2016日本摷碟全攻略~東京+名古屋+大阪 (已更新#5)

takeishi

2016 (日本) 摷碟全攻略 ~ 帶你搵盡.
東京+名古屋+大阪

  又係我小弟 TAKEISHI "貴司" 的每年一度的大製作. 每年總會去日本搵下碟. 今年也不例外. 趁年假給自已充充電. 最好的地方就係日本. 吃喝玩樂之餘又可以搵碟. 相信好多C兄都好似我咁. 去日本搵碟已經當去旺角信和咁架啦. 當然. 晌日本買碟, 就算門口擺出黎100円特價碟都絕對好過信和二手鋪D貨色多多聲. 呢個肯定唔駛講架啦.

  年年都去日本. 今年特別值得紀念的. 因為今年我決定走訪.東京+名古屋+大阪. 用了足足十天的時間走盡3個地方的大大細細唱片鋪. 當然也有去遊覽下一些當地的名勝. 品嚐一下地道的食品啦. 但係~最主要的目的. 仍然是為了摷碟. . . . . (這個必是首要)

  呢次行程足足用了整整十天的時間. 從年廿九出發. 先由香港出發去東京. 晌東京留左4天. 之後坐新幹線去名古屋. 晌名古屋玩兩日. 再坐夜車去大阪. 咁就完成左我呢十天之旅. 今次最特別的就係去到每處地方也有特別嘉賓JOIN埋我地一齊玩. 晌東京就有位好友去睇演唱會.順便一齊玩幾日. 去到名古屋同大阪就約左當地的日本朋友一齊聚聚. 十分懷念.


  好啦. 事不宜遲. 馬上帶大家出發. 東京.













  食左個國泰既常餐~好快就到東京成田機埸.





  是日地步實在太夜了. 去到都已經夜晚7點幾啦. 晌成田坐SKYLINER去到上野再轉車返酒店. 順個便晌上野食個飯. 行下夜晚既上野. 街頭有很多表現. 也是十分熱鬧的一個晚上. 這天實在太累了. 第二日先至去行街啦.



  從東京出發~我第一站去朝聖的地方的就 "渋谷”

實在太愛這個地方了. 碟迷必去的一站. 這個地方大家都知十分熱鬧. 其實東京都無咩邊度唔熱鬧架啦, 特別係呢D熱門地方. 成街都聽到國語同埋廣東話. 大陸人. 香港人. 成街都係. 去藥房睇下重更加誇張. 大陸D大媽, 好似已經完全攻陷左日本咁瘋狂式掃貨. 買野好似唔駛錢咁. 一大箱咁係咁買. 係咁買.  當然~我唔會同佢爭. 我只係去唱片鋪. 去到渋谷~第一站就梗係我既至愛. 當地既地標"TOWER RECORD"啦 . 晌TOWER RECORD前面有間餐廳係以ZARD做主提架.























呢家就連 TOWER RECORD 也可以退稅了. 只要你買夠1萬円, 不過唔係間間都得. 我去過吉祥寺果邊果間TOWER RECORD就無得退稅. 渋谷, 池袋. 新宿呢3間就一定得. 總之你見到呢貼紙TAX FREE既就有得做退稅. 無既就係無. 唔駛問.



































第一站~唔駛講. 必定係去掃晒最新出MADONNA既 REBEL HEART CD+DVD來日紀念版 , 同埋華納重新發行的6張特別PACKAGE (LP紙套PACKAGE)的六張專輯.




  是日掃左十幾隻MADONNA, 都係掃唔齊2套. 要去第二間補番唔夠的幾隻.



  渋谷 HMV ~ 十幾年前HMV曾經是渋谷最大既唱片店. 但好多年前已經無左啦. 上年重新開店但已不再是以前的HMV了. 呢家已經變左百貨公司咁樣既HMV, 裡面咩野都有. CAFE又有. 書店又有. 賣的都不再是以CD黑膠音樂產品為主了. 什麼也有. 路經的也會上去看看的.















好彩重俾我晌HMV掃埋最後一張的REBEL HEART 來日紀念版. 唔知點解呢隻野咁鬼死好賣架. 度度都無貨.



  還有其他很多地方介紹的.
我會不停更新UPDATE~大家密切留意更新內容吧

takeishi

  多謝~多謝支持. 馬上來繼續 UPDATE.
仍然係渋谷、因為渋谷除左有大型既CD店 Tower Record 同埋 HMV之外.  佢重有幾間二手店又係好大間, 同埋必要去的. 其中當然係 RECO-FAN 啦. 好多人都識呢間二手碟鋪架啦. 我真係細細個就聽過呢個名架啦. 我估佢都超過廿年架啦. 我廿年前晌日本留學時候已經成日得閒就去呢間野搵碟架啦. 佢算係渋谷最大間既二手碟鋪.
當年 (廿年前) 渋谷好多碟鋪架. 大大小小多不勝數. 如今只剩下呢幾間架昨.  不過基本上全個東京, 或者全個日本. 什至全世界都係咁架啦. 可以生存至今既碟鋪都真係所餘無幾架啦. 所以我每之去親都晌佢度大量掃貨. 不過~呢間野. 價錢唔算好平. 有D野亦都炒到好貴. 佢都幾知價架. 如果要搵平野. 呢度難D啦. 不過當然. 亦都一定有唔小好野俾你搵到既, 佢都有好多特價碟200円、300円、500円。 全君選擇, 質素絕對好過信和D二手碟十萬八千倍. 種類亦多不勝數. 總之. 呢間野. 夠你行兩粒鍾都行唔完係啦.



















  基本上佢咩都有. 除左CD, 黑膠. ..........書, 場刊, 音樂雜誌. 咩都有.
佢都有新碟賣架. 比起正價平10%, 而且重有得退稅. 晌佢度買新碟的確係一個好選擇黎架.
不過. 佢唔同TOWER RECORD 或 HMV 咁樣. 佢賣完可能唔番貨. MADONNA 果套6張既RE-ISSUE大碟.
俾我晌佢度掃晒. 之後我再去想掃多套都無貨啦.












  JANET JACKSON ~ 新碟宣傳
居然俾我晌佢度見到JANET JACKSON新碟宣傳.
佢都算幾UPDATE.





  好啦~行完RECO-FAN之後, 當然唔小得既就係.... BOOK-OFF 呀.
呢間係BOOK-OFF既旗艦店~算係最大既一間BOOK-OFF, 其次我覺得應該係池袋果間. 又係勁大間架.
佢就係晌正RECO-FAN傾對面就係啦. 呢個絕對唔駛介紹架啦. 去日本搵碟既都無可能唔去BOOK-OFF架啦,除左平.靚.正.呢3個字之外都無野可以形容到. 同埋挑釁到佢架啦. 二手碟選擇多到你眼花撩亂. 價錢要幾平有幾平. 質素有幾好得幾多. 求求其搵隻100円既特價碟都可以比美信和D所謂二手貨. 當你信和當係寶既碟賣一百幾拾蚊張既二手CD既時候. 你晌佢度分分鍾280円,500円特價區入面大量供應. 總之BOOK-OFF就肯定係搵碟既最好地方黎架啦. 不單止必去. 而且是首選. 除左碟之外. 佢還有其他好多野. 真係行足一日都行唔完架.

















  希望大家喜歡. 希望大家睇完之後都留言. 唔好睇完就算啦.
整個有質素既POST出黎真係需要好多時間架.
睇完禮貌上都覆下留言以示支持啦. 多謝.

takeishi

2月22日 (更新) UPDATED ~ 東京的...神保町+お茶の水



去東京尋寶~必定唔可以唔去既就係. 神保町+お茶の水, 因為呢度已經算係東京最集中既二手市場. 古書街同埋二手碟鋪都晌晒呢度. 而且佢好近秋葉原. 如果你識行的話. 晌秋葉原尾行15分鐘就到お茶の水, 晌而神保町就係晌お茶の水個站後面, 基本上係連埋既. 兩個站相距只係5分鐘路程. 途中還有很多賣音樂用品的店舖.

  第一站就實係要去お茶の水站的 DISK UNION, 好多地方都有DISK UNION. 幾乎每個地方都有. 好似BOOK-OFF咁, 總有一間晌左近, 去到神保町都有一間. 不過唔係間間都咁大同埋咁齊, 晌お茶の水果間算係好大同埋D野好齊全. 行得又舒服. 包你去到唔捨得走. 黑膠. 中古CD, 新碟. 書. 周邊. 包羅萬象. 入去行完之後. 保證你實買到一大包二大包咁行番出黎.




















  好啦~去完お茶の水, 之後就實係行過去神保町, 晌神保町一樣有DISK UNION, 不過就無お茶の水果間咁大, 順路都一定會行去睇下搵下碟. 因為間間賣既碟都有D唔同. 所以都是不能放過的. 而且, 間間賣既野都有小小唔同. 晌呢間我就搵到好多音樂周邊用品, 例如係CD保護套啦. ........ 其他店有D都無得賣. 只係得佢有架昨.





















  晌呢間. 我居然搵到隻Bootleg, 呢隻madonna既Bootleg 我都係第一次見昨. , 不過. 勁信唔過, 一睇就知係HOME MADE DIY 既野. 連封面都好似自已打印出黎咁款.  所以無買到. 而且都唔知d音質如何, 所以......博唔過. 分分鍾可能係CD-R黎架昨.  













  去到古書街有好多賣二手書 ~ 其中呢間 ARATAMA 應該係曆史最久的老店. 你入到去想搵咩野都有. 昭和年代的去到呢家當紅的AKB48都有齊晒晌度. 有D天價既親筆簽名照片. 張張都萬萬聲. 呢D通常都只可遠觀而不能買走的. 不過入去欣賞下都無仿既. 可能俾你搵到件平靚正既都唔奇既. 我就試過搵到幾本Madonna既寫真. 都係一千円本. 睇你好唔好彩啦.  
























  嘩~俾我搵到兩張MADONNA ~ 不過. 價錢貴到你唔信. 8千円一張. 唉~雖然我好鍾意. 但係都真係唔捨得拎1萬6千円出黎買呢兩張海報返屋企. 所以. 算啦. 影張相留念下算啦.









  另一間專賣黑膠既二手店, 亦有好多中古CD, 亦都好大間. D野非常靚仔同新淨. 價錢亦唔貴. 十分抵讚. 個老板娘亦都好健談, 果晚晌佢度買左兩隻碟. 都只係一千円、俾佢捉住吹水吹左成半個鍾. . . . . . . . 佢話下次幫我留起晒D Madonna 俾我和. 不過下次. 都唔知幾時去啦. 可能半年後啦.  










  當然唔小得既就係, 曆史最久的 RECORD 社 (レコード社)  , 以前 レコード社 起碼有十幾間分店架. 分報全個東京. 晌神保町都有兩三間. 池袋. 新宿都有. 不過呢家執剩得番呢間總店啦. 同埋另一間. 富士レコード社, 都係晌神保町.  佢地真係廿年不變, 所有擺設都係同廿年前一樣, 佢既碟類型真係勁齊全. 晌佢度搵碟一d難度都無. 美文碟由A至Z分類. 日文碟由 あ至わ行分類. 而且佢價錢好合理. 呢間絕對係搵碟既必去聖地.









  古董擺設, NIPPER 狗狗 , 佢全部都齊晒咁多隻既狗狗. 見到都開心.







  RECORD 社的對面就是 TONY RECORD , 佢無 レコード社 咁大, 不過種類都唔小. 而且價錢亦都唔貴. 晌對面, 一定要行下唔可以放過. 佢門口經常有D特價碟. 晌特價碟之中都搵到好多好野架. 所以. 又係唔可以放過既.












  另外還有一間專賣炒價碟既CD鋪, 佢D價錢真係天價. 呢間野我都唔明佢點可以生存到呢家. 好似香港既SAM RECORD咁樣形式啦. 都係D一日唔發市. 發市當三年果隻囉. 去開既. 入去睇下佢D價錢有幾癲價囉. 不過佢門口都有D特價碟既. 我都掃過佢好多特價碟. 都OK既.














  只係第三日~已經買左好多碟啦. 加埋又忍唔到手買左兩個B仔袋, LOFT 又一大袋. 唉~預左行李過20kgs架啦. 不過其實20kgs (44磅) 行李額真係唔係好多架啦. 個喼同D衫都去左一半啦. 所以次次都要Hand Carry幾袋野上機. 唉.......





  東京呢家D唱片鋪分散各區~好難搵到個區可以有幾間碟鋪俾你行親飽架啦呢家. 所以, 神保町+お茶の水. 已經可以話係東京最多碟鋪既地方黎架啦. 對於碟迷黎講. 這個必然是NO.1首選一定要去的地方.

takeishi

有C兄身在日本也看到我的攻略, 希望幫到你吧. 也有很多朋友快出發去日本. 好吧. 我盡快UPDATE更新. 希望月中之前全部完成. 希望幫到大家. 也希望大家摷得開心.買得放心. 玩得稱心. 如果有咩野最新消息或者有咩野我漏左無介紹既. 希望你也來告訴我. 等我下次去可以去搵多幾間碟鋪.

  呢格係留俾 "新宿+池袋" 的 ~ 其實. 正如我所講. 呢家東京的二手碟鋪分佈得好散好散, 除左"お茶の水"+"神保町" 果邊叫做集中D之外. 其餘東京各區都係(バラバラ) 意思係~零零碎碎咁. 呢度一間. 果度一間. 其實新宿+池袋. 只係有DISK UNION 同埋 BOOK-OFF 呢兩間大型碟鋪架昨. 不過~都已經夠你行足半日架啦. 因為池袋果間BOOK-OFF實在太大間啦.

  即刻去新宿~呢個地方香港人唔陌生架啦. 好多都揀住新宿. 貪佢就腳同方便. 新宿其實素來都唔多二手碟鋪既. 不過. 佢最多既係 DISK-UNION. 晌西新宿就咁一條街已經有幾間. 新宿的確是一個很熱鬧的地方,. 隨處可見街頭表現.
































  而當然唔小得既就係TOWER RECORD~同埋HMV啦. 新宿同池袋既TOWER RECORD都差不多係人都識. 反而HMV就好細好細. 搬到去無咩人識既地方. 不過都唔難搵既. 只係. 新宿既HMV好細間. 無咩野揀.

























    去到池袋~梗係要去SUNSHINE CITY果邊果間BOOK-OFF啦.
好大間. 好多碟. 好多選擇. 搵足半日都揀唔完. 實在係一個好好既消閒地方. BOOK-OFF 其實全日本都有, 池袋呢間係好大間, 亦都好多碟, 其實呢家講到買二手碟. 真係除左BOOK-OFF之外. 都別無他選架啦. 如果你鍾意買書, 雜誌呀. 嘩~BOOK-OFF真係可以買到你個喼超過40KGS都完全無難度架. 又平. 又靚. 又多選擇. 次次我都買成堆二手書. 次次都攪到行李過磅. 次次都要將D書HARD CARRY上機. 所以. 大家買書或者雜誌之前真係要考慮下點樣.......拎走. 拎先係最大既問題.  










  其實池袋呢家都真係小左好多碟鋪啦.  除左有間好細間既Disk Union 池袋店之外.  重有一間 Coconuts Disk池袋店, 晌池袋西口果邊, 不過呢間行過去都幾遠下. 不過呢間都唔錯架. 有兩層, 一樓係賣CD, 二樓係賣黑膠碟. 價錢亦都唔貴. 去開池袋既. 呢間都係必去既碟鋪.  可惜我無影相. 所以只係得呢個圖介紹俾大家.



  是日收獲......幾隻黑膠. 廿幾隻CD.....書. 雜誌. 場刊. 咩都有.  唉. 唔駛4日個喼已經爆左7成啦. 之後個6日都唔知點攪好啦. 次次都係咁大獲. 次次都攪到行李過磅. 次次都要將D重既野HARD CARRY, 又要拆走晒CD膠盒. 唉. 20KGS行李額真係唔夠架. 40KGS就差唔多.

takeishi

來介紹東京最後一站~中野+吉祥寺

  中野就好似香港既信和咁樣,. 中野ブロードウェイセンター (BOARDWAY CENTRE) ~ 呢個唔駛多講啦. 裡面各式各樣咩野都有, 玩具. 模型. CD鋪. 書店. 總之包羅萬布. 亦都好有野食. 去中野就一定要行BOARDWAY, 所以唔駛多介紹架啦. 不過除左BOARDWAY之外,. 另外重有幾間碟鋪. 包括. DISK-UNION 啦. 同埋最重要既 RARE RECORD.





  中野的DISK-UNION~晌中野戲埸對面. 見到呢隻野既對面就係架啦. RARE-RECORD都係晌附近. 總之見到呢座野就搵到架啦. 中野的DISK-UNION話大唔大. 話細唔細. 不過好多碟. 比較其他既DISK-UNION佢真係好亂. 裡面環境亦都好狹窄. 搵碟比較唔係好方便, 不過佢碟量好豐富. 同其他比較都重係多碟既. 只係. 裡面空間真係實在太細啦.  可能佢多野過頭啦.
















  中野的 RARE RECORD ~ 又係同RECORD社一樣. 曆史柔久. 中野的RARE RECORD同埋吉祥寺的RARE RECORD都是一樣, 咁多年來都係無咩點樣改變過. 無論裝修. 格局. 環境. 都係廿年如一日既. 佢地D碟亦都分類得好清楚. 搵碟十分之方便. 亦都幾多不同類型既碟. 價錢唔貴. 所以, 周不時晌佢度都掃好多野走. 特別係黑膠呀. 佢D黑膠價錢好抵買架. 我試過3千円掃走佢拾幾隻碟走. 隻隻都好新淨靚仔架. 基本上日本人都好好架. D野保存得好企理架. 唔會垃垃圾圾碟都賣1百蚊. 總之. 晌佢度搵碟. 包你開心滿意.

















吉祥寺的RARE RECORD , 當然要去埋啦. 晌中野後幾個站之嗎. 順路既一定要去埋佢. 因為吉祥寺本身都係一個好旺既地方, 除左行碟鋪之外重有好多百貨公司. 商埸. 呢個地方絕對係好介紹. RARE RECORD 晌中野. 吉祥寺, 同埋 "高円寺" 呢三個地方都有分店, 呢三個地方都係同一條線. 都係"JR中央線", 呢三個地方只係前前後後站架昨. 所以. 十分之順路. 而且. 亦都好多野玩. 好多野食. 絕對值得一去.
















  偶爾也有發現小店門前賣二手貨. 如果你有時間的話.
不仿行下D橫街窄巷. 可能有意想不到既收獲都唔奇架.






  順手晌吉祥寺度食個寿司. 好味程度爆燈.
海膽寿司都只係130円一碟. 去到我都通常勁食海膽寿司

takeishi

  這個位是.....名古屋 .  
名古屋這個地方都唔錯架. 都有好幾間碟鋪. 晌大須商店街果邊. 好幾間二手CD鋪同埋黑膠碟鋪. 而"榮"果邊呢. 大型百貨公司林立, 不過仍然搵到好大間HMV同埋BOOK-OFF既. 而且都幾好行. 名古屋呢個地方雖然細細地, 靜靜地. 不過成個地方都靜中帶旺.沒有東京或大阪那麼多人. 無咁迫都幾好架. 唔似得好似心斉橋咁. 多到人嚇死你. 迫都迫唔到入去. 重勁過銅鑼灣年宵. 所以. 我都幾鍾意名古屋呢個地方. 基本上集合左東京+大阪的兩大優點的濃縮版. 搵碟或是觀光也是一流的.

  可惜今次我只有兩天的時間留在名古屋, 只可以圍住市中心條"名城線"的地方觀光. 去唔到遠些小的地方, 例如......白片鄉, 呢個地方風景好靚, 一年四季景色都不同. 是個十分之值得去的勝地, 下次我一定會再去. 而且會更深入的遊覽名古屋呢個地方的. 等我下年的報告吧.

  好~出發. 名古屋兩日遊. 我是坐新幹線從東京到名古屋的. 都是個多小時的車程. 不過呢程車就......貴到死呀. 所以.下次我會考慮坐夜車落去. 平好多. 我地一大清早就到左名古屋, 第一站就當然唔係去搵碟啦. 咁早都未開門. 朝早最好既去處就係遊覽名勝古蹟架啦. 於是~第一站去左"名古屋城" , 講真. 日本個個城都好似差不多咁, 名古屋城. 同日本城. 姖路城. 都好似無咩分別咁. 只係外觀上面多左幾條金魚囉. 不過未去過當然要去打下卡先啦.













  順手買下手信. 當地既手信都幾有特色架. 其實除左買碟之外. 亦都要遊覽下唔同既地方既. 都唔好一味掛住買野. 咁樣會失去好多樂趣架.





  好啦~去玩完名古屋城. 下一站就真係去搵碟啦. 先行下名古屋城車站下面的"ESDA地下街"先啦. 名古屋最大的地下街, 面積雖不名東京銀座的地下街, 但亦都大到成個太古城咁大. 咩野類型店舖都有. Shopping 就最岩. 裡面有間小型既碟鋪, 賣新碟既. 隔離亦有間專賣音樂產品的鋪頭的. 十分特別. 去到不仿去睇下.

















  名古屋~這個地方, 基本上都係去呢三度. 1) 名古屋站. 2) 榮  3) 大須 , 你問我. 最鍾意邊度. 唔駛講. 一定係大須. 因為大須就好似旺角咁樣. 平民化的店舖, 二手碟鋪. 100円店, 應有盡有. 而"榮"呢個地方呢就好似銅鑼灣咁. 專賣貴野. 大型百貨公司. 先去左榮先啦. 因為. 榮都有間好大間既 HMV 架, 呢家日本都好難搵到有間咁大間既HMV架啦. 東京大阪都搵唔到有咁大型既HMV架啦. 晌榮呢間HMV你重可以找尋到惜日HMV的光輝. 裡面既格局同以前HMV全盛時候無咩分別. 還保留了小型舞台俾人攪活動同宣傳之用. 如果你要搵新碟既就要去榮果間HMV架啦.













































  走進名古屋的大街, 不難發現到處也有特別可愛的街燈. 也是名古屋的特色. 去完榮啦. 出發去"大須"
大須呢個地方實在行足一日都行唔完架. 除左有古寺"大寺觀音寺" 之外. 還有商店街. 呢個地方比較平民化, 裡面既店舖賣既野須都好大眾化, 咩都有. 價錢都好抵好平. 我晌大須真係買到完全停唔到手. 總之. 去名古屋. 行得最開心既就實係大須. 包你滿載而歸. 行完再行. 行極都唔會厭.











  榮的地標~科學館. 晌榮同大須的中間. 基本上榮同大須都同晌隔離架啦. 名古屋實在太細啦. 好多地方行都行到過去. 科學餉呢個球形建築物, 去到一定要打下卡先. 而且科學餉出面亦都有個電車展覽免費參觀的.  









從商店街出發 , 同大阪的電電城一樣. 有個好大既高達. 你當呢個係地標啦. 因為全部野都晌晒呢幾條街架啦.





大須入面. 有好幾間賣二手碟鋪架. 我諗已經係名古屋最多碟買既地方架啦. 好多唔同類型既碟鋪都晌晒呢條街入面可以搵得到. 而且呢條街並不單止係碟鋪. 書店. 食市. 超市. 各式各樣的特色店舖都搵得到. 而且亦都好平民價.























  另一間二手CD鋪 K-HOUSE, .... 呢間 CD+黑膠, 咩都有. 而且碟好多. 價錢唔貴. 呢間絕對會買好多野走既. 淨係擺晌門口100円特價碟我都搵到好多好野. 俾我掃左十幾隻碟走都唔駛3千円。抵到欄.
















  另一間連鎖店 BANANA RECORD , 二手碟鋪. 價錢貴小小啦. 不過都幾多碟.  
佢有兩間的. 影左相俾你睇啦. 你自已搵啦. 好似晌附近架昨., 不過我就無時間去另一間. 只係行左呢間就算啦. 下次先再去搵埋佢間分店晌邊再介紹俾大家啦.





















  晌大須商店街, 我真係買到完全停唔到手呀.  100円店, 大大小小既鋪頭. 多到行唔晒呀. 真係行得幾開心. 又滿足.









  晌名古屋. 去左居酒屋飲酒. D野食都唔錯. 幾好. 好懷念.........








  返到酒店已經醉晒啦, 是日行程完滿結束. 玩完之後趕車落大阪了............

takeishi

  來到這個行程的最後一站大阪 (梅田+心斉橋)
梅田+心斉橋這個地方很多人都熟悉架啦. 唔駛多介紹. 首先就梗係要去梅田的TOWER RECORD朝下聖先架啦.呢家成個大阪都幾乎得返佢最大間賣新碟架啦. 大阪既HMV又係已經縮到好細間. 反而名古屋既HMV就好大間. 當然啦. 呢家係大阪. 就實係去TOWER RECORD先架啦. 買新碟呢家都無咩選擇架啦. 好多大型百貨公司都唔係好入貨. 例如BIG-CAM啦. LABI, YODOBASHI-CAMERA啦...... 好多都無咩選擇. 所以. 買新碟都係去大型連鎖CD鋪啦. 最多最齊全架啦.  
































  梅田~呢間老店. 廿年曆史既二手碟鋪. MUSIC IN RECORD SHOP, 也是我最喜歡的一間二手碟鋪之一, 多年來我晌佢度搵到唔小好野架. 佢價錢唔算好平. 黑膠可以講有些小貴. CD就.....一般啦. 唔算太貴. 亦唔算好平. 但係. 佢勝在流量快. 款式多. 藏碟量驚人. 次次去親你都總會搵到D唔同既野架. 我試過. 今日去買完. 聽日再去都重搵到野買. 所以. 呢間碟鋪. 絕對係我推薦. 亦都係必去之選. 唔駛講咁多. 入去睇野啦.................
















   有綱友問我大阪邊度有專賣JAZZ既二手碟鋪??   有呀. 就係梅田囉. 呢度就有兩間啦. 好易搵架昨.  



  晌BIG CAM對面. 呢條商店街行到去最尾最尾. 沿途你可以見到一蘭拉面 (最難食既拉面店, 同金龍有得輝)





  總之行行行行......行到最尾就見到架啦.  兩間都晌街尾. 去到就見到架啦.
因為我唔多買JAZZ既. 所以都無入去影相. 只係晌出面影兩張就算啦.









[IMG]http://i1168.photobucket.com/albums/r482/riverkln/2016%
20JAPAN%20TRIP/OSAKA/20160214_161704_zpsfyxqrcgu.jpg[/IMG]


  順便順路. 沿途有間BOOK-OFF架, 梅田有幾間BOOK-OFF架, 反而難波果邊就好似一間都無. 所以要去大阪BOOK-OFF搵碟就要去梅田啦. 難波果邊係無BOOK-OFF架. 記住記住.



























  心斉橋 ~ 美國村, 裡面有間好大型既二手碟鋪. 好多人都識架啦. KING KONG RECORD .
呢間碟鋪好大間. 好多冷門既碟都可以晌佢度搵到. 咩野類型既音樂都有. HIP-POP, JAZZ, POP. ...... 咩都有. 除左碟之外,. 書. 雜誌. 周圍. 什至黑膠碟機, 都可以晌佢都搵到. 似十足一間音樂百貨公司咁. 不過晌佢度搵碟都真係要花D時間. 因為都擺得幾亂下. 你真係要慢慢俾心機搵. 不過~呢個都係樂趣之一黎既. 行完KING-KONG, 你可以順便去隔間有間MANDARIKI~專賣動慢既二手店. 各式各樣同動慢有關的野都搵得到.







































  梅田~碟鋪唔夠難波果邊多. 不過都有呢幾間. 去開梅田, 順便食下野. SHOPPING. 你有你搵碟. 你老婆就行街SHOPPING, 包佢唔會炸形. 去梅田就記得去食蟹食助餐啦. 抵食又好味. 晌梅田大丸. 包你話正.










好多朋友都問我. 去日本搵碟. 邊度最好..我一定推薦.   大阪的難波. 現在已經是全日本二手碟鋪最多最齊全最集中的一個地方. 以前東京都係好多二手碟鋪, 同埋好好行架. 買到好多野架. 比起大阪多好多架. 不過. 因為東京的地租太貴啦. 同埋東京果邊D野比較變得快, 呢家東京已經無咩好多間二手鋪. 就算有都好散. 分佈各區. 呢度一間, 果度一間. 要去晒都真係要花好多時間各區行晒佢. 不過大阪(難波)就唔同啦. 單單係電電城入面你已經可以搵到超過十間二手碟鋪, 可能唔止架. 可能有廿間都唔奇架. 有D我都無去到架啦已經. 大阪呢邊比起東京就無咁快改變, 好多野都保留住好似十幾廿年前既店舖都仍然生存到呢家,. 唔同東京. 晌東京. 一早就執鬼晒啦. 你今年去東京見到既碟鋪, 分分鍾下年已經摺埋左. 所以~呢家黎講. 全日本最多二手碟鋪既地方.............絕對係"難波" 我TAKEISHI強力推薦. 去大阪搵碟. 你必須要把所有精力. 財力同埋腳骨力俾晒難波. 我保證你會買到爆喼返香港.

takeishi

  這個位是留給......大阪的......難波  

takeishi

   來個總結. 先謝過大家耐心等待及留意UPDATE更新, 以後也多多指教.
喜歡的話. 不仿留言以示鼓勵.  交流下心得

  今次日本之旅. 跟之前的感覺好唔同. 今次應該係我咁多次之中安排得最好最完美的一次.
沿途各站也有朋友JOIN埋一齊去玩. 所以今次旅程特別唔同. 而且特別開心. 特別懷念. 兼且特別駛得多錢.不過唔緊要啦. 玩得開心. 買得稱心. 咁就最滿足啦.

去咁多次日本, 今次最難訂機票+酒店. 去到日本, 人山人海. 所有旅遊旺區每十步聽到普通話, 每廿步聽到廣東話, 到處都係中國人, 簡直就好似變左植民地咁. 感覺上日本人都覺得唔耐煩架啦. 我已經識講識聽, 去到各處都係講日文. 但係都感覺到好多地方, 特別係旅遊區既店舖, 服務態度真係麻麻地. 什至有D地方D售貨員真係HI口HI面咁. 唉~問心一句. 將心比已. 我地香港人都唔鍾意太多自由行黎香港啦. 何況日本人更什啦. 大陸人去到邊都嘈嘈閉, 又無禮貌, (其實都唔係大陸人架啦) 香港人都係呀. 我記得住晌名古屋酒店, 晌房入面都聽到出面個香港女人大大聲講野. 驚死無人知佢係香港人咁. 唉........呢樣野. 我地真係要改下. 大家去日本旅行都真係要學下人地, 入鄉隨俗. 細聲D., 有禮貌D. 唔好失禮.


  今次去左三個地方. 儲儲埋埋鬼咁多乘車既卡. 有東京, 名古屋.大阪, 希望儲齊全日本各省既卡. 呢個係我目標.



  晌日本各大唱片鋪都有好多宣傳單張同埋免費既音樂雜誌. 好多都印刷精美. 呢個真係日本人既福利黎架.
全部就無可能拎得晒架啦. 亦都費事咁貪心, 留D俾其他人拎. 每樣我都拎左兩~三份. 呢家有C兄鍾意既可以問我拎架.
不過我就無時間交收啦. 如果你想要既. 自付郵資. 我寄一份俾你啦, 想要邊份既問我拎啦. 有D得一份多出黎. 派完就無架啦.

SonSon

詳細又精彩遊記, 4月去時又可參考吓