Denon A110 系列一門四傑到港 |《幽靈刺客》4K 藍光修復版 | Sony 電視可睇 Apple TV !? | 大單元 1More 全新無線耳機【本週熱話 | 24-Oct】 | Post76玩樂網

Denon A110 系列一門四傑到港 |《幽靈刺客》4K 藍光修復版 | Sony 電視可睇 Apple TV !? | 大單元 1More 全新無線耳機【本週熱話 | 24-Oct】

《幽靈刺客》將於 12 月初推出 4K 藍光修復版影碟【藍光資訊】

由華納發行,改編自 Marvel 旗下嘅角色動作片《幽靈刺客》係90年代尾推出嘅電影作品, 1998年上映時全球票房勁收1億3千萬美金。由於電影大收,之後更加喺 2002 同 2004年推出第二同第三集,當時聲勢可謂一時無兩。近期都好多舊片會重新再做 4K 影碟,華納亦都宣佈將會喺 12月初推出《幽靈刺客》4K 藍光版,用上 4K HDR 影像規格同埋 Dolby Atmos 音效,而花絮部分就沿用之前所有嘅幕後訪談。由於華納早前已經放出咗一條修復版預告片,而且佢哋之前嘅 4K 修復藍光系列都一直保持住極高評價,預計呢套戲喺影音效果上都會值得大家期待!

《幽靈刺客》將於 12 月初推出 4K 藍光修復版影碟【藍光資訊】

傳 Sony 將為美國地區指定電視型號追加 Apple TV App 支援【電視資訊】

有美國媒體指出,Sony 電視最近宣布將會為指定型號嘅 Android 電視系列,推出 Apple TV App 功能支援。其實加入 Apple TV App 並非新鮮事,最先加入呢個功能包括有 Samsung 電視系列,之後 LG 電視系列亦喺支援名單之中。值得留意嘅係今次首次有 Android TV 可以對應 Apple TV 嘅功能,大家可直接利用電視上嘅 App 收睇 Apple TV+(Plus) 嘅原創内容,仲可以用到 Apple ID 帳戶買戲或者租戲睇添。如果係真嘅話,Sony TV 用家應該會好開心喇!

傳 Sony 將為美國地區指定電視型號追加 Apple TV App 支援【影音資訊】

《狂野時速》系列將以11集作終結 盛傳奇洛李維斯將加盟外傳續章【電影資訊】

原定會喺今年上映嘅新一集《狂野時速》因為受新冠疫情影響,將會推遲至下年4月2日。而導演亦都把握時間做後期製作,更盛傳《狂野時速》正傳將會以第11集作大結局!另外電影公司已經為外傳《狂野時速:雙雄聯盟》加開續集同埋添食作,為未來十年嘅系列發展作部署。而上個月女主角 Michelle 接受訪問時仲透露,《狂野時速 9》會加入飛車出「外太空」嘅場口添。而演員陣容除咗有元組班底外,兩位奧斯卡影后:查理絲花朗 同埋 海倫米蘭 都會繼續歸隊。而最近更傳出電影公司正密切考慮邀請《殺神 John Wick 》男星 奇洛李維加入添!令外傳故事更加具可觀性。

《狂野時速》系列將以 11 集作結︱盛傳 奇洛李維斯 將加盟外傳續章【電影資訊】

1More 全新無線耳機 ComfoBuds 13.4mm 單元聽出嚟係咩感覺?!【耳機資訊】

提到 1More 呢個品牌嘅耳機,第一時間應該會諗起「電競」喇!而最近佢哋再向大家日常使用嘅無線耳機入手, 推出全新 ComfoBuds!採用咗比一般無線耳機更大尺寸嘅單元。以往一般藍牙耳機都只有 5mm-6mm 甚或 8mm 嘅單元,大家已經相當滿意。但今次 ComfoBuds 用上更大嘅 13.4mm 單元,令到低音更澎湃,而人聲理論上亦都會更飽滿,聽感應該都會更有動態添!建議零售價只係 $429,真係非常有競爭力呀!

1More 全新無線耳機 ComfoBuds 13.4mm 單元聽出嚟係咩感覺?!【耳機資訊】

Denon AVC-A110 8K AV 擴音機 天龍 110週年家庭影院矚目第一擊【影音資訊】

天龍 Fans 要注意喇!110週年慶典已經嚟到香港喇!今次一嚟就一門四傑,你又會睇中邊件呢?小瑟日前就出席咗天龍嘅發佈會,佢哋仲請咗威廉Sir 講吓點睇今次四部唔同嘅 A110添!如果大家睇過啲網上資料,都知道今次週年版嘅新產品都係採用咗石墨銀配色,當眼處更加有 110週年慶標誌,用嚟突出特別版嘅特殊身份。由於四件新產品都經過品牌嘅專業團隊 Denon Sound Masters 作調音,並且全程喺日本製作,所以喺音質、用料、造工甚至係調音上都有另一番體會。大家最留意嘅一定係 AVC-A110 呢部 2020年 A1版本㗎喇,香港嘅定價係 $42,800,110週年只得一次,如果你係 Fans又會唔會入手呢?


🙋‍ ★ 想睇版友討論以上文章?? 《點我進入討論》

🏠 ★ Post76網店經已開幕 《store.post76.hk》

小瑟

關於小瑟

一名永遠的入門玩家, 對電影, 音樂, 影音等玩意永遠雀躍, 其後為了可以將這個毒海無涯信念推展開去, 故建立了這個毒人唔洗本的影音娛樂資訊平台, Post76玩樂網.

觀看所有 小瑟 的文章 - 網站

相關文章