【AV與我】10年前後
本帖最後由 白影@G 於 2023-11-25 12:15 編輯【AV與我 十年前後】
如果因睇標題以為講緊男女浪漫動作片而入嚟，抱歉了，我係講緊影音。以前喺香港，一開口講英文，啲人都會問我邊度讀完書返嚟，我會講我只係個土長土長嘅香港人。於是佢地就會問我啲英文邊度學返嚟，其實有段故…
我老豆係個賓佬，生前喺酒吧同夜總會度彈結他，有時會唱埋。好細嗰時，佢仲會帶埋我返工，我就係後台嘅休息室度做功課同瞓覺。亦都可能因為咁，我大咗之後對音質都有啲要求，始終自細聽現場。
由於佢夜晚返工，朝早瞓覺，其實我地無乜交流。佢喺我中一時被車撞死，仲要爆頭，聽講救護員即場宣布死亡，諗深一層，亦都係點解我遲遲都未學車嘅原因。
其實佢走之前已有幾年無一齊住，我對佢嘅記憶其實唔太多。其中一樣最有印象就係差唔多每個周末，佢會帶我去沙田UA 6睇戲。細細個就成日睇大螢幕，沉醉喺光影與聲效嘅夢幻世界，埋下日後誤墮影音毒海嘅伏線。嗰時大熱嘅都係荷里活片，亦都係咁樣嘅原因，我滿口美式發音，嚟到英國後就更加明顯。
後生時啱啱出嚟做野，收入好低，同企鵝過住月光族嘅日子，唔知係咪因為我鍾意睇戲，但我地經常去戲院睇戲。我地拍拖嗰陣，好多時間都花喺戲院，以及張床度，哈哈。後嚟到了細路出世，無得好似以前咁拍拖睇戲，於是正式萌生喺屋企整個家庭影院，喺屋企自己睇。
喺寸金尺土嘅香港地，要整個家庭影院又談何容易，喺香港地玩影音，以前有個師兄講得好，根本係環境鬥士。於是花了差不多一年時間去學，去睇資料，最重要喺不斷去聽唔同嘅組合。友誠同旺角一帶嘅商廈變成我收工後最鍾意去嘅地方。我又仲意寫野，於是會係影音討論區度寫聽後感想，慢慢啲人見我好似識聽野，就請我去佢地度幫下耳。有時我知道某巴打有套新野，我又會主動去問下可否家訪。
經過成年嘅摸索，加上要迎合企鵝嘅要求，最終決定跳過入門級的5.1套裝家庭影院，而直接買AV receiver再配喇叭。企鵝要求一啲都唔低，睇佢揀老公就知啦！佢每次陪我去友誠都會彈啲聲好刺耳，簡單以音響術語嚟講，佢偏愛厚、慢、暖嘅音質。所以最後我洗咗當時兩個月嘅人工，買了馬蘭士SR 6004，再配二手網站搵到嘅英國老牌子Celestion嘅座地 F3 喇叭，再加埋支SVS郵筒，加埋二手嘅三洋720P投影及80‘ IS幕。成套野睇演唱會好正，睇戲就好舒服囉（舒服絕對唔係爆戲時應該有嘅形容詞），不過要過到屋企嘅海關，妥協係必須嘅。
自己有套野時，更加有師兄會借線借器材比我，叫我試下再寫評語。我老婆當年成日講，我可能係睇Batman同功夫熊貓最多嘅人，因每次試野，我嗰幾幕係不斷咁翻睇翻聽。不過當年，講緊十幾年前了，有啲年少氣盛，又覺得筆鋒要尖銳，有時寫嘅評語都幾過份，結果有次真係得罪咗人，喺討論區中某版主，結果帳號被封，年幾以嚟嘅評測文章付諸東流，之後亦絕跡於香港嘅業餘影音界。
正常嘅影音友都會隔一年半載就升級，但我套野最少十年無變過，很神奇吧，對於曾經不斷試新野，寫評論嘅影音友，竟然接受到十年無升級。有小朋友係我屋企有家庭影院嘅原因，無得升級都係因為佢地。對坐地喇叭都唔知比佢地撞跌幾多次，個盤又試過篤凹過。係無得學星爺喺套戲度咁話篤一野無咗幾皮，但個心都痛到爆。事後企鵝講返，我當時係死老豆樣。
有日聽聽下覺得一面啲聲暗咗，睇過啲設定又無問題，啲蕉頭又無氧化，百思不得其解時，郁一郁隻喇叭，有聲嘅？ 結果發現唔知何仔定阿女，將啲積木由背脊個氣孔掉入去，於是打消哂原本已睇好想升級嘅野，同自己講的啲細路大啲先再算。
結果，原來係十年之後，嚟到英國後。睇咗好多評測，依家比當年更方便，仲可以上YouTube 度聽AB test，當然唔會及現場聽，不過啲人用哂專業咪去收音。所以只要用上靚少少嘅headphone去聽條片，其實都會聽得出大概嘅音質同隻喇叭嘅性格同定位。
最後都係馬蘭士，由SR 6004，跳到cinema 50（應該算喺當年嘅7千系列？）有無連跳4代？至於Player，估唔到十年之後都仲係P記稱霸，當年仲有Oppo，不過今時唔同往日，我依家盡量都唔買大陸野。所以即使勁多評測話海信出嘅UST性價比一流，我都係買了其他牌子，係個美國牌子，雖然都係MIC架啦，不過評測結果好好，啲數據好靚。我再配個ALR幕梗幕，不過仲未到。
仲差喇叭，原本想買B&W嘅入門版603配606，607，因為減價，但S2聽完唔啱口味，一啲都唔似當年認識嘅B&W。S3無聽，因為超支。既然嚟到英國，考慮緊KEFQ950，配350，因為本土野，平唔少。不過要約期去聽，呢邊啲影音鋪嘅試聽室要約，講明你想試聽咩，佢地就會比個時間你，set 好哂比你聽。等我套野嚟齊哂，Set好哂再寫報告，雖然已唔算係新野，不過都呢部AMP都應該值得寫下。 白影兄你好，當年需然同你冇乜兩句，但見你同某班人討論言詞上經常針鋒相對，諗起都幾好笑，唔好介意我咁講。
其實我依十年都一直有keep住看戲，而器材上都係近一年先有少少改變，例如換了:
av amp denon a1h
加多咗兩對atoms spk改埋擺位
加多3隻subwoofer
轉玩file
感激師兄分享😊 qq1122yq 發表於 2023-11-25 10:37
白影兄你好，當年需然同你冇乜兩句，但見你同某班人討論言詞上經常針鋒相對，諗起都幾好笑，唔好介意我咁講 ...
諗起都幾無謂，不過後生嗰陣大家都難免有啲火。依家人大了，又移埋民，過緊退休生活，啲火都收哂。前排買咗屋，想升級套野，除了睇外國討論區、評測同YouTube ，諗起呢度，於是返嚟睇下啲師兄有咩介紹。你個名好似有啲印象，我地見過定係我聽過你套野呢？ 你部天龍好野嚟，想問下用緊咩低音，MK嗎？Atmos又買了邊隻？ 白影@G 發表於 2023-11-25 11:45
諗起都幾無謂，不過後生嗰陣大家都難免有啲火。依家人大了，又移埋民，過緊退休生活，啲火都收哂。前排買 ...
我同你冇見過冇家訪過，因為記得當時你都好惹火，所以當時只看而不回
我全套spk都係Dail ikon系列，而subwoofer現用6隻：
MK MX250
KK MX5000 MK3
SVS PC13U
TANNOY Arena TS-300
ELAC SUB3030
STARKE SUB35V
全系統布局7.6.6 qq1122yq 發表於 2023-11-25 11:55
我同你冇見過冇家訪過，因為記得當時你都好惹火，所以當時只看而不回
我全套spk都係Dail ikon系列，而sub ...
唔怪得個名咁熟口面，希望當年我嘅傲慢同自大無得罪到你吧。講返套野，只係睇set up嘅清單已經知正！咁嘅配搭，基本上只要隔幾時換部有新解碼嘅AV receiver就可以。我支SVS都仲喺度，新系統到時都會用埋，不過仲未諗掂用咩喇叭，要聽下先知，但呢邊去影音鋪都幾大成本，要揸車過去，之後又要約好。又只會聽到幾對。唔似喺香港嗰陣，行一轉旺角，基本上乜野新野都聽到。 白影@G 發表於 2023-11-25 12:05
唔怪得個名咁熟口面，希望當年我嘅傲慢同自大無得罪到你吧。講返套野，只係睇set up嘅清單已經知正！咁嘅 ...
人稱我齙牙珍或珍姐、Q姐。。。{:1_254:}
而我記得你前身叫white shadow，之後改叫白影
你冇得罪過我，況且我認為上網討論交流，只是提出個人觀點，喜好各有不同，不算是得唔得罪的問題 qq1122yq 發表於 2023-11-25 12:12
人稱我齙牙珍或珍姐、Q姐。。。
而我記得你前身叫white shadow，之後改叫白影
你冇得罪過我， ...
好似同你食過飯，一大班人。估唔到事隔十年，又喺同一個討論區，傾影音啦。咁就十年，我都退埋休，日日做煮飯公。 qq1122yq 發表於 2023-11-25 11:55
我同你冇見過冇家訪過，因為記得當時你都好惹火，所以當時只看而不回
我全套spk都係Dail ikon系列，而sub ...
6 隻 SUB！瞳孔都放大！！！！ 本帖最後由 qq1122yq 於 2023-11-25 12:48 編輯
白影@G 發表於 2023-11-25 12:19
好似同你食過飯，一大班人。估唔到事隔十年，又喺同一個討論區，傾影音啦。咁就十年，我都退埋休，日日做 ...
有冇食過飯真係唔記得啦，但如果冇記錯你最後出現應該係隔離台， 現在隔離台都已經變咗做鬼城，以前啲版主都 走了， 都係拜汽水人領導有方所賜！
點都好都唔想再提嚿屎，敏感話題，費事又嘢起爭端
開心玩影音先係最重要