[劇透]《STAND BY ME: 多啦A夢》影評︰留給這世上我最愛的人

粗人敵卡

睇完呢套CG多啦A夢，諗起羅文首《留給這世上我最愛的人》。自細個嗰陣，都好想有個多啦A夢嚟幫吓自己，
到咗依家反而無咗呢個諗法。好慶幸自己之前有睇過林保全先生配音嘅叮噹(即係多啦A夢)，呢套多啦A夢以戲
論戲嚟講，都算製作精良，有笑有淚。

以前睇動畫都係睇CCTXB同香港良心播嘅粵語配音嘅動畫，《遊戲王》、《數碼暴龍》等等，到咗有字幕組翻譯
日本電視台播嘅動畫，自己就睇日文配音動畫，J2粵語配音就無乜去聽，而多啦A夢叫做有得睇就睇吓粵語配音咁。
講番套戲，開頭大雄算係一個懶蟲，只為自己著想。考試測驗寧願睇漫畫瞓覺，都唔肯讀書。到咗多啦A夢嚟咗，
我覺得大雄好似仲衰格咁，成日借住多啦A夢嘅法寶嚟整鬼人哋，靠記憶麵包嚟「出貓」…
到咗大雄要銘印蛋話要令靜香永遠愛上自己(其實咁樣摧毀人哋自由意志，都幾自私…)，之後失敗咗，先話要靠自己，
唔再用多啦A夢嘅法寶。

講起大雄嘅最愛靜兒(靜香)，喺套戲我覺得佢對大雄真係太好，仲好過大雄阿媽…最令小弟呆咗係大雄飲咗支會令所有人
憎佢嘅法寶，靜香竟然仲肯去接近佢嗰幕…大雄佢咁嘅款襯唔襯得起佢 ，牙擦仔同技安(唔係劉鎮偉)反而
刻畫得幾表面化，靜香刻畫得好過呢兩位仁兄。

成套嘢最感動應該係多啦A夢幫大雄改變大雄自己嘅未來後，佢話要回到自己本來嘅時空嗰幕。佢睇住大雄用竹蜻蜓飛
嚟飛去嗰幕，多啦A夢不斷數落大雄，睇到小弟有少少眼濕濕…到咗大雄唔再靠多啦A夢法寶，要同技安隻抽嗰幕，小弟
先覺得大雄真係可以自己照顧自己，唔再係唔係都叫多啦A夢用法寶話要「報仇」 。但係小弟覺得套戲有不足
之處，係多啦A夢走咗之後嗰段劇情，覺得將大雄喺多啦A夢走嗰幕講嘅嘢完全破壞哂，又話唔再靠多啦A夢

最後講吓配多啦A夢嘅林保全先生，一聽到佢把聲，細個睇多啦A夢(叮噹)嘅回憶翻哂嚟，都唔知叮噹成就咗林保全先生，
定係林保全先生演活咗叮噹呢個角色。記得之前去日本旅行去多啦A夢記念館，聽到日文配音版個多啦A夢把聲成把細路
聲咁…好唔慣

總括嚟講，鍾意睇叮噹嘅，建議睇粵語配音版，唔係話日文版唔好，始終睇叮噹都係聽慣粵語配音…
林保全先生，R.I.P.

jayjay

pong8833

粗人敵卡

最可惜嘅係套戲無出多啦美（叮嚀）