純粹 Soundbar 試機分享(不是評測)
本帖最後由 yuppi 於 2023-3-27 14:30 編輯本來諗住同開箱文一齊出，不過寫下寫下越寫越多，到最後都係分開兩個post比較好😅
本身用咗三星q90r三年，佢除咗冇auto cal 同埋個重低音比較朦乜力氣，對佢都冇乜大投訴。
雖然話av已經半退休狀態，但係眼見而家啲soundbar好似進步咗好多自己都心思思想upgrade一下
如果喺呢度耐嘅師兄都知道我係安橋嘅fans，亦係鬧佢鬧得最多嗰個，其實影音方面我絕對係sony 死硬派，廿幾年前一部sony AV amp 55 ES 到而家都仲係我最滿意嘅產品，當年佢嘅 virtual multi Rear 技術就算放響而家啲產品都唔會失禮，至於之後點解唔用佢嘅產品就後話。
本身用緊三年前sony電視機，加上對sonyDSP虛擬技術絕對有信心，所以一心諗住今次upgrade幾大就幾大一定係sony，
以下純粹係個人經歷感受分享，絕對係主觀，絕無客觀修飾，希望唔好有無謂爭拗🙏
既然立定心腸就緊係開始去sony陳列室試下soundbar先啦
第一次旺角陳列室：
A7000+RS5+SW5
可能星期日人多個店員求求其其適合畀我聽，老老實實第一次試佢真係好失望，同自己屋企嗰套Q90R比較，A7000畀我嘅感覺科技完全冇進步甚至退步，基本上感受唔到任何環繞聲同重低音，整個感覺就係侷促，一路睇試機片反而令我對眼個注意力集中咗响A7000度，因為佢啲聲真係完全唔離箱，感覺就好似你前面擺咗個貓籠，有隻貓喺入面係咁叫，其餘啲重低音同埋環繞喇叭好似路人甲乙丙咁食緊花生完全唔關佢哋事，呢次真係 set 機 set 咗五至十分鐘，我聽咗兩分鐘就笑笑口咁走，完全係趕客。試機期間多口問句rs5舊電池可唔可以拆出嚟，條大叔sale真係想幫公司倒米咁，第一句就覆我：你驚就唔好用，估唔到sony嘅服務質素呢幾年差咗咁多。
但係我知道sony嘅產品一定唔會係呢個質數，所以一個禮拜後去試第二次。
第二次旺角陳列室：
A9 + SW3
A7000+RS5+SW5
今次招呼我嗰係後生仔真係誠懇加衝勁十足，為sony加返唔少分數。
首先是A9，老實講真係俾到驚喜，空間感同包圍感都交足功課，整體感覺只係有少少虛但係以Soundbar 嚟講已經係上級效果，配合SW3 動態強勁只係冇乜層次感，瞬間爆發嗰吓幾過引，一隻幾吋嘅重低音做到呢個效果完全冇投訴。
成套系統只係畀個中置 channel 陀衰家，用咗電視機出聲好似帶咗五個口罩咁講嘢，唔用仲衰，好似搵隻手揞住個嘴講嘢。
整體嚟講A9呢個組合係畀咗一個幾過引嘅感覺👍
跟住再試A7000，可能啱啱試完A9，感覺真係好大落差，A7000+RS5+SW5 呢個配搭組合真係四個字粗口，完全不X知所謂，今次條A7000表現的確係好過上次，但係個拾仔同後知置都係繼續扮演老人甲角色，極其量只係比上一次好咗30%，勉強做到少少連貫效果，感覺就好似一個成年人拖住一個幼稚園學生去跑步咁，個細路已經好努力咁跑但係跟得好辛苦，斷氣咁滯。隻拾仔就更加隱咗形，完全唔存在響呢個世上，呢個配搭組合只會覺得條A7000好霸道好炒耳。
當時我即刻同個sales講點解隻5仔仲衰過頭先A9隻3仔，之後叫佢用3仔再試一次，效果同之前差唔多，只係隻3仔叫得大聲過5仔，感覺就好似之前得A7000一個喺度鬧人，而家多咗隻3仔間唔中駁一兩句咀咁，呢一刻已經冇乜嘢好試🤦🏻♂️
第三次試機：Bose 旺角陳列室
900 Soundbar + 700 拾仔 + 迷你後置
經過兩次Sony經歷之後，今次 Bose 試下我個 waiting list入面嘅 900，坦白講可能我係接近關門時間去，個sales又冇乜心機試畀我睇，感覺上真係一套普普通通嘅系統，除咗個價錢比較貴就完全冇乜嘢特別，個sales仲話啱啱有人開咗單。
Bose shop 做緊特價 900+700拾仔+700後置+坐地腳架兩萬多啲，呢個價錢你去旺角walkin 都唔使，可能有人貪方便送貨喇🤷🏻♂️
同一個晚上送走咗我用咗三年嘅Q90R
第四次試機：K11 SONY 陳列室
A7000+RS5+SW5
因為已經冇咗套 Soundbar 洗濕咗個頭，點都要買過一套㗎啦，唯有硬著頭皮再去試 Sony，希望有新嘅感受。
去到k11發現之前旺角嗰個誠懇後生仔sales過咗嚟呢邊，我再同佢講點解上次喺旺角試行至無聲，佢就話好多客都咁講可能上個禮拜set得唔好(但係其實我去睇住佢set，不過算啦我都係嚟試機希望有好聲)
坦白講k11嘅聆聽環境同埋setting真係畀旺角好好多，就係因為好好多先知出事🤦🏻♂️
相比上兩次去旺角，今次所有聲道音壓都比較平均，唔會話邊一樣嘢搶咗啲聲，但係就好明顯聽到"清清楚楚"，所有嘢都唔離箱，真係好清楚知道每一粒聲響邊一個喇叭就出嚟，感覺就好似第一次試A7000咁，但係今次連十仔後置都係呢個感覺，淨係覺得有四件發聲體圍住你咁。
尤其是對RS5，如果用佢配搭A7000嘅效果嚟講用呢個價錢買真係垃圾，完全對唔住個價，嗰一刻我都開始懷疑人生，係唔係唔應該賣咗套 soundbar ，個心灰到一個點😭
以今次嘅環境同setting嚟講應該冇乜大問題，唯一可以賴嘅真係得番firmware軟件問題，呢個就係為我當時仲會揀A7000 嘅藉口。
第二日再上網睇睇，原來k11 sony出面就係bose嘅檔口，一路睇一路鬧點解自己咁戇x吾一齊試埋 bose。其實呢個檔口響個商場裏面，根本冇乜好試，只係想畀個藉口自己幫A7000加分，於是決定星期六再去試一次Bose
第五次試機：K11 Bose
900 Soundbar + 700 拾仔
Bose 呢檔陳列室簡單嚟講就係笑話，位置又細又嘈又空曠，我去到之後行咗入去三次，頭兩次都擰擰頭笑住走，第三次口痕痕問下個細路仔邊度可以試呢條 900，(呢個細路仔完全係零知識，問十樣錯十樣，自己錯乜都唔知，但係勝在夠勇氣答) 佢竟然好自豪咁答我 "呢度咪可以試囉"
嗰一刻我笑咗出嚟跟住問佢"呢度又嘈又空曠，樓底又高，周圍又有人行嚟行去，你哋又冇set後置，咁都可以試?"
後面啲對就唔再講，反正佢講嘅嘢全部都係錯，既然佢畀我嘅答覆就係肯定可以喺度試嘅話，咁就即管試下啦。
其實一條 bar + 拾仔，本身完全冇期望，加上佢呢個攤檔求其播一段一兩分鐘嘅 File，諗住試完就拿拿林去搵笪地方食番個下午茶降吓火，點知試完覺得個場咁大點解我聽到後置效果(not surround back)同埋個低音有少少層次感(係少少)，老實講以當時嘅環境天空聲道嘅包圍感就一定冇，但係明明左右都冇牆身點解我會聽到後置喇叭聲到而家我都理解唔到，之後我再叫佢重複播放多一次都仲係聽到，900 喺呢個環境真係可以叫做環境鬥士，能夠做出咁嘅效果真係令到我有改觀，於是放棄去食下午茶拿拿林走去海港城再試多次😅
第六次試機：海港城 Bose
900 Soundbar + 700 拾仔 + 700 surround
海港城呢個環境同埋sales對產品嘅認知基本上叫做九龍區最好嘅(雖然環境仲有好多進步空間)
今次一去到就即刻叫佢試，Bose 畀到我嘅感覺係聲音密度比較高，低音動態未必有A9咁好但係有層次，完全因為900 同 700 拾仔嘅配合，unbroken 每一下爆炸聲都有彈性，可能係900同700拾仔嘅互相配合效果，個十仔完全係做到隱形嘅感覺，三隻十仔擺埋一排你根本分唔到邊一隻出聲，甚至以為三隻都冇出聲
試音期間有一對夫婦行埋嚟聽，跟住都好詫異點解低音會咁豐富，之後問過sales佢哋都係用緊舊款bose點先至可以做到呢個低音效果😅
網上評測大多數都話對 700 質素後置追唔到條 900 ，但係響海港城對後置擺到老連咁遠都可以做到到位，空間感同包圍咁都做到，證明佢就算唔係同級都唔會差太遠。
去到呢一度都冇嘢好試，離開之後就打電話落單。
總結一下：
現階段如果想用soundbar代替av amp仲未係時機，只會令到你有失望。
Soundbar 只係幫你融合落部電視機度，upgrade你電視機個喇叭，令到你任何時候睇任何嘢，唔需要左開右開都有一個surround嘅效果
買之前千祈唔好盲目相信廣告，以我試咗呢三套為例：
Sony A9：
佢標榜 7.1.4，你加完隻重低音sw5都係7.1.4，用埋電視機做中置喇叭又係 7.1.4，呢條數真係唔係點識計😅
佢實體喇叭係4.0.4
老實講今次Sony呢件產品嘅完成度好高，之前都講過佢嘅虛擬喇叭技術廿幾年前都已經好成熟，今次亦做得好好，喇叭離箱方面係三套系統入面效果最好，佢個360技術真係有啲料到，加上佢又係用四隻喇叭config上有啲似一般嘅家庭影院，分離度一定比一般 soundbar 好。
唯一缺點就係太自負，諗住用一個好嘅新產品去綑綁人哋買去啲電視機，其實而家啲用家唔係傻仔，綑綁式銷售唔係個個人會盲目跟隨，結果因為欠咗中置聲道令到而家出嚟嘅效果大打折扣，如果佢正正經經做五隻喇叭，一套實價唔使一皮嘢嘅A9，好肯定我而家已經用緊。
期望佢下一個版本會加返中置聲道，咁我又會再次心痕😅
SONY A7000+RS5+SW5
佢標榜 7.1.2，你加完隻重低音sw5都係7.1.2，用埋RS5做後置喇叭都只係 7.1.4，呢條數又係吾識計😅
佢實體喇叭係3.0.2
好明顯就係一套完全未完成嘅系統，尤其是RS5真係名過於實，以Sony咁多年嘅喇叭經驗，有理由相信可能係軟件問題，估計淨一條A7000係唔會炒車，不過一心係要買埋後之所以冇試到。
另外建議佢以後啲喇叭唔好再用膠同埋布做網，以前玩多聲道都要拆喇叭網喇，A9同RS5個樣差唔多但係效果爭九班真係唔知呢個係咪有關係。
仲有就係希望開發嗰班友人性化啲，始終而家個個都係窩居，後置喇叭全部都好近座位，唔該佢哋考慮一下後置嗰兩個天空聲道放埋落去條Bar，因為後置天空聲道如果教大聲嘅話啲聲會同對後置喇叭撈埋一齊(呢方面呢A9真係攞滿分，後置天空聲道完全隱形)，反而條Bar同個人距離比較遠吾會有呢個缺點。
Bose 900 Soundbar + 700 拾仔 + 700 surround
佢標榜 5.1.2，你加完隻重低音都係5.1.2，用埋後置喇叭都仲係 5.1.2😅😅😅😅😅
佢實體喇叭係3.0.2
好明顯佢市場定位就係取代電視機喇叭
冇hdmi in已經係死症，冇dts解碼屋企大部分舊碟都睇唔到，要買佢之前真係要認真認真認真思考。
坊間話佢嘅優點其實全部都係缺點，吓吓要揸住個手機睇戲，玻璃外殼黐塵又黐手指模，用落完全唔覺得user friendly。
唯一可取係音質真係比較好，但係呢個價錢真係可以買到一套唔會太差嘅家庭影院，除非屋企冇乜位否則佢嘅優勢唔係太多。
另外佢嘅重低音可以有線接駁，外國已經有教學點樣做可以接駁番自己屋企原先嘅重低音，而佢個後置都係由接收器再出喇叭線，如果買咗唔滿意佢後置嘅質素可以試下駁返自己原有嘅後置喇叭。
同A7000一樣，希望將來佢嘅後繼機種響條Bar度加多兩隻天空聲道就最好。
響揀選soundbar途中，發覺原來香港有個youtuber 大叔會周圍幫人試下soundbar然後出report，雖然佢冇廣告贊助所以冇乜資源，但係因為咁反而睇得到好多大家想睇嘅嘢，建議大家揀bar之前都可以睇下佢啲報告。
最後講埋呢句：
世界上冇最好嘅bar，只有你最鍾意嘅bar🤣
補充多少少：
RS5 如果唔玩 360 佢個天空聲道會滅聲 勁，Yuppi兄，超詳盡！ 小瑟 發表於 2023-3-26 12:26
勁，Yuppi兄，超詳盡！
Thanks 小瑟兄 Nice Bar! 😂😂😂 咁師兄最終決定邊部呀？？？
呢編報告直頭好似自己在試緊一樣 謝謝師兄用心分析及分享心得報告🙏🏻👍🏻小弟心邊都有兩位同事朋友用緊Bose900 －個用黑色另一個用白色，兩位都話非常好同滿意，小弟用緊普通5.1等它自然老去就跟大隊，希望幾年後可以整套簡單嘅2.1聽下流行音樂😅🤣 多謝元老級既Yuppi兄既分享，其實Bose我之前都有興趣，尤其是佢果種好彈既低音真係好搶耳。但因為超低音個設計，我最後係揀左(盲衝)Sonos Beam Gen2+Sub Gen3+One SL，雖然係盲衝，但出來既效果原全係驚豔(我自己和我一些玩HiFi/AV既朋友聽過既評語)，所以有興趣買soundbar既師兄不妨試下Sonos系統。但呢套野做設定時要好聲唔可以跟住官方咁set，其實都幾攪笑。 cakecake 發表於 2023-3-27 06:18
多謝元老級既Yuppi兄既分享，其實Bose我之前都有興趣，尤其是佢果種好彈既低音真係好搶耳。但因為超低音個 ...
佢係創新，產品大多數都係多用途使用，但係物理上聲音係唔會轉彎，一套實體5.1聲道嘅atmos組合暫時仲未能接受到。