大叔強勢回歸《Tom Clancy’s Splinter Cell Blacklist》試玩會後感

@肥狗仔@

由Ubisoft發行，Tom Clancy王牌間諜遊戲最新力作《Tom Clancy’s Splinter Cell Blacklist》將於8月20日推出。距離發售日仲有一個星期，@肥狗仔@早前就代表Post76出席咗由Ubisoft舉辦的遊戲試玩會，有幸搶先一步玩到本作的雙人合作模式。

《Tom Clancy’s Splinter Cell Blacklist》故事延續《Conviction》的發展，講述系列主角Sam Fisher帶領新成立的第四梯隊，到世界各地阻止恐怖組織實行攻擊美國設施的”黑名單”計劃。在試玩會開始之前，應邀到場露兩手的人氣女槍神Kali為在場人士，即場演示了遊戲其中一關。有關試玩全程約長十五分鐘，為9月5日推出的中文版本(英文版將於本月20號上架)。

這個單人遊戲關卡屬於遊戲中後期情節，玩家要控制Sam Fisher潛入最終BOSS的秘密基地。《Blacklist》承繼前作經過革新的系統，以爽快暗殺及潛入為主打。在蹲伏狀態下不會發出腳步聲，配合”lock on”系統，玩家能夠一次過將3至4名被標記的敵人同時擊倒。不過若果你認為本作純粹是個畫面強化版本咁就大錯特錯。《Blacklist》在前作的系統基礎下新增了不少既好玩又有趣的新元素。

在Kali的演示下，我地嘅Sam哥重新著上佢件潛水服style戰衣，身手亦敏捷咗。今集玩家可以好似《刺客教條》咁樣進行攀爬動作，以到達目的地或者其他隱閉嘅地方。由於試玩關卡禁止玩家觸發警報，所以Kali都玩得步步為營，避免俾敵人發現。進入下水道後，開始會有新加入的狗隻敵人。佢地行動迅速，即使Kali已經提早拎出電系榴彈，但仍然被多隻雙眼發光的巨犬得逞(> <)。進入基地內部，玩家開始可以明刀明槍與敵人駁火，哩度我地見到喺Sam曾經停留過嘅地方會出現一個透明分身。冇錯，《Conviction》引入的誘敵系統仍然發揮著功效。只要玩家在某個位置吸引敵人火力，並迅速離開，便會釋放分身，令敵人短時間內誤以為分身就係Sam本人。

本作有個明顯不同之處，就係重新應用三管燈的夜視與熱能探測功能。喺前作，即使恐怖份子忘記交電費，場景再黑玩家仍然可以通過”黑白對比”畫面清楚觀察場內的一草一木。而黎到《Blacklist》，Sam Fisher的視力出現衰退情況，遇見漆黑一片的環境必須打開夜視鏡探路。當然，上集的睇穿牆利器” 聲納感應”功能依舊存在。夜視鏡的回歸，可能為系列忠實玩家帶來少少美好回憶，至於同樣係新加入嘅近戰刀仔，Kali並冇太多機會去示範罷了…(影音室內亦擺放咗隻Kinect，玩家可以用語音下達各種指令(限X360版)，但可能因為怕尷尬，最後都係得個擺字。)

目標達成後，Sam哥吸入毒氣暈倒過去，醒返嘅時候已經落入BOSS手中。演示最後講到同屬第四梯隊的Briggs破窗而入救出Sam，而BOSS則趁機逃走。值得一提是中文版本連遊戲中的巨型文字提示都會進行漢化，效果十分醒目。識中文嘅人好難會唔清楚任務目標。

單機演示結束後，下一個環節就係雙人合作模式。Kali會邀請在場嘅記者朋友同佢進行雙人合作遊戲。不過喺開始之前，Kali都順便介紹一吓《Blacklist》另一個特色 — 基地升級功能。第四梯隊之所以能在短時間內穿梭世界各地，全賴其實際上係一架空中霸王的移動基地。本作中，任務與任務之間都有一段過渡情節。期間就好像RPG遊戲一樣，玩家控制Sam哥在飛行中的基地內四處遊走，並可以與不同人物進行對話。亦可以在大地圖上實時選擇玩單人任務，多人遊戲或者是合作模式。基地都唔係得個睇字，玩家喺任務中所賺取嘅積分可以用作基地升級，例如將監牢設備食宿質素提升，被囚人士感到滿意，繼而為玩家提供更多黑市武器。聽起黎好天方夜譚，可能哩啲就係美國向恐怖份子談判嘅方式吧。

講到升級，Sam的武器及裝備當然走唔甩。今集槍以外包括角色能力﹑特殊武器等等都能夠升LV。Kali補充到，玩家殺敵嘅方式同當時使用嘅武器都會影響所賺取分數嘅多少。換句口說，如果想買更多武器，玩家必須使出更多元的殺人技量。

當日嘅雙人合作用咗一個比賽形式黎進行。只要挑戰者殺人殺得多過Kali就會得到香港冇得賣的Sam Fisher手辨一隻，輸咗都會有三管燈造型手錶一隻。聽到輸咗都有野送，向來貪小便宜嘅@肥狗仔@立即以驚人速度舉起雙手身先士卒挑戰哩位傳說中嘅爆頭女神。最後果然行先死先，過程就…唉…唔開心嘅事我唔會記住。

先不論本人嘅技術有幾差，這個雙人合作模式和前作的還是有點不同。首先玩家所使用的人物為Sam和Briggs。而有關任務雖然有一定主題，就是圍繞著第4梯隊的支線任務，但基本上和主線任務冇咩劇情關連。情況就好似《Halo 4》的斯巴達模式一樣。 另外今集既收錄了一貫的合作清場任務，又新增了類似持久戰的任務。然而玩家要與戰友迎戰一波波的敵人，絕非易事，事關今集白天場景大增，利用黑位穩藏自己在哩類場景已經行唔通。而敵人亦非近視的，所以一不小心真係會名副其實俾成村人圍。

要避免成為累街坊果個，玩家之間的合作至關重要。例如走位，開槍時間等等。特別係敵人驚覺中伏時身體會大幅度移位，如果攻擊時間唔同步，咁就好容易會有悲劇發生，事關玩家嘅血量都唔多，平均中五槍就中進入垂死狀態，要等隊友過黎做人工呼吸(講笑)復活。而當天我與HKCC版大雙打嘅時候往往就會發生其中一個玩家(通常係我)死喺冇雷公咁遠，而另一個玩家連自己都顧唔惦，就算走得切過去都好大機會雙雙倒地。可見構通嘅重要性比起前作更加高。

儘管試玩嘅時間唔長，但極其豐富嘅內容已經從中滲透出來。事實上，同時擁有單人/多人/合作模式過往只有《Chaos Theory》一集做到。今集《Tom Clancy’s Splinter Cell Blacklist》再次黎個重鎚出擊，以系列最強作嘅姿態登陸哩個大作雲集之年，不論係咪系列支持者都唔應該錯過。喺度再提大家一次，本作嘅中文版本將於9月5日推出。而英文版就會提早喺8月20日登陸PC/PS3/X360及WiiU平台。

當日嘅戰利品^^

teddyng637

好期待

FKC_Tony_1024

你就好啦，有得去試玩會
我等唔切，訂咗英文版
check pm
(Post76 Android 手機版送出)

SonSon

想當年只係玩過rainbow six 咋

ryanytwong

正詳盡報告

@肥狗仔@

多謝各位Ching加分~今集感覺挑戰性會大幅提高，但若果你仲期待遊戲會走返1至3代的style就好大機會失望。

lkljason

新手會唔會難上手？之前隻hd版玩左一陣就無再玩了

@肥狗仔@

lkljason 發表於 2013-8-18 01:36
新手會唔會難上手？之前隻hd版玩左一陣就無再玩了

HD合集收錄左1至3代。最初幾集個gameplay係設計成"避開敵人"，並加入唔同rules，例如有腳步聲，殺人減分等等。去到《Conviction》以至今集《Blacklist》就被設計成暗殺清場。包括行路無聲，殺人lock on。所以如果話HD版比今集難度高我比較同意，因為當年隻game就要好似蛇叔咁打，俾人發現收皮率超高。但本作根本上就有好多殺人設計，清場總容易過潛入，不論係明殺定暗殺。

lkljason

@肥狗仔@ 發表於 2013-8-18 10:36
HD合集收錄左1至3代。最初幾集個gameplay係設計成"避開敵人"，並加入唔同rules，例如有腳步聲，殺人減分 ...

明白！咁睇黎可以一玩喎！Thanks肥狗兄

jayzhk

我等中文版