惡有惡報，因果循環《一夜狂逃》Run All Night 觀後感

jayjay · 發表於 2015-3-19 13:21

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

本帖最後由 jayjay 於 2015-7-20 16:12 編輯

(, 下載次數: 0)

嚴格嚟講,《一夜狂逃》(Run All Night) 係我今年內第一套入戲院睇嘅戲。上一次入戲院已經係喺上年最後一日, 睇《救參96小時3》(Taken 3) http://post76.hk/forum.php?mod=viewthread&tid=205527,雖然係爛片,但係有得欣賞我偶像Liam Neeson嘅精湛演技, 我仍然唔覺有乜損失。

執導本片嘅西班牙國寶級導演Jaume Collet-Serra簡直係我近年來最信得過嘅導演之一, 雖然佢同Christopher Nolan比仲尚有不及,但係功力已經拍得住Matthew Vaughn。導演自從喺2005年憑驚悚片《House of Wax》成功確立佢喺美國影壇嘅地位後, 再喺2009年憑同樣係驚悚片嘅《孤疑》(Orphan) 更上一層樓, 更變得聲名大躁, 但係產量並冇因此而變得好似Ridley Scott咁多產, 果然物以罕為貴。

《一夜狂逃》已經係第三部導演同Liam Neeson合作嘅動作片，之前已經喺《無名殺機》(Unknown)、《直航殺機》(Non-Stop) 合作過, 呢兩部前作口碑極佳，而且都係低成本製作，平均耗資4千萬美元，兩套加埋已經喺全球收咗3億5千萬美元，認真刀仔鋸大樹！

《一夜狂逃》應該係導演目前嚟講處理得最多大牌演員嘅作品，演員陣容非常強勁，除咗有Liam Neeson孭飛做男主角，仲有同Liam Neeson年紀相若嘅金球影帝Ed Harris、新版「Robocop」Joel Kinnaman、Vincent D'Onofrio,仲有啱啱先攞完奧斯卡最佳電影原創曲嘅Common, 簡直係星光熠熠。

選角適合已經係電影嘅成功嘅第一大步，因為就算編導寫個劇本寫得幾龍飛鳳舞都好，如果角色唔啱演員，電影一樣會一敗塗地。呢點真係要讚導演眼光獨到，難怪佢每次拍動作片都只會放心揾Liam Neeson孭飛。

雖然《一夜狂逃》故事極之簡單，並冇好似《無名殺機》、《直航殺機》咁有懸疑性，但係人物關係刻畫得細膩，劇情爽快淋漓，追迫力十足，証明一個簡單嘅劇本亦都可以炮製出好電影。而且，本片亦有不少感人位，有一幕更加令我大受感動：老豆Liam Neeson同阿仔Joel Kinnaman講:「Once you pull the trigger, you're no better than I am.」; 老豆Liam Neeson雖然係殺手，但係都唔想個仔步佢後塵，踏上不歸路。故事寫得合情合理又有教育意義: 職業殺手Liam Neeson同黑社會大佬Ed Harris之前做咗好多傷天害理嘅嘢，即使金盤洗手，報應仍然會揾上嚟，不但報喺佢哋身上，仲會禍及親兒，亦令到我聯想起近日某位香港領導人嘅千金小姐。此外，編導極有心思，將黑幫同警察寫成同一類人，完全切合香港現今政治環境, 令我即刻產生共鳴。電影結局非常震撼，簡直令人黯然神傷，完全印證本片海報標題「No sin goes unpunished」。

由於《一夜狂逃》嘅動作場面遠較導演前作多，我入場前真係有啲擔心導演駕馭不來，結果，導演冇令我失望！導演處理動作場面十分出色，鏡頭功夫亦架功十足，打鬥場面雖然唔算美觀，但勝在夠真實，已經拍得住《叛諜追擊三部曲》(The Bourne Trilogy), 飛車場面雖然遠不及《狂野時速》(Fast & Furious) 系列，但係已經狠狠揮低去年《極速激戰》(Need for Speed) 嘅造作!

個個演員都做得好稱職，Liam Neeson同Ed Harris演技無需置疑，對手戲非常有火花，Joel Kinnaman演技亦成熟咗好多，Vincent D'Onofrio亦將佢辣手刑警嘅角色演得入型入格，Common對白不多，但勝在夠震懾力，完全成功演繹出殺手嘅冷血無情。

總結，《一夜狂逃》係我近年來睇過最好睇的黑幫片！

評分：85 / 100

(, 下載次數: 0)

[YoutubeHD]dq4dzuJWSTE&feature[/YoutubeHD]