我在東京大阪鳩烏的日子 - 二手CD黑膠篇

ykluk · 發表於 2015-7-23 16:33

本帖最後由 ykluk 於 2015-7-24 11:24 編輯

先聲明:
小弟唔係日本達人, 只係純分享個人鳩烏經歷, 如有任何錯漏唔好打頭~~!!
喺日本本地鳩烏既保養多數唔會包埋香港, 如果有任何擔心都係建議同本港代理購買~~!!

前言

喺幾年前小弟曾經寫過"我在首爾的日子":

我在首爾的日子 - CD篇
http://post76.hk/forum.php?mod=viewthread&tid=88503

我在首爾的日子 - Bluray篇
http://post76.hk/forum.php?mod=viewthread&tid=88499

其實都有諗過將每次既鳩烏經歷寫出嚟比大家分享, 不過小弟一放完假就要即返工做到死死下, 拖吓拖吓都無寫, 但有時又會有朋友問點樣去東京大阪或日本其他地方鳩烏, 唯有一次過寫晒佢, 唔使次次答~~!!

全日本中古CD篇

全新碟小弟就唔多寫喇, 基本上去啲大百貨公司裡面既tower record或者Tsutaya都會搵到, 有啲Tsutaya會24小時營業或者開到半夜1-2點, 有啲Tsutaya都會有中古CD, 有時會有啲特價既, 但可遇不可求囉~~ 想知詳細可以喺佢個網search附近鋪頭睇吓:
http://tsutaya.tsite.jp/

二手CD喺日本就比較易搵, 全日本都有超多分店既book.off就最易搵:
http://www.bookoff.co.jp/

就算去到當地先上網搵都唔難, 佢個網可以search店鋪位置, 仲會講埋啲鋪頭係賣乜(因為有啲係賣書賣衫賣手袋), 見到有"CD/DVD/ブルーレイ/ゲーム"既就啱喇~~!! 甚至有時喺旺區同老婆行行吓街舉頭望吓啲大廈都有可能見到佢招牌~~!! 小弟就試過行行吓老婆突然話要去大丸shopping, 小弟就襯呢個小空檔約佢一個鐘後大丸女裝部B字頭鋪頭等(基本上實有B字頭blue label鋪), 我就靠手機搵就近book.off去望吓碟~~!!

點解會推介book.off呢? 其實全日本都有好多"中古CD/DVD"上樓鋪, 不過小弟貪book.off夠多夠大, 咁買返嚟既二手CD質素都唔錯, 而佢既CD通常由300日圓或500日圓或者好啲質素既就會另外標價, 分類就易睇, 搵日本碟既就"邦樂", 外國碟就"洋樂", 而大部份碟都以歌手名排, 只要大家記住自己想搵既碟歌手日本平假名點寫就得(洋樂就分英文字母)~~!!

所以小弟宜家去book.off搵碟都唔會用太多時間, 揀定幾個歌手去搵齊唔同價錢既碟, 揀齊然後結算時可以check埋碟, OK仲可以碌卡, 正~~!!

東京中古黑膠篇

近期小弟愛上膠膠, 當然唔少得介紹買中古膠膠~~!!

買中古膠其實要用既時間比CD係多好多好多好多, 原因係同樣都有中古CD同膠賣, 但賣CD就會排晒名排晒字母好整齊易搵, 但膠就散亂好多, 最多話你知一大堆嘢叫jazz但無字母分, 又無脊位睇到係咩碟, 下下要抽出嚟睇.....除非超級大熱既好似The Beatles咁就可能會放埋一堆, 但其他就....我估就算你搵職員幫你都未必搵到....

以小弟經驗, 一間大既中古黑膠鋪可以有幾千過萬隻膠喺度(例如diskunion渋谷中古センター), 基本上小弟用2-3粒鐘都只可以走馬看花咁試搵重點, 閒閒地用一整日都未必行得晒一間鋪~~!! 所以集中出擊先係上策, 而呢個策略必定係以老婆有街好行既地方著手, 所以小弟就揀選新宿或者涉谷出擊~~!!

首先mark定呢2間鋪:

diskunion
http://diskunion.net/

RECOfan
http://www.recofan.co.jp/

因為呢2間鋪都有分店喺涉谷又有大有細有分賣中古/JAZZ/SOUL等等, 你可以掃完一間行去第二間都係2-3分鐘就搞掂, 而周邊既百貨公司等等(叫老婆行埋去表參道再落原宿, 咁應該成日都唔會追你走~~!!)應該可以比到老婆行一個上午或下午, 咁就掂晒~~!! {:9_426:}

注意: 東京新宿呢間中古既diskunion隔離同上一層都有硬嘢買, 睇CD同膠之餘都可以鳩烏埋~~!!

http://diskunion.net/shop/ct/shinjuku_used

記住日本收得既二手膠質素其實都OK, 但結帳前都係check碟穩陣, 同埋可以試問佢有無新既外套送比你~~!!

另外一間小弟介紹既就係上野蓄晃堂, 鋪頭細細只係有位婆婆主理, 但因為小弟去襯東京都好鍾意住上野, 貪佢周邊多嘢睇多嘢食近街市又近多慶屋, 每次行完街返上野又可以行去蓄晃堂望望~~!!

上野蓄晃堂
地圖: https://goo.gl/maps/6WmIS

蓄晃堂唔算多碟, 不過都有唔少我哋認識既邦樂歌手, 同有啲日本出既洋樂膠甚至見過有電影soundtrack膠, 唔錯~~!!

大阪中古CD篇

除咗book.off, 如果大家有時間去行吓大阪日本橋堺筋附近, 建議可以去地鐵惠美須町站, 跟大馬路行去日本橋站(當然調轉行都得), 呢度就叫做大阪秋葉原, 條馬路2邊都有好多中古CD鋪, 規模比book.off可能差啲, 但小弟都試過搵到嘢執~~!!

京都CD及膠膠篇

京都最繁榮既四条同河原町好多人都覺得好值得去, 尤其是新京極同好多嘢食既先斗町都一定會去, 去完先斗町食完嘢可以介紹呢間叫JEUGIA既鋪頭, 有新CD同膠膠, 樓下仲有一層都有啲中古膠可以睇, 去唔到大鋪去呢啲鋪止吓渴都得~~!!

JEUGIA [ Basic.]
http://music.jeugia.co.jp/
地圖:https://goo.gl/maps/VBd5P

沖繩中古CD及膠膠篇

去沖繩通常都無諗住會有咩HIFI硬件嘢睇, 反而都有幾間book.off同中古CD鋪, 間間都好大好似outlet咁, 你又可以渣車有得免費泊車入去行, 特別推介以下呢間, 除咗有以上特點, 仲要24小時無休, 除咗CD/膠膠仲有figure仲有好多奇怪嘢, 連老婆都會行得開心~~!!

マンガ倉庫那霸店
http://www.mangasouko-naha.jp/
地圖:https://goo.gl/maps/NlgM9

寫住咁多先, 又要趕吓工做嘢, 如果大家有其他建議歡迎提供~~!! 下次搵時間寫埋硬件嘢~~!!

多謝觀看~~!!