靚聲靚仔靚介面 - 暗測 Cayin i5 Andriod DAP

kyle7 · 發表於 2016-7-11 03:31

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

本帖最後由 kyle7 於 2016-7-11 11:04 編輯

人大左就好怕一舊二舊出街，想當年ipod 加 amp，完全無視重量。但隨住年紀增長，兼越帶越多野，macbook，相機，player，各樣加加埋埋，都咪話唔甘。

本身用緊N6，貪佢夠力推入耳，聲又好，唔洗駁amp都得，係個樣唔見得人，同埋算大部同有番咁上下斤兩。我自己就覺得: 聽歌啫，攞部機比人睇咩。當D朋友同事見到部野都問我做乜用部咁樣衰嘅嘢，跟住我例排叫佢地聽下先，個個聽完都下趴跌左落地下。XDXD

但無計，諗諗下，日日抬住舊磚都唔係辦法 (我認我懶。) ，所以想搵部細D輕D嘅player，UI又方便，聲又唔會太差嘅DAP。上網做research，target 有幾部: AK70, Cayin i5, L3.

係我搵嘅時侯，當時AK70，Cayin i5 未出，就去試L3, 硬質素唔錯，但動態差D，3.5 無乜力水，聲太薄，2.5我又唔常用。好，再等到AK70 出左去試，上手真係好細部，又輕，一貫AK 靚 UI，一試個聲，哇。。。人聲好前，低音比其實AK 型號實淨，推力真係大D (unbalance 2.3v, 數字上仲大過AK380 0.1v). 音場窄，動態唔錯，完全係 POP 調音。試首 Hotel California, 首歌未完就放低左，人聲太前，音場太窄。我用RHA T20 去試，T20 個調音已經係人聲唔算前，音場算闊。所以打消AK70念頭。跟手message Andy 兄問下i5 幾時到，言談間知道佢有部i5 量產版係手，即刻問可唔可以試下。就係咁攞左部i5返屋企玩左2日。

廢話唔講，入正題。

一攞到部i5, 上到巴士，即開。 packaging 唔錯，比一般國磚好，同N6 packaging 手法差唔多。跟機皮套就有d 厚，搞到部薄薄嘅i5 變磚，車工亦一般，可以無視。機身造工無話可說，我夠膽講造工係國磚廠三甲內，金屬機身同個Mon 嘅結合度非常好，背面碳纖版非常靚，移印brand name 同 info 內藏左，唔會好似N6 咁甩字。最驚喜嘅係個 Volume 旋鈕，如同 nikfung 兄所言一樣，阻尼感一流，兼夾造工細緻，完全有貴價台機旋鈕質素，淨係哩part 做成咁已經值回票價。成部機感覺非常精品，提得出Cayin 比足心機做哩部野。唯一要挑骨頭嘅係底部為左fix wifi 哩個問題要遷就做嘅塑膠位，做成全部機外觀的一個敗筆。但整體外觀完成度非常非常好，已經做到唔似國磚嘅地步，非常抵讚。

另外，Andy 亦私伙借出UM Martian 我聽，隻野之前已經想試下，真係岩岩遇著剛剛。

好開始試內涵啦-開機：

開機速度有待改善，要差唔多一分鍾左右，應該黎緊嘅firmware 可以改善下。入到介面，非常清晰，folder play 無難度，各樣setting,只要你用開依家嘅智能手機，應該一玩就上手。由左邊Mon 拉出Menu, 見到第三放應用入面有play store, 好一陣返去再試。

插上martian 到 i5, 當然即刻黎首 Hotel California 先。音場擴闊，分析力唔錯，低頻好實，推力非常強大，中頻人聲較前，分離度好好，但高音有D 硬。因部機Andy 到手先得幾日，要煲煲佢先入到狀態。

換歌，試下 EDM 先，聽Avicii - I could be the one. 動態好強！非常刺激！唔同電音嘅聲分得好清楚有力，完全係EDM, POP 嘅利器。平時用N6 聽，佢present 得比較斯文，會有D high 唔起嘅感覺，但i5 就可以用澎湃有力黎形容，收放快，唔拖泥帶水。
i5 聲低唔算係好柔嘅關係，聽哩類節奏快嘅歌非常好feel，唯獨樂器多嘅時候開始比較亂。

試完快歌就到慢歌 - 我經常聽嘅 Diana Krall - Peel Me a Grape 。好暖，又唔過火，佢嘅聲底係N5 同 N6 中間，N5最暖，i5 緊隨其後，N6 最冷（都係中性偏暖）。人聲好有感情，結他弦震泛音唔會過火，鋼琴聲清脆，但略嫌有dd 收得快左。整體慢歌都 handle 得唔錯，但感覺上節奏好似有d 快，可能同調音有關係。之後試下調個digital filter, 無明顯分別，所以放棄。

返到屋企，即刻試下download 第三方apps，雖然我平時唔會用app 聽歌，但既然係哩部機嘅賣點，一定要試下。

成個process 由 login 到download Moov, Tidal 都非常流暢，未見hang, 或嚴重lag 嘅程況，軟件完成度唔錯，Steaming 連聽3 首 hifi quality 嘅歌中間完全無lag 嘅程況。音質無聽storage 係Sd card 度咁好，始終個apps bypass 唔到SRC 哩個問題，但係已經接受到有餘嘅質素。如果有師兄好concern 佢個steaming 得唔得嘅話，可以放心。得！

再黎就係我最concern 嘅 USB to Coaxial 功能，因為自己用緊嘅iDAC-6 用 coaxial 出 Dop會好聲D, 所以哩部分就同N6 出coaxial 黎 AB 下。

細心互換聽左陣，聲底分別唔大。N6 係空間感包圍感到略勝 i5，但 i5 嘅人聲比 N6 清少少，真係一個馬鼻分別，低音同高音延伸都係N6 比較好，但我 N6 輸出果條 coaxial 係 gotham 嘅 Coaxial 線，而i5 嘅係跟機線，而且條線 Andy 係話 rejected sample，所以如果用條好D 嘅線，差距應該得返好少好少，哩樣認真抵讚。

總括，如果哩部機賣$3000-$4000, 佢嘅性價比非常之高。淨係買個外觀，造工，已經值回票價。另外，軟件完成度非常高，哩一樣非常抵讚。好多國磚一出，個軟件係非常多bugs，而i5我反覆測試都唔見有明顯bugs，未死過機，未自動reboot 過。唯獨係開機同關機速度要調整下。

收到消息應該哩個月尾就會見街，有興趣買部細細地 size，又要多功能，又想一機走天下嘅師兄，可以等埋哩部先決定。哩部i5真係值得一試，同時見到真機，你亦都睇得出 Cayin 嘅誠意。

題外話，我見好多人討論緊唔同嘅 player，用咩 DAC? 係唔係行 2 粒 DAC? 有無 2.5 平衡? 等等...

其實科技日新月異，由我細細個聽 casstte 帶 walkman，之後到 Discman，中學時代出左 MD，繼而Mp3 機，到有DAP 去播DSD。去到而家DAP百花齊放，用唔同DAC，有埋平衡輸出。由細個簡簡單單聽歌到而家要求多多，究竟我係聽緊個歌手唱歌，enjoy 緊首歌，定係我聽緊首歌嘅遐疵，批評佢錄音? 無錯，好嘅gear 真係可以令到首歌好聽D，但我見到好多人盲目追求detail，reference，模擬聲，數碼聲，失真等等。。。

DAC 唔同，真係咁重要? 依我所見同一粒DAC 都可以有唔同調音。 2.5平衡係唔係一定比 3.5 好聽? 我個人覺得唔一定，至少我聽過嘅2.5平衡無一隻比用 3.5 有感情。你可以話2.5平衡比3.5 音場大，乾淨，聽大棚野一流。試問用得DAP出街聽歌，有幾何係條街到一路行一路聽大棚野? 至少我唔會。

聽歌真係好個人，你鍾意聽嘅歌，人地未必鍾意聽，每個人隻耳聽到嘅野都唔一樣。無必要爭論一D 每個人都覺得唔同嘅野。聽歌係 enjoy，交流，分享，無話係絕對，唔好將你覺得係嘅野強加係人身上。就算我打哩個聽感，我都會叫你唔好信我，耳聽為實，有機可以試嘅時侯，自己試清楚岩唔岩自己。

最後，希望個個師兄 Enjoy Music, 早日揾到最match自己嘅 combination!

多謝各位師兄"睇"我廢噏咁耐，唔好意思～