遲來的《Titanfall》 遲來的玩後感

@肥狗仔@

由Respawn Entertainment打造的射擊遊戲《Titanfall》玩咗已經有一星期，感覺算得上係失望。

作為登陸次世代主機的作品，首先60FPS係本作的優勢，但畫面撕裂非常明顯。各種特效，貼圖亦唔見到屬於次世代的產物。

而在6 V 6的戰鬥中，泰旦並唔係亮點，反而將故事劇情與多人遊戲共冶一爐先係比較獨特的一個元素。以戰役模式為例，雖然都係咁打，但相比起其他同類遊戲，本作一開始的電影運鏡及動畫已經先聲奪人。而當出現敗方之後，敗方要在限時之內登上飛船著草，過程可以話比勝方更刺激及有成功感。所以@肥狗仔@每次都希望自己隊人打輸，好讓可以上演一場又一場的大逃亡。

除咗劇情動畫，地圖上的唔同物件好似中立機械人，可駭入炮台，外星生物仲有太空船都為每場配對提供足夠的場景互動。@肥狗仔@玩咗好幾鋪已經全完接受這個架空世界。

至於Bot我唔能夠話佢做得出色，事實上佢可以稱之為雙面刃。除咗刷泰旦﹑壯膽同埋增加戰場氣氛之外，bot的存在就係為咗消耗玩家的彈藥還有混淆視聽。若果係純粹增加視覺衝擊的話其實還可以，但若果以多人遊戲設計去睇，哩種bot個人覺得只會令遊戲變得稍為唔太公平，因為佢地本身唔係無差別攻擊的。當你扣靜一滴血嘅時候比bot臨門一腳做低，可想而知會幾咁無奈。另外因為每軍只有6個人，若果有幾個上左泰旦，之後玩家大部份時間就會同bot開片，咁已經係有違多人遊戲的本質。

Bot固然係個爭議位，不過@肥狗仔@覺得本作其實成個設計上都出咗事。即使係冇任何bot，以現時的設定，所有玩家都可以招喚泰旦，咁無泰旦的玩家用反泰旦武器及二段跳當真就可以以小打大嗎?當然唔得。而如此一來，每當有泰旦出現的時候，一般玩家的攻擊目標/指數就會變相減少，愈多泰旦出現只會愈冇癮。

另外泰坦與bot的出現都令遊戲變得頗為公式化。正常黎講想贏，泰坦愈多愈有利，要取得這種兵器，玩家唔想企起度齋等一兩分鐘就要不斷殺人或bot，其中後者佔大部份。泰坦出現後，玩家開始體驗哥斯拉般的遊戲性，但歡樂的時光過得特別快，一但泰坦被破壞，玩家就要重覆之前的步驟，然後一直loop。那怕遊戲提供不同的對戰模式，然而只要這種公式化的刷泰坦設定仍然存在，單靠每隊6人根本好難玩得出什麼戰術及戰場張力，玩家的熱情亦好快燃燒殆盡。哩款出咗半年多啲嘅《Titanfall》哩家已經好少人玩，相比起HALO及Battlefield這些長青樹，Respawn Entertainment或者應該意識到一款好的多人遊戲唔需要太過花巧，一個能夠發揮團隊戰略的玩法加一個具深度的對戰地圖足以勝任。

整體黎講《Titanfall》的確為玩開COD的玩家帶來新鮮感，但哩份新鮮極其量只係能保持三分鐘熱度，其華麗的背後其實只係將一大堆單人遊戲元素放入多人遊戲當中，結果卻忘卻了多人遊戲最重要的關鍵造成本末倒置的局面，實在叫人可惜。

個人評分: 8/10

milksaint

窯得好!!!