種

現場感提升了，畫面質素提升了，但唔代表電影質素提升

另一方面，IMAX影院越起越多，坐位更闊夠斜更舒適

螢幕更大更近，畫面更清更闊，音響更強更勁

低頻震椅都唔夠，仲有D-Box Motion Chair，甚至玩埋味覺4D

係大家不停追求官能刺激既時侯

我們值得反思既應該係：

電影，除左視覺效果之外，還要什麼？

電影，除左提供娛樂之外，還有什麼？



2011年，港產片進一步萎縮到不足70部

當中和內地合拍既漸左一半

俾港人插到反轉但其實拍得唔差既【鴻門宴】內地收到1.5億

另一齣香港唔多起眼既【白蛇傳說】內地都收到2億

近期被港人忽略既【龍門飛甲】內地狂收3億

【那些年】爆紅，陳妍希柯震東黎香港7次谷能到盡宣傳

勇奪歷年華語票房冠軍，其實都只係六千幾萬

我們值得反思既應該係：

港產片仲要拍俾香港人睇嗎？



近年智能手機、平板電腦越來越普及

加上網絡技術成熟，非法下載越來越容易，質素亦越來越高

大家習慣了所有野都可以下載，什麼也免費

書、報紙、雜誌、音樂、小說、電影、電視、電子遊戲

得來太易，更加不會重視

大家撫心自問

乜能都免費，咁創作人製作人食咩呢？

業界還可以持續發展嗎？

未來還會有具質素既作品嗎？



【那些年】的成功

還有剛剛橫掃國內票房3億既【失戀33天】

都係寫實、地道、生活化既愛情小品

冇特技、冇動作、冇卡士、冇大場面

製作費低，卻得到高回報

一個健康既電影市場，正正需要這樣



期望【那些年】的奇蹟

不單是改變電影人，更改變觀眾

多一點包容，多一點支持

支持低成本製作、獨立製作、小品式故事、新晉導演作品

讓影壇百花齊放，健康成長

Pooh

租貴可以解釋點解香港戲票價格同美國差唔多。但係點解有啲港產藍光碟係外國買仲平過香港呢? 又係地產霸權?

audicargo

原作者 : 港產不打

2011年12月31日

【那些年】正式奪下香港歷年華語電影票房第一位

擊敗維持六年$6128萬 ...
命硬好人 發表於 2012-1-4 18:08

近年智能手機、平板電腦越來越普及

加上網絡技術成熟，非法下載越來越容易，質素亦越來越高

大家習慣了所有野都可以下載，什麼也免費

書、報紙、雜誌、音樂、小說、電影、電視、電子遊戲

得來太易，更加不會重視

大家撫心自問

乜能都免費，咁創作人製作人食咩呢？

業界還可以持續發展嗎？

未來還會有具質素既作品嗎？

非常同意師兄講法.

tsuiyuen

看見ching的轉貼，不禁有所感觸，分享愚見～
港片的萎縮都唔係這三兩年的事，究竟係制片人還是觀眾的問題呢？
龍門飛甲未即係三劍俠咁，不過一個中一個西，點解D人會去睇三劍俠多？宣傳？還是對港片失去信心？

就我而言，太多港片故事都好求其，無乜深度，橋段千篇一律，唔夠細緻感人，再唔係就將一個成功例子無限復製，又或者sell下偶像，賣弄下身材咁；
講玩大制作，玩特技，又唔夠人家hollywood黎，香港地點會比你封路玩爆破，夜晚流流拍都比人投訴到你傻；
我無做過乜野調查，但我估計外地都不少二三流的電影，
但賣得黎香港上畫的，都應該經過一輪選擇吧，質數自然有返咁上下，信心自然會大一點；
除此之外，講包裝宣傳港片都係輸一皮，trailer好多時都引唔起去睇的意慾，宣傳又唔夠，
好多時套片揚威海外，港人先留意到～

這就係我一般的觀感，變相就係有片上，西片就會好快咁去睇左先，睇完可能都“媽媽”聲，但港片就。。等下影評先；其實香港人好多都有崇洋媚華的心態，回歸咁耐到現在都係如是，港產國產野，唔好理咁多，質疑左先，未審先打八十大板～

加上戲票真係唔平，出開去睇戲，零食，晚飯少不了，兩個人唔睇3D又或豪華戲院閒閒地都二百幾元，如果睇iMax,3D開支更大，所以對戲的質數要求更多，主要都係觀能上的要求啦～～對於那些小品，變相買碟屋企慢慢享受更為化算～

至於非法下載，我同意影響十分之大，
但唔通外國片就無人下載？她們的片房都仍然咁強勁bor～
這是否要反思一下，唔好下下都搵老翻為失敗的借口呢？

P.S.至今為止，我覺得最感人的係劉青雲的新不了情。。。只係我個人的睇法吧～～
     仲有就係港片當然有精品啦～～

命硬好人

看見ching的轉貼，不禁有所感觸，分享愚見～
港片的萎縮都唔係這三兩年的事，究竟係制片人還是觀眾的問題呢 ...
tsuiyuen 發表於 2012-1-5 09:02

非法下載當然會影響到一部份觀眾入場意欲,
但一些好片如 <那些年>, <變3> 票房收入都好理想!

qqsnk

個人認為, 港產片盲目國內化係死症.....
自己去年入戲院睇戲都有約30幾次, 但入場睇嘅港產片只有4部...<竊聽2>, <單身男女> & <奪命金>! 仲有一套有免費飛嘅<最強喜事>......

mrlittlejacky

最死係青黃不接,問心啦,星爺,牛華,李連杰,發哥佢地你睇左幾多年?到今日依然仲睇緊佢地,
拍o個班又係.
但上黎o個班事實係唔得,接唔住, 無計啦~

teddy

港産片滅亡其實都係遲早既事，因為年青人/90后根本對港産片不屑一顧（無論新港片或舊港片也是），另一方面，港式文化的影響力已經逐步息微，內地的語言及文化開始逐步融入香港，所以相信10年后，一定再沒有港産片。

haliruya

港產片其實変左做國產姐,好多香港猛人過晒去大陸拍片,大陸市場大,為搵食,呢個係必然的!