帶你遊 "大阪+東京" 搵碟好去處 (最後更新) 完整編

takeishi

  剛從日本返港. 這年頭決定來一次 "大阪+東京" 兩邊走.
一共留左十一日. 不過. 其中的一半時間都係要幫個朋友攪個 TOY-SHOW,
淨得幾日時間俾我去搵碟. 不過都夠架啦. 呢家日本都唔係剩番太多碟鋪架昨.
大阪 or 東京 ~ 我覺得大阪那邊還好過東京. 大阪那邊好多舊既鋪都仍然存在.
東京那邊舊鋪或是碟鋪都已經消失得無影無跡啦. 好多都已經被連鎖店取締晒.

  帶大家遊覽下大阪同東京既搵碟聖地. 睇下現今的日本碟鋪係咩野樣.
相比起我廿年前晌日本留學時候. 唔駛講啦. 已經今非昔比啦. 以前我晌東京~高田馬場返學.
淨係高田馬場一個地方昨. 已經起碼有5間碟鋪. 咩野形式既都有. 買新碟架啦. 二手碟啦.
黑膠碟啦. 總之. 應有盡有. 不過呢家. 想搵一間都難囉........ 唉.

  尚未摺埋既碟鋪. 趁今次機會去到影番張相留念下.
否則日後連相都無得睇架啦. 當係俾自已同大家一個回憶囉.

  先來介紹係"大阪"既梅田先啦. 梅田都已經無咩好多間架啦.
好彩梅田重有TOWER RECORD坐鎮. 我第一站就梗係去TOWER RECORD朝聖先啦.
一去到就見到娜姐隻新碟開始預售. 日本預購送Sticker, 或者係海報.





























由於整圖需時. 留位下個站再介紹第二間碟鋪.
下次再 UPLOAD 上黎俾大家睇

takeishi

  梅田~唔係剩番好多間碟鋪. 不過重有呢間. 佢都算幾耐曆史架啦.
但係價錢一D都唔平, 不過勝在種類繁多. 又企理. 搵碟又方便. 同埋. 地方都好大.
都幾多絕版野. 不過當然啦. 好貴.







  晌京王百貨地下既古書街內面有間專賣音樂產品既鋪頭. 都幾特別.











  當然重有 TSUTAYA ~ 晌TSUTAYA度訂碟真係幾方便架.
當然啦. 日本人就方便囉. 我地外國人就麻煩啦.

takeishi

  3月7日 (更新) ~ 去難波睇碟

  好啦~行完梅田. 當然一定係唔夠喉架啦. 因為梅田數埋都無幾多間碟鋪.
不過~難波就唔同啦. 難波就比較集中同埋多好多碟鋪. 數數埋埋十幾間都有呀.
有D更加十幾年前到呢家都依然存在. 對於碟迷黎講. 難波絕對係最值得花多D時間去既好地方.
佢比起東京更加多舊鋪同埋更加集中. 你可以一次過晌難波搵到十幾間碟鋪. 東京都無可能一個地方有咁多碟鋪啦.

呢間晌難波商店街附近. 上二樓既碟鋪. 拾幾年前到呢家依然不變.
店內形形式式不同種類既黑膠CD都有齊. 價錢都唔貴. 非常合理. 門口更有好多抵買既特價碟俾你慢慢掃.
第一站黎呢間都有排你睇到飽晒架啦.





















  其後再轉入去電器街. 這裡才是真正搵碟既開始.........
電器街入面好多不同種類既二手碟鋪. 好多都做左好多年依然未執. 店內既模式同以前一樣.
真係好懷念以前風光時候人人搵碟既熱鬧情況. 雖然呢家已經風光不再. 但係. 仍然搵到呢D店.
已經十分之好. 亦都好值得保留. 所以我都盡我財力. 見到有合心水既碟就買左佢啦. 當係支持下佢地.
支持下音樂. 同埋最好既一樣野就係. 佢地價錢唔會係D炒到開天殺價咁架. 好多價錢都比正價平.
而且亦都十分合理. 什至你好彩的話. 晌特價區度都可以搵到唔小好野. 我就用每隻300円掃左廿幾隻3"CD
抵到欄呀. 黑膠亦都好抵. 日本版都係千幾円。總之. 呢個地方. 足夠你行足一日啦.











  呢間絕對係地標黎架. 應該好多人都識架啦. 地方賣CD~二樓賣黑膠.
呢間又係我既最愛黎架. 次次黎都搵到D好野架.














  呢間唔駛多介紹啦. KING KONG (晌美國村) 入面
應該個個都識架啦. 又係碟迷必到既勝地. 入面真係大到呢. 搵都有排你搵.

takeishi

  3月11日 (更新~東京版) 來介紹東京既碟鋪 ............

  東京就是日本的核心地點, 去旅遊. 吃喝玩樂, 朝聖的話就是最皆首選.
東京比起大阪. 變化比較大. 好多地方都開始舊了. 所以需要番新同埋改變. 例如. 秋葉原啦.
以前聞名的電器街, 到呢家. 車站四周圍都已經變為高級商業大廈了. 無左以前舊街既感覺了.
碟鋪就更加小之又小啦. 除左買新碟之外. 秋葉原既二手碟鋪幾乎絕跡. 不過還有Bookoff既.

  我之前都有講過架啦. 今次大阪東京兩邊走. 感覺上大阪果邊搵碟比較好D,
因為大阪無東京改變得咁快. 好多舊鋪都得以保留. 而且. 大阪果邊D碟鋪比較集中得多.
東京既碟鋪呢家已經變到散修修咁. 呢隻一間. 果度又得一間. 你想行晒所有碟鋪呀.
咁你就要坐車逐個逐個站去慢慢搵啦.

  比起以前~東京既碟鋪真係小左好多好多啦. 簡直係今非昔比呀.
不過都尚有以下搵碟既好地方既. 例如有.... 涉谷. 新宿. 神保野. 中野. 池袋. 什至去遠D. 橫濱~都有
但係. 如我所說. 好多地方都只係得番一間兩間俾你行. 比較多既. 同埋一定要去既就只係得番神保町呢個地方.
不過呢次我介紹中野先. 點解. 因為我以前留學果陣就係晌呢度住過幾年. 對呢個地方十分有感情,
上野呢個地方. 似十足香港既信和中心, 有人叫佢做日本信和. 早在廿幾年前已經係年輕人同宅男既聚點.

  就由中野開始介紹先啦. 中野呢個地方. 一出車站就見到條商店街.
首先就一定要去 RAPE RECORD ~ 呢間野都廿幾年啦. 佢已經係現存最古舊既二手碟鋪,
東京無咩幾多間呢D咁既碟鋪架啦. 真係可以納入非物質遺產架啦.
一樓賣CD, 二樓賣黑膠, 分門別類. 價錢又唔貴. 我以前成日都晌呢間野搵到好野架.














  中野的商店街入面咩鬼都有, 我次次都去食番杯雪糕, 300円、勁大杯.
我誠意推薦







  商店街入面有2樓同3樓. 慢畫, 古書. CD鋪. 明星相, 海報, 模型車. 總之咩都有啦.
所以未話係日本信和囉. 淨係行中野都夠你行半日啦. 去完中野順便又可以去埋"高円寺" 或是"吉祥寺"
呢兩個地方都係值得去下架. 好多唔同既店舖. 碟鋪就各有一兩間咁啦. 順路去埋咁解. 因為只係中野既後兩個站.
我以前晌度住果陣. 成日都踏單車去晒呢幾隻搵碟架.























  800円一隻日版黑膠, 真係抵買. 見到娜姐黑膠即刻掃走佢.
是日我就晌中野掃左十幾隻CD同呢兩隻黑膠走.



  還有~唔好錯過附近都有間 DISKUNION 就晌商店街外出. 所以唔好只係行商店街就走人呀. 行埋出面外街既地方. 你會有所發現同驚喜架.

takeishi

3月16日 (更新) 東京~渋谷


遊覽過日本的信和”中野”之後呢. 起程去”渋谷”啦
渋谷通常都係去埋原宿. 行過去就係啦. 不過. 基本上原宿係好小CD鋪無.
原宿的竹下通有一間二手碟鋪既. 不過. 無咩野睇. 我通常都好小去呢間野.
渋谷仍然是十分值得去的地方. 這裡有全日本最大的TOWER RECORD旗艦店.
也可以說是渋谷的地標, 其次也有最大間的TSUTAYA , 就在路口, 相當之揚眼.
亦有BOOKOFF ,其次的也可以去BIG-CAM, LABI 買新碟. 在這裡買碟通常都有Discount的.
二手碟鋪就有最大間的RECO FANS, 裡面品種豐富. 包羅萬象. 夠你玩足一整天架啦.



TOWER RECORD ~ 全日本最大間的旗艦店. 也可算是渋谷的地標之一. (除左隻八千公之外啦)
買碟當然要到來朝聖下啦. 晌日本TOWER RECORD係最大既唱片連鎖店黎架啦. HMV都唔夠佢黎.
反而晌日本都好難搵到間HMV呀.

















唉~順便講埋HMV, 晌日本已經縮到無得再縮啦.
好多地方都摺埋左啦. 就算有都係晌D唔多覺眼既地方.
以前跟Tower Record晌日本都不相百仲架. 但係呢家HMV就變得好明顯落後得多啦.
無辨法啦. 無可厚非晌日本TOWER RECORD 已經是最強的. 無人可以同佢鬥架啦.



  TSUTAYA 就是現時坐立於渋谷最中心點最顯眼的大型CD店.
也是TSUTAYA最大的旗艦店, 日本兩大旗艦店都坐於渋谷區.
搵碟又點可以唔去呀.



  其實去 BIG CAM + LABI 呢D大型百貨公司入面都有碟賣架.
而且價錢平小小. 又可以退稅同埋儲POINTS. 其實去BIG CAM買新碟係最平最低架.
不過要儲POINT就要申請一張卡. 無地日地址係申請唔到既. 所以. 遊客就只可以退稅.
買滿1萬円就可以退稅架啦. 慳8%稅都好過無啦.





  搵工手碟就梗係要去 BOOK OFF 啦.
佢就黎多過7-11啦. 每個地方都總有一兩間晌左近.
半夜三更都可幫親. 開得早又收得夜. 搵二手碟就最開心啦.
渋谷同埋新宿既BOOK-OFF 算係最大間架啦. 唔單些二手碟.
二手書. 雜誌. GAME. 什至衫都有呀呢家. 基本上呢家要搵二手CD
最多既都係BOOK OFF架啦. 但係. 若果你要搵D好RARE, 絕版既野.
佢就一定幫唔到你啦. 你要搵呢D碟就要去D專炒碟既地方………..
例如RECO FAN啦. 不過……好鬼貴.





  好啦~呢間 RECO FAN , 又係絕對必去既地方.
佢可算係二手碟鋪之中規模最大既一間架啦. 晌渋谷開既碟鋪通常都有番咁上下規模架.
好多旗艦店都設晌渋谷呢一區. 呢間野藏碟量極之豐富. 品種包羅萬有. 除左CD同黑膠之外.
周圍既野都唔小. 雜誌啦. 場刊. 海報. TEE. 音樂書啦. 咩鬼野都有. 而且佢都有新碟買架.
地方也很好行. 所有野都分門別類. 好易就搵到你想搵既野…………











  不過. 有D野貴到嚇死, 都咪話日本人唔炒碟呀. MADONNA 隻日版HOLIDAY CD-SINGLE 居然要一萬円, 認真搶錢.
LADY GAGA亦唔平, 隻隻SINGLE閒閒趕3千円、呢D咁既價值認真唔親民.
呢D炒價就無得好講啦. 正常唔炒既碟價錢都算合理既.

















  晌渋谷的另一間黑膠碟鋪 TECHNIQUE TOKYO
呢間主要係賣D冷門些小既碟架. 以黑膠為主.
順路一定要去睇下. 話唔定有意想不到既收獲都唔定架.  





  順帶介紹一下我的鄉下……….. “高田馬場”
位於山手線池袋同新宿之間. 呢度係好多學校既地方. 早稻田大學都係晌呢個站.
我以前晌日本留學起初讀日文既時候就係晌呢度返學架啦. 呢個地方都幾寧靜.
但係站附近都有些小旺市既. 以前晌高田馬場都唔小碟鋪架. 起碼有5間以上.
呢家就淨番呢一間二手碟鋪啦. 一樓賣CD. 二樓賣黑膠. 呢間野都好耐曆史架啦.
真係倍住我長大.







行足一日. 是日的戰利品. 去日本. 除左買碟之外.
當然唔小得既係買衫. 買鞋. 買藥. 買公仔. 買化妝品啦……

takeishi

  最後一個位啦. 最後一次更新啦 (4月10日)



  呢個帖子荒廢左成個月啦. 本來唔諗住再UPDATE架啦.
因為見好多人睇完都唔回應. 又無咩反應咁樣. 所以都無心機再去完成佢.
但係最近見到有綱友回應話見到我呢個帖既精彩介紹. 真係好開心好鼓勵.
整咁多野影咁多相發個帖出黎既目的其實係因為眼見呢家世界各地唱片業委縮,
真係唔想再過多十年之後呢個世界無晒唱片鋪. 所以趁呢家留低多D回憶俾自已.
同時又可同大家分享下搵碟既樂趣. 希望可以做番小小野幫助下啦.


BTW~呢個帖既後序同埋.......... (感想)
好多朋友問我去日本邊度掃碟好. 其實. 視乎想去東京還是大阪啦.
首先. 真係唔好為左淨係掃碟而去旅行. 咁樣你會錯失好多美好既地方.
其次. 搵碟真係要花好多耐性同時間. 同一個地方我去兩次. 好多時,..
兩次都搵到唔同既野. 其實真係睇你好唔好彩撞唔撞到你的心頭好架昨.
所以~呢個就係搵碟既樂趣啦.


  好啦~介紹埋最後一個我自已覺得十分之值得去既地方, 就係東京的"神田町" (お茶の水）又名"古書街"
呢個我相信係日本唯一既地方仍然還可以保留住昔日的舊日本店舖味道既地黎架啦. 我之前都有講過架啦. 東京.
唉~已經唔同晒架啦. 要搵碟既話. 真係要分好多個唔同地方去尋寶. 好多店都分佈得散修修咁. 呢度一間. 果度一間.
反而大阪果邊就集中得多啦. 你只須要去"難波"就已經起碼有十間八間鋪你慢慢搵碟. 而且好多碟鋪都同以前一樣.
做左十幾廿年以前架啦. 唔同東京. 以前既東京係好多碟鋪架. 80年代全盛時期. 每個地方起碼都有十間八間碟鋪.
真係行到你唔想再行. 呢家. 每個地方得番一間半間. 有D什至無晒. 例如. 池袋啦. 呢家想搵間碟鋪都幾難啦.
有就有既. 一間囉. 重要鬼死咁遠. 唉.................

  神田町 (古書街) 你可以坐地鐵. 或者JR去(お茶の水）步行5分鍾就到.
佢亦都好近秋葉原既. 你晌お茶の水站行十五分鍾就到秋葉原架啦. 所以. 行完可以順手去埋秋葉原玩下.
不過. 秋葉原完全一間二手碟鋪都無晒架啦呢家. 買新碟就要去百貨公司. 不過秋葉都仍然有間BOOK-OFF俾你搵二手碟既.
我覺得呢家去BOOK-OFF搵二手碟會比較方便啦. 東京最多既就係BOOK-OFF架啦.





  呢一間~曆史最耐最老字號既碟鋪. レコート社
以前好多地方都有架. 池袋啦. 新宿啦. ...... 全盛時期起碼有十間八間分店. 呢家.
得番呢一間神田町既旗艦店啦. 呢間野好耐曆史啦. 亦都係唯一緊存既舊式二手碟鋪.
店內仍然係以傳統方式分類. 唔係由A至Z排列架. 係由日文字あ。か。さ。た。字頭開始排列架.
所以唔識日文既. 搵碟都要分D時間. 不過絕對值得花時間. 因為佢藏碟量極之豐富. 咩野類型都有.
如果你好彩的話. 重會搵到D絕版珍藏. 而且價錢唔貴. 亦唔會炒到天價幾萬円一隻碟. 呢間野.
真係我既至愛. 咁多年來我次次去都實晌佢度買袋碟先走架. 呢間野唔去. 絕對係你既損失.














還有呢間. 晌正レコート社對面. 過馬路就係架啦. 呢間就無咁大間. 不過都幾多碟.
去開當然唔好錯過. 梗係要行埋佢啦. 其實神保町重有幾間都係賣二手碟既. 不過你就真係要行耐D.
搵耐D先至搵到. 不過都係同一個區入面既. 就要花小小時間慢慢先搵到囉.





  另外有間. 又係叫 レコート　　不過無左個"社"字既.
其實 レコート日文係解唱片咁既意思. 晌唱片鋪實都見到呢隻字架啦. 呢間野唔錯架.
碟量好豐富. 亦都十分之企理. 日本人普遍都相當整齊同企理. 買二手碟十分放心.
Condition好到不得了. 你唔駛擔心隻碟會好花. 或者聽唔到. 因為佢地會check清楚同寫到明架啦.
呢間野我搵到幾隻鄧麗君既日版卡帶. 500円一盒昨. 雖然我無卡帶機. 不過買黎玩下留念囉.
日本人都好鍾意鄧麗君架. 我見佢好多黑膠都價錢唔平架. 另外我又買到隻madonna既ture blue日本版圖案碟.
4千円、唔算費. 計番起都係2百幾蚊港紙. 但係呢隻圖案碟. 我晌信和7樓果間某人寺見到佢楝價8百蚊.







  除此之外呢. 神田町都有DISK-UNION既. 呢間DISK UNION好大架. 有兩層.
不過我就無影相. 因為DISK UNION好多地方都有架啦. 去到記得入去行埋佢啦. 包你有意外驚喜.
價錢都貴. 一D都唔平. 要搵平野. 呢隻幫你唔到啦. 不過要搵特別野. 呢度就好多...... 包你嚇親.






  重有呀~神田町 (古書街) 唔好錯過古書啦當然, 有一間專賣偶像產品既店我好鍾意架.
ARATAMA 呢間野又係好耐曆史架啦. 賣二手雜誌同埋偶像海報產品. 咩野都有. 什至連MADONNA海報都搵到.
平均500-1000円張海報啦. 什至連宣傳板. 成個人咁高既人形紙牌都有. 遠至咸豐年前既山口百惠. 去到近期既AKB47
你都可以搵得到. 呢間就真係簡直係音樂副產品既博覽店. 呢家都幾難可以搵到間咁既野架啦.

dc903

takeishi 發表於 2015-3-5 14:42
最後一個位留俾東京~中野既二手碟鋪

首先感謝takeishi兄的精彩旅日報告, 還預先留空位給相片upload, 讓大家可一次過看相而不用轉下一頁!  
會繼續留意師兄的最新上載相和報導, 謝謝先.  

cwyip

長期置頂 真正為音樂迷高質post 日本買harmonix 釘都平香港近四成

jasugun

正!! 每年去日本掃碟已成指定動作

粗人敵卡

睇睇先