都係換左英國喇叭 – Mission LX 前中置入手分享

緊接前傳突破宿命殺上 Sony A1 4K OLED 55″ 安裝記, 大家可能都會係相片中睇到小瑟已經換上左同之前不同的喇叭, 早前小瑟用的係KEF XQ系列, 係由太座生日時送給小瑟的生日禮物, 原來唔覺唔覺, 大大話話都已經用左好幾年了, 今年又係咩原因會換上前面呢三隻MISSION LXC同 LX2呢??? 其實係咁既……..

都係換左英國喇叭 Mission LX 前中置入手分享

體驗會後見版友即買…..激起身痕的感覺!!!^^"

話說上次做 Mission LX 的活動時, 現場真係有幾位版友聽完之後就直接係東哥度入手對 LX2, 老實講, 聽完個效果之後, 再聽埋上次比版友既價, 小瑟真係好想好想借返屋企試下係咩一回事, 因為上次活動之中的確係比到小瑟一個完全唔似係佢身價(LX2只係2千尾, 三千頭)的感覺, 而且呢個尺寸基本上係同小瑟家中的 KED XQ10係差唔多的, 所以的確係非常身痕好想在家中一試其效果, 就係咁, 就硬著頭皮問東哥可唔可以借一套 LX2同 LXC前置同中置喇叭比我返屋企試真D呢!! 就係咁, 呢三隻 Mission LX2同 LXC就返左小瑟宮中呢.

mission_lx_04

mission_lx_05

雖然入門喇叭   但高低音單元設計都唔野小….

老實講, 小瑟一直都沒有試過 Mission 的喇叭, 今次試 LX 系列都係因為聽過覺得真係幾唔錯, 所以就借來玩下, 當然又係衰左啦^^", 不過今次真係好抵玩, 感覺同效果都明顯好左, 幾千蚊就死就死, 入左佢啦XDDD. 先講下 LX系列有咩內涵先, 首先今次 LX 系列係專登搵來德國音響工程師負責設計, 為改善箱體諧振而將箱體的厚度加強, 而其「超細纖維」軟半球體高音單元, 將高音可延伸性提升至 30kHz, 高音伸延更闊更廣. 而低音單元就用上 「Advanced Fiber (人造纖維) 振膜」,據講用這物料係希望可以將單元的聲底跟公認自然好聲的「紙盤」做得更似, 營造返相似效果之餘, 仲可以更耐用. 另外大家都應該會留意到 LX 系列的高音單元位處低音單元之下, 原來其理念係考量到兩個喇叭單元發聲時的相位問題, 以收窄高音單元 / 中低音單元之間的時滯,令聲音有更精確還原. 另外不得不講既係其實 LX-2 亦獲得 2016 年的「What Hi-Fi 大獎」, 表揚其性價比過人之處。呢個性價比就岩哂我地呢D影音友啦!!!

mission_lx_02

mission_lx_06

mission_lx_07

mission_lx_08

mission_lx_09

東哥指 LX 系列的分音器非常講究,即使是入門級的喇叭價錢亦交足功課有餘。
上次東哥話 LX 系列的分音器非常講究,入門級的喇叭都用靚料,亦係小瑟失守的原因之一。

換埋中置喇叭的困惑!??

就體型上, 小瑟的前置喇叭 LX2同之前的 KEF XQ10 係 FIT 到冇野好講的, 但中置 LXC 就同之前的 XQ50c 就有明顯的分別了, 因為 50c 的尺寸明顯比 LXC 大, 所以究竟小瑟應該一套咁換, 定係只換前置呢??? 因為小瑟都叫做上過下堂, 學過下小小影音的課程, 當日 THX 的老師都提過, 其實最好的影院當然係全部喇叭都用哂同一喇叭品牌及同一型號就最好, 如果唔可以同一型號最小都要同系列, 就係因為咁, 所以小瑟就最終都決定前面三隻喇叭都用返 Mission LX 來做前面三隻喇叭, 而後置同上前置就暫時先用 KEF 蛋仔頂住先, 再用 Pioneer LX-901的 MCACC PRO 設定一次, 用 MCACC 的 EQ 將所有聲道作一致性的處理, 雖然未到完美, 但用來作暫時性止咳方案絕對唔係問題呢.@@"

mission_lx_10

mission_lx_11

mission_lx_12

mission_lx_13

mission_lx_14

mission_lx_15

mission_lx_18

其實真係好蚊水…唔係講笑的!!!

其實小瑟換左 55″ TV之後, 個櫃的位置都真係好蚊水的, 大家可能係相片未能睇到究竟係咩一回事, 所以小瑟就專登影左二張相比大家睇, 依家對前置喇叭其實係一定要行 Toe-In 先可以唔阻住電視的觀賞畫面, 仲一定要坐係皇帝位先可以唔阻, 如果坐沙發的左右都會有小小的阻擋的……#_# 所以話香港地玩影音, 大家都係面對同樣的問題, 就係土地問題. 不過就算係咁, 小瑟都唔會放棄的呢??? 就以早排小瑟係 Youtube 睇到D網友回覆我地D片話 “地方咁細不如唔好玩" 之類既說話, 但我又唔係咁睇, 地方再細, 都應該要抱有夢想, 如果人冇夢想, 同條咸魚有咩分別??? 玩家庭影院呢個夢想係小瑟由細到大的夢想, 小瑟好細個已經希望可以係屋企呢個最舒服, 最自在的地方, 變成一間小小的影院, 無論大畫面又好, 小電視都好, 都一定要擁有一個, 所以大有大玩, 細有細玩相信呢個想法永遠都唔會變呢!!!^^"

mission_lx_19    mission_lx_20

mission_lx_21

mission_lx_22

Conclusion :「家庭影院係整體合作的團隊   最緊要全面的包圍感同實在感!!!」

同大家講完咁多口水, 係時間同大家分享一下換左 Mission LX 前面三隻的感覺, 其實都換左個幾兩個月有多了, 過程中亦睇左好多不同的電影, 有鬼片, 有爆炸片, 對白多既戲都有, 一對 LX2 前置喇叭真係冇野好講, 就算正價三千多呢個價位, 都比之前用落的 XQ10 有好明顯的分別, 尤其係呢份實淨度, 埋身感同低頻出來的效果, 都比之前來得扎實多了. 又因為呢三隻喇叭的關係, 依家整個家庭影院的音場都來得比之前硬淨, 爽快, 同埋最緊要係D野冇咁"虛", 就好似小瑟睇 4K UHD 蝙蝠俠夜神起義, Batman 出場的一幕氣氛上的包圍感, 去到最尾一段 THE BAT 衝埋來的一刻, 小瑟就知道冇野好講了, 家中的影院可以有呢個提升, 而點可能返回原點呢???   大家可能仲會問, 咁中置又點算呢??? 的確……..中置出來的人聲厚度上 LXC 係比 XQ50c 來得冇咁厚潤, 所以小瑟都推高了2個db去讓中置音壓加多一點點, 升高一點中置的水平, 雖然都未係 50c 果份感覺, 不過一個家庭影院係睇整體性的, 而且用上前面三隻 LX系喇叭之後的確在整個影院就好似"打實"左個地基咁, 而且個價錢加埋都係五千幾蚊可埋單既野, 仲有野講????? 依家諗既只係會唔會整多幾隻 LX1 換埋餘下的 KEF蛋仔吧!!!!

mission_lx_23


• Post76網店經已開幕,請到: store.post76.hk


小瑟

關於小瑟

一名永遠的入門玩家, 對電影, 音樂, 影音等玩意永遠雀躍, 其後為了可以將這個毒海無涯信念推展開去, 故建立了這個毒人唔洗本的影音娛樂資訊平台, Post76玩樂網.

觀看所有 小瑟 的文章 - 網站

相關文章