一個認真的報告 Mordaunt-Short Performance 2

siuping

繼年多前出了一個不能不分享的報告 P5C, 令更好多師兄 留意 M-S 這個牌子，亦有唔少師兄入手次一級但擁有旗艦級7-8成實力的 Mezzo 5。揀選 speaker 最緊要係合自己心水同眼緣，第一樣可能係 budget，其次係口味(自已聽過)或者口碑(未聽過)，跟著亦都係好重要既因數就是外觀。這年多以來不斷受到毒害，把本來已經接近放棄既 2-ch 器材都由床底反了出來， 反反覆覆試過亦想過其他的前置喇叭，最後係要逼我俾出多過一倍既禮金，又要安撫家中正室，娶呢位內外兼修的 Mordaunt-Short Performance 2 二奶。

上星期出了 P2 的開箱文，詳情及玉照請到以下連結:
http://post76.hk/forum.php?mod=viewthread&tid=162876


當日Yuppi 兄幫小弟做咕喱搬喇叭番屋企，剛好在樓下撞到叮噹兄，於是就順便上埋小弟屋企做客，辛苦一輪裝好腳架後，大家就二話不說，試播一張不久之前用魔改版 oppo 105 聽過既 CD 【Winterplay K2】，當時借來魔改 105 與小弟既 CD 機比較一下分別，上次用舊喇叭時105整體平衡度相當高，人聲及樂器分隔度更好，音色順滑，低頻控制恰當，聽感自然舒服，如果佢係一部 95魔改版，我一定會留低佢取代我的 93… 好了，緊張時刻開始，一按下 CD 機 PLAY 制，大家立時屏住氣息，八隻耳仔細心聆聽，過了不一會，可能只是十數秒已經俾反應: 「好深…」。

P2音場既闊且深，加上提升既高度，令整個空間變得相當立體，一向好羨慕一些 HiFi 鋪入面營造既氣氛感覺頓時有點浮現出來。Track 8 開首用上低音大提琴，雖然低頻控制力不及 105，顯得鬆散甚至有些 boom，但整體感覺有著播放 105 既影子，而且更細緻非常，更有包圍感，真係一個好大驚喜，起初擔心小弟 CD 機年事已老影響測試，如今就好似還我 CD 機一點清白，估計係當時的舊喇叭似有錄音室監聽用的特點，凸出了部份音域，比較難兼容粗線條的輸入，心想如果能再配以魔改105做音源，效果可能更目瞪口呆也不定。

幾日後做了少少調整，包括 CD 機不經濾波插頭，買了石英沙灌喇叭腳，換走hybrid後級的跟機膽，每樣調整都帶來正面既改變，令人聲及樂器線條更具體，加強了質感，但始終受AV amp 前級特性的影響，睇戲時在多聲道下聲底始終較薄，結果決定提早換入5009，連接hybrid後級再調配電源線，聽CD時低頻再沒有 boom 還保留之前既優點，所以下面的測試結果係由經過多番調配既組合得出，暫時算係收晒貨…

測試器材:
CD Player - Denon 2560GL Limited Edition
BD Player - Oppo 93
Amp - Onkyo 5009
Power Amp - Sound Audio HBP 60A
Sub - Ken Kreisel Sound MX-5000 Mk3 / DXD-12012
FS - Mordaunt-Short Performance 2
CS - Mordaunt-Short Performance 5C
FH - Mordaunt-Short Genie 402
SR - Mordaunt-Short Genie 402
SB - Mordaunt-Short Genie 402

器材更新 @23-07-2013:
更換 RCA 線後改以 Oppo 93 為 CD player

測試 CD:

呢隻試音碟係小弟買第一對 Proac Tablette 時入手的，年份有番咁上下，入面有各種精采錄音，還包括音場定位測試，Track 3 是測試多種樂器和人聲的聲效，比較以前玩膽機時的書檯喇叭，如今所有聲音的移動都繪形繪聲地刻畫出每個部份，令整幅畫面逼真非常，在大棚場面下顯得更有說服力，而且更重要係唔會令你產生不必要的壓逼感，這同之前提過 P2 擁有非常出色平衡度和分隔度有關，造就出真實又耐聽的音色。當然P2 絕非完美，在播放一些單件頭弦樂樂器時，缺少了以前那種彈跳入肉既韌度，相信係 5.5吋中低音單元速度不及 4-5吋單元的緣故，但換來比較清晰及更好伸延性的低頻，可以話在書檯喇叭上是絕對可以接受既妥協。

再試一隻好舊既 CD，李克勤 一千零一夜，揀佢既原因有兩個，第一係有小弟最喜歡既歌「雷雨」，第二係老細覺得換了5009後沒有以前的自然感，覺得太厚重，後來靈機一觸換了之前插 hybrid 後級的 acrolink 4030 給 5009，結果老細都承認今次係最好聽舒服，最有feel 的一次，過多的 boom 也消失，佢終於明白原來換條電源線係有咁大分別。這隻早期混音既 CD 擁有深闊音場，結像不似現代那種正正在你面前既演釋，而 P2 在這套器材配置下，空間與空氣感都過之而無不及，音色甜而細滑，把混音效果發揮得令我非常感動，就這樣不知不覺翻聽了多隻 CD。


測試 Bluray:

到大家最關注既部份，今次亦都請來有「小金耳朵」之稱既家中老細做坐上客，因為佢係極少數能夠坐定定去聽音響而又可以指出問題既女性，有時更比我客觀細膩。一如以往，亦都係大部份人會挑選既小妹妹 Jackie 兩首歌，亦一如以往，小妹妹歌聲明亮精緻，但我其實係想講一下 Jackie 之後的一隊組合 The Canadian Tenors。用舊喇叭聽時老細對佢地沒有特別感覺，但再翻聽之下佢竟然話「原來可以咁好聽喎… 如果現場真係會好好喎…」 P2 可以細緻地表達歌手細微感情和弱音變化，密度豐富得把整個現場氣氛也浮現出來，週圍觀眾的反應在換了5009後變得更緊密更包圍，已經解決了之前多聲道時聲底偏薄既問題。

最後一隻好想試既電影係 The Book of Eli 末世天書，原因係之前在某器材測試會裡感受到一段槍戰既震撼，之後到Yuppi 兄家拜訪時播出同一段測試，竟然俾我感受到有 8-9成相似度，今次小弟有幸得 Yuppi 兄這位 Onkyo professor 相助 setup，究竟可以有幾大進步呢… 由於今晚已經夜深，在此先賣一下關子，下回再講…

siuping

本來測試電影最大影響取決於 AMP，中置和subwoofer，佔有七成以上的影響性，但今倘係我首次完整地用上全套 M-S 組合搭配 5009，測試片段係 The Book of Eli 的一段槍戰場面，當 Denzel Washington 要離開時，副手從背後發出的一下冷槍，子彈遭反彈打中左邊既金屬壺，整個行程都明顯超出喇叭擺位範圍，片段入面既聲音不止要走遍用盡你所有空間，還再要伸延和營造出立體感既畫面，這毫無疑問係 P2，P5和其他喇叭既配合達至。槍戰中的手槍，步槍和霰彈槍等，以不同性質低頻沖擊埋身，換了5009後，曲尺開槍的打心口感覺更有質感，霰彈槍打出後尾音的層次更感震撼，以前用舊Amp時係未有體會那些令胸口騷癢的感覺，如今就似把 KK subwoofer 解封了一樣，包圍的低頻帶人處入一種壓迫感，比起當日在試音室的情況雖然各有點不同感受(因空間距離，音壓和器材特性不同等等)，但整體保守計有7成以上的效果，相信這次升級目標已經在最有限 budget 內達到。

總結:
不同喇叭品牌都有自己特性專長，有些會著重高低伸延能力，有些會凸出人聲或樂器線條，又有一些會加添自家味道，而 M-S 呢…  我認為係一個以合理價錢打做出混合當代美學與科技，擁有驚人清晰度及細節且兼顧平衡度既品牌，響現今推行高清既年代，係顧及影音兩雙全既演釋者。

pclai2000

好詳細。多謝分享

yuppi

我淨係幫你 Auto cal 一次同較吓 d level, 吾好令人誤會。

beginners

Thx for the details report, will wait for the 2nd part.

siuping

yuppi 發表於 2013-7-15 11:54
我淨係幫你 Auto cal 一次同較吓 d level, 吾好令人誤會。

你係 Onkyo 配 M-S 元祖， d 分頻點同其他 setting 都熟晒，見你求其整兩整就試得聲，好似 d 神醫把幾秒脈就開得藥…

siuping

pclai2000 發表於 2013-7-15 11:31
好詳細。多謝分享

Thx for reading~!

chacha1222

Good job{:9_434:}

roychong

正呀Ching! 玩得開心D!我都想買石英沙喎，邊度買嫁?幾錢?

tobis

詳細分享,精彩