Bose 900 開箱及用家分享
本帖最後由 yuppi 於 2023-5-16 10:04 編輯玩咗呢件嘢都差唔多兩個星期，眼見都冇乜人分享使用心得，趁有啲時間講下佢😅
成套系統總共有四箱
其中呢箱嘢最平亦都係最肉赤，千幾蚊一對腳㗎真係幾貴，如果嫌貴可以買淘寶貨五舊水人仔，或者去price.com買水貨係行貨嘅七折，不過好奇怪佢竟然跟兩件配件，一支螺絲批同埋一塊眼鏡布，塊眼鏡布就真係好實用，因為成套嘢掂下都會有手指模，又容易黐塵，呢塊嘢真係可以除油除塵幾方便，但係反而條bar同埋個重低音都冇跟🤦🏻♂️
成套系統外型我最滿意就係隻超低音，外國有用家諗到點用cable接駁返自己現有嘅超低音，不過因為我係鍾意呢隻超低音所以冇去深入了解，有興趣嘅可以自己去搵下。
後置喇叭揀佢嘅原因因為佢係360度發聲，唔使再調較角度，不過hairline電鍍黑色鋁隻手鞋少少都驚刮花，如果再揀多次我會買返銀色，另外由於佢係用喇叭線，買咗唔啱聽嘅又可以淨係用佢個接收器同埋amp，用返自己原有嘅後置喇叭
開完箱切好曬之後第一件事就係要download 個 Bose music apps，之後一插電佢就要你 set wifi，set 完之後你唔好諗住有得玩，因為佢要你等半個鐘頭做更新😖
搞完一大輪之後就要響個apps入面加反重低音同埋後置喇叭，之後就要做auto EQ。值得一讚 Bose 個 ADAPTiQ 係以人為本，以你平時坐嘅皇帝位調教 EQ，坊間有好多 Soundbar 都係冇理到你坐邊，佢有佢教你有你坐，冇記錯 soundbar 目前只有 Ambeo 同 Bose 係用呢種貼心同人性化嘅調教。
強烈建議 ADAPTiQ 一定要開，未開之前聲音比較鬆喐矇同埋吾離箱，其實一條定價成皮嘢嘅900 呢個功能估計佢都收咗你一千蚊😅
做完 Auto EQ 之後就要開始諗下用唔用對話模式：
開：口型比較大同埋多咗口水聲，中置聲道比較離箱
關：超低頻及包圍感比較豐滿
開頭唔開真係睇個人嗜好，我就選擇唔開
諗完之後如果有買超低音同埋後之就要攞定個音壓計同埋準備 test tone 去微調所有聲道，記得首先要響apps度關咗個重低音去調教其餘嗰七個聲道先，因為個重低音會幫助每一個聲道發聲，最後先至開返重低音量度，記住因為有註波問題，重低音個音壓係要畀其他聲道高3至6個dB，視乎自己個人好味。
期間你會發現冇開重低音但係去到重低音個 channel Test tone 一樣有差唔多音壓，因為部分重低音係會由soundbar自己出聲。
記得每次搬位都要做以下呢幾個步驟：
所有channel歸零>ADAPTiQ>微調每聲道音壓
如果屋企冇音壓計而梳化又係靠牆嘅，可以參考我下面嘅數據，再按自己口味微調一下就可以。
做曬呢一咋嘢就可以開始欣賞電影💪
音效方面之前呢度都有評測所以唔會點講太多，只可以話Bose嘅長處就係音質，同我以前條q90r比較就等於你玩開日本機轉玩鬼佬機一樣，整體嚟講q90r有家庭影院嘅效果，900就似用緊一套家庭影院。
反而我想集中講下幾多人都關注嘅播放dts嘅效果：
本身呢條bar係唔support dts解碼，要睇dts 嘅電影首先要將影碟機個hdmi output set 做自動，之後再要響電視機hdmi pass through 熄咗dts 嘅output，咁你部碟機每次過放dts嘅時候就會自動變成Lpcm 5.1，做咗呢兩個動作咁你就可以睇dts嘅碟。
我自己本身都懷疑咁樣轉換法會唔會好差，所以都用咗三套戲佢比較。
第一套就係冰雪奇緣入面嘅let it go，首先用D+入面嘅DD+ atmos 去比較：
D+
動態比較高，樣樣都有但係任何嘢都係點到即止
Dts 7.1 > Lpcm 5.1
一開聲好明顯聲音密度贏曬，前後連貫性好強，樣樣嘢都好埋身同埋好大件，空間感方面同D+打和，估計係 900 嘅 ture space 發揮到幫助。
第二套就係絕世天書
Dts 5.1 > Lpcm 5.1
用咗喺條街度槍戰嗰一幕，一開聲空間感已經大個以前我嗰套 kell 7.1，感覺良好只係低音唔夠我以前嗰隻雷神之鎚潛得咁深，不過冇計我以前嗰隻重低音已經貴過曬呢套嘢
第三套就係U-571
Dts 5.1 > Lpcm 5.1
用咗揼深水炸彈嗰段，試佢嘅原因睇下個控制力，響連續重低音環境之下其他聲音同音場都冇乜點亂，叫做合格收貨
Dts-X 方面我只有一隻碟嘅file，冇乜比較感覺上係冇乜問題
試完呢咋嘢都叫做放下心頭大石，解唔到dts又唔可以話有乜嘢大損失，可以放心用。
講完dts效果又返返嚟講吓套900，其實好多佢標榜嘅所謂優點在我立場就係缺點，例如冇display下下要用手機apps去睇，仲要行atmos嗰陣唔知行緊DD+定係 TUREHD，在於我呢啲av友嚟講就真係麻q煩，吓吓要攞住部手機去睇戲，玻璃面嘅設計更加見到想死，掂下都要清潔，耐咗又要抹塵，真係要嗌救命。
另外佢嘅電源同步同埋語音助理唔知係咪地區問題係用唔到，如果其他師兄知道有乜嘢方法用到麻煩通知一下🙏
另外一個好多人講嘅煲水聲問題，呢個係因為外來wi-fi訊號幹擾所致，我屋企wi-fi訊號叫做比較乾淨，之前用v6版本firmware 一日會有兩三次煲水聲，之後update咗 V7版本firmware 之後已經再冇發生，建議大家去update跟住做一次 ADAPTiQ，希望能夠改善到，如果真係唔得就要搵地方搬圍或者唔好響附近用手機
穩定性同兼容性
穩定性嚟講佢畀我以前用嘅q90r好好多，以前用q90r會週不時有輕微斷音，時間好短唔影響觀賞心態但係就硬係爭緊啲咁，900就真係冇呢個情況
兼容性方面我就奶咗嘢，eARC係守尾門，好多時就係最被影響嗰個，以前我條q90r試過畀部卡拉ok機ko咗，有佢冇我，一插部機就傻曬，結果最後要換卡拉ok機
今次900就同我部老爺 Oppo 103D唔係咁啱傾，每次重新開 Oppo 就傾唔到計，解決方法不外乎重新開eARC，重新開電視或者reset 900呢三個方法，其實買機之前都去showroom睇過，亦知道bose showroom係用sony電視機，知道900號sony電視機夾到先至買，但係千算萬算漏咗部老爺Oppo ，仲要已經停咗產冇可能再有update firmware，所以呢個問題可能要等我部影碟機瓜柴換過部新嘅先至解決到。
好在我絕大多數時間都係睇串流，所以900吾夾103D都唔算話大問題。
更新：由老爺機轉103D轉成老爺機203已經解決問題，Atmos、DTS 已經可以聽哂。
配件方面，因為apps可以隨時熄咗重低音同埋後置，所以可以揀兩分享一下效果係點：
假設900加重低音加surround係100分
一條900係有60分
整個音場好似係一個半球體緊包住你前面同埋左右，效果係有嘅但係冇實體喇叭咁明顯
900加surround係70分
整個音場會移後一兩尺，令你覺得又一個半球體變成一個球體
900加重低音係80分
效果會比淨係加surround好，個超低音會包圍住你，另外唔知點解左右surround效果會比淨係一條900明顯好多
如果預算有限就建議先買900同埋超低音，仲有記得千祈唔好買細嗰隻超低音，唔係教你哋嘥錢，反而係想你哋慳錢，要知道呢一類無線超低音基本上淨係support同牌子系統，冇乜嘢resell value，細嗰隻超低音只不過五寸多少少，100w都冇，個單元比一般書架喇叭仲要細，基本上都唔可以叫做超低音，只係心理上畀到你安慰，將來想upgrade只能夠賤賣，買佢不如慳返啲錢好過。
不過值得一讚就係bose嘅產品週期好長，大嗰隻超低音出咗七年以上都仲係現役產品，可能我過幾年upgrade都淨係換條bar就可以繼續用，真係可以貴買平用😅
結論：
轉咗900之後係有好大改善，但係畀多一倍價錢值唔值就真係見仁見智，只可以話佢出嚟嘅表現係做到同身價影音系統。
數字上嚟講由7.1.4轉做5.1.2係downgrade，但係好多嘢要睇現場環境，叫得7.1.4其實佢嗰隻surround喇叭係畀你做surround back，好似我呢啲梳化貼牆嘅環境其實係將對surround back當surround用，未必有預期效果，例如我以前咁後置喇叭嗰四個 channel 再加埋前面q90r出嘅surround channel 其實撈到好亂，大家揀soundbar之前真係要諗清楚擺位先。
好正呀👍🏻👍🏻👍🏻 Lifestyle 650用家，死守等新型號{:6_125:}
好想要eARC{:6_128:} 本帖最後由 yuppi 於 2023-4-10 08:11 編輯
wong1032003 發表於 2023-4-9 22:33
Lifestyle 650用家，死守等新型號
好想要eARC
不過而家大趨勢都係拆散賣
其實eARC只係睇碟時出 TUREHD 用 好詳細😊😊 好有心及好有誠意的分享
正{:6_193:} 勁正既分享！{:6_128:}{:6_128:} 本帖最後由 Overnite007 於 2023-4-10 14:09 編輯
師兄對這支山巴的描述，如口型，口水聲，離箱感，包圍感，我套5.1.2都未能做到。失落中⋯⋯
我有個同事想買900，看來要強烈推薦給他。 Overnite007 發表於 2023-4-10 14:06
師兄對這支山巴的描述，如口型，口水聲，離箱感，包圍感，我套5.1.2都未能做到。失落中⋯⋯
我有個同事想買 ...
如果初初學玩影音預算有限我就建議佢買三叔990b，行貨唔使八千，水貨六千幾，一套過樣樣都有唔使煩，將來想upgrade成套送畀人都可以。 yuppi 發表於 2023-4-10 14:40
如果初初學玩影音預算有限我就建議佢買三叔990b，行貨唔使八千，水貨六千幾，一套過樣樣都有唔使煩，將來 ...
我估佢預算唔係問題。
呢套900唔係樣樣都有齊嗎？