不過，如果畀著我，我就會揀一個比較保守、簡潔嘅方案。
下面五隻同天花四隻，我都會揀呢款 JBL XD6，全部掛牆，當大型衛星喇叭咁玩。
唔好問我 XD5 得唔得，爭嗰兩舊水，我一定唔會揀。始終 5 吋低音同 6.5 吋低音，低頻表現都有一定差距，我覺得唔值得為咗慳少少而犧牲。
四個角就配四隻 Taulssen 淘聲 T12 超低音。
由於你部 AV 擴音機可能只有兩組超低音輸出，我會前面兩隻手拖手當一路，後面兩隻手拖手又當一路。
不過你住 Apartment，唔係獨立屋，始終要考慮畀人投訴嘅風險。
有四隻超低音嘅好處，就係彈性夠大。想過癮嘅時候，四隻一齊盡情發揮；如果夜深要自律，或者曾經畀人投訴，就可以熄咗對角前後各一隻，只開兩隻。
如果只係煲劇，其實開一隻都已經夠，甚至唔開超低音都冇問題。 如果打算買咁大棚喇叭，我知道樓主嘅原意，都係想夠勁，擺喺屋企又有體面。
不過，如果用 Yamaha 去推，要做到真正夠勁，未必會比將低頻分工交畀四隻超低音更有優勢。
至於講體面，呢款喇叭個外形，擺明老翻 Klipsch（傑士）嘅設計。我自己就反而覺得有少少形象低落添！
咁樣嘅話，我反而寧願清一色擺九隻 JBL，整體風格一致，我自己會更加鍾意。
頁:
1
[2]