【版友試玩活動】Onkyo TX-RZ900 玩到入屋樂滿 Fun 之 阿定 試玩報告

martin

首先,我一定要 #多謝Onkyo# #多謝Post76#,等我有機會試玩Onkyo呢部TX-RZ900擴音機,一直都好想係自己屋企轉玩Atmos,但天花裝Speaker一定無可能,隨著Dolby Atmos-Enabled Speaker普及,開始心大心細,有緣見到Post76搞今次的試玩RZ900活動,當然第一時間報名啦。

76_RZ900_0121

點解會揀Onkyo

當年第一部AV AMP,就係買Onkyo 605,但呢幾年影音格式經常轉,所以都轉用過其它品牌的 AV AMP,但一直都有一個功能係其它品牌的AV AMP比唔到我的,就係當聽緊收音機時,畫面要係遊戲機畫面,因為有時打機唔需要開聲,想聽下收音機,聽下音樂,但AV AMP作為家中命脈,所有遊戲機都靠佢上電視,就只有Onkyo可以做到呢方面影音分離,對我來講,呢個功能真係好方便,加上TX-RZ900的用料一流,內部有足夠空間散熱,都係我之前睇其它評測時留意到的地方,而且之前幾次去試玩Onkyo其它型號的AVAMP都實試過佢地的AVAMP長Run都唔會好熱,亦係我報名試玩TX-RZ900另一個原因。

76_RZ900_0139

∇ 8入2出HDMI,支持4K/60 Hz, 4:4:4色彩空間同埋HDCP 2.2,短期內都應該唔會Outdate,加上內置WiFi天線,唔駛額外再買Dongle。

76_RZ900_0122

設定

TX-RZ900主界面並不華麗,簡簡單單,駁好Speaker同Subwoofer後就可以插上試音咪,幫你Tone機,Tone出來的距離,同自己度的差不多,唯一唔太準係Dolby Atmos Enabled Speaker,因為正確距離應該Set做反射後距離,即係兩米上天花,再兩米落皇帝位,但主機set錯直接距離,除此之外,Subwoofer因家中環境惡劣,要作出小調整,基本上都無咩大問題。

76_RZ900_0123

電視篇

以往睇電視都要靠機頂盒或電視的Audio Out接回AV AMP才能享受靚聲,但TX-RZ900因為Support ARC(Audio Return Channel),可使用AV AMP的 HDMI Out 直接回傳電視的聲音,唔駛再駁多條光纖線,加上使用HDMI傳送,聲音比以往更清晰更立體(千幾銀一條聲音線,一條過唔駛一來一回,真係慳唔少),試機期間電視台剛好播放玉置浩二,時間真係剛好,可用來試機了,雖只係兩聲道,但配合埋THX一齊玩,現場感提升不少,當然你唔好同BD碟比就是了。

76_RZ900_0124

76_RZ900_0125

DOLBY ATMOS BluRay篇

用得 TX-RZ900當然就係為升級全景聲啦,本人的設定係 5.1.2,換上全景聲後,第一隻要試的當然係 Atmos試機碟啦,其中最震撼的係 Star Wars遊戲的Demo片段,清清楚楚感受到飛船係後面經頭頂飛過,白兵係後面射激光過來,爆炸聲,人聲,槍聲,好似真係係戰場入面咁,而其它落兩聲,飛機聲,直升機聲,又或聽歌等等,都得到好大提升,以往因為擺位唔係特別對齊,聲音定位始終會有少少出錯,雖然唔用心真係未必留意到,但現在改為Object base 的 ATMOS,定位感覺比以前好,由其左後同右後之間來回聲比以前自然得多,加上從天而降的聲,好似去左戲院咁,震撼得多,而當睇緊Terminator時,電單車飛落旅遊巴同直升機追逐戰時,果心當堂離一離,升級ATMOS睇來已無退路了。

76_RZ900_0128

76_RZ900_0126

DAC解碼篇

Hi-Res Audio 已流行多年,自己用緊的AVAMP同手機都支援24 bit/96 kHz音樂檔,所以家中其實已有唔少Hi-Res音樂檔,今次換上TX-RZ900,同用緊的P記 AVAMP比,唔見得有特別進步,界面方面,電視同AVAMP mini Display 都一樣係出唔到中文,出晒亂碼,因市面其它AVAMP都有呢個問題,所以無期望就自然無失望,基本上只要用番電話的Onkyo Remote App揀歌就無大問題,自己的歌一向都係存放NAS,存取速度無任何問題,最後特別要提的係Pure Direct功能,AVAMP一向聽歌都會比較味精同唔夠通透,今次開左Pure Direct後,聲音通透好多,同平時去聽二聲道試聽會有得fight,個人十分推薦大家使用,特別係好似我咁,無能力影音分家的,開左呢個功能有八成影音分家的功力,唯一缺點係佢真係幫你關上大部分部件來減少雜訊等,所以開左呢個功能後,你要用番其它功能,係要完全關機再開,但可以靚聲,重開機又點會係問題!

76_RZ900_0129    76_RZ900_0130

無線及聯網功能篇

宜家用緊P記AVAMP已有AirPlay,太太一直都會用來接駁iPhone聽下歌(KKBOX etc),但我呢個Andriod用家就只能靠NAS聽歌,雖然有Google出的Chromecast,但Support的app唔多,市面買的藍牙轉接器,一來唔方便,二來有delay,所以都唔太實用,今次TX-RZ900內置藍牙,我宜家除左可用手機直出外,仲可接駁Playstation Vita玩遊戲,一邊玩太鼓之達人,一邊聽音樂同鼓聲,成個體驗升晒呢。

76_RZ900_0131    76_RZ900_0132    76_RZ900_0133

實用的Remote及 機迷專用的Game Mode

家中其實已經用緊Logitech的Remote Hub,一個Remote其實都可做晒所有野,加上Onkyo Remote App,其實都唔駛點理原裝Remote,對上兩部AVAMP的Remote都係開都無開過,但今次唔同,我除左開左來用之外,仲長放Sofa,Remote齊晒所有input的實體鍵,要轉指定input可更快手,另外,亦係最重要的功能,Quick Setup Menu,只要一禁電視就會出左果mini menu,唔會阻住你睇電視或打機,但又可以改音效同改setting,打打下格鬥Game要轉為踢番場波,轉音效就快捷得多啦,Onkyo Game Mode唔係咩新野,但就只有Onkyo為左我地機迷做得咁用心,用Sport Mode踢波或打籃球,都會加強左比球迷圍的感覺,再旁白講野亦唔會被搶去,而打格鬥Game時改用Rock Mode,拳拳到肉的聲會更突出,對只有DTS音效的遊戲機,提升不少。

76_RZ900_0134    76_RZ900_0135    76_RZ900_0137

Onkyo 教室

有留意Post76的Onkyo區都應該知道Onkyo係會定期開堂比機主參加的,我就特堂去左上堂,始終打機的野我就識,玩Hi-Fi,我識條鐵咩。你估真係買得多,上得網多就係影音大師,唔駛錢有堂上,無理由唔去,Onkyo教室同平時去開的試聽會唔同,因為個個都係機主,跟本無人會Sell你,而且人數唔多,我上去果日,10條友都無,Onkyo的負責人除左會解答大家的問題外(因為全部都係機主,真係好多野問,大家都豪不客氣),亦會提供唔少Set機貼士,平時你去試玩會,用指定器材,幾十人同你迫,又加咁多補品,邊試得真,果日就真係用最簡單的駁法同器材,試盡部機比我地聽,聽完就更加知道部機的實力,試John Wick的槍聲都試左兩三次,就係為左教我地Set Subwoofer,可想而知小班教學對我地呢d新手來講幾咁重要。

76_RZ900_0136

Atmos-Enabled Speaker 篇

上面已提過對ATMOS入屋有幾重要,今次因為試玩排得較後,所以可同Onkyo借到最新Model 的 D-309H 一齊試玩,真心覺得正,太貴的Speaker,我唔太想買,無理由買對超級名牌仲貴過我用緊的前中置,但SKH-410又感覺太玩具(雖然我無試過其實唔應該話佢),由於今次試玩報告主力講AVAMP,所以呢度就唔多講,但我試玩完之後,我可以肯定,D-309H無論外型,實力,我都好滿意,如果有幸贏到比賽,我一定會買埋返去,就算贏唔到,當我換ATMOS AMP時都會買佢返去,因為性價比完全超班,我個人十分推薦。

76_RZ900_0138

Conclusion : 「一機包辦全家影音需要」

還機之時,DTS:X 仲未用得,無得試其實都有點失望,不過試玩完Dolby Atmos後,其實已經好滿足,老實說就算有DTS:X,我都未有碟可以試,整體感覺比我用緊的AVAMP好,主要原因係佢比我之前用過的AVAMP都更似家庭影音中心,主要用到的網絡功能都有齊晒,無需添加配件已經可以支持WiFi,Bluetooth, Pure Direct亦加強聽歌的能力,唔再需要幻想影音分家(屋企本來就唔夠大比我分家),手機App亦簡單易用,雖然無漂亮的界面,但操作都非常直接易懂,無需左搵右搵先用到想要的野,自己最多時間其實係打機,Game Mode真係好幫到手,其它品牌唔係無Game Mode,但真係無Onkyo做得咁細分,咁用心,影音玩樂都做得到位,對我自己來講,DTS:X更新後,應該都會入手的了,而且老婆大人亦好滿意Dolby Atmos的效果,同 D-309H的外型,批文已出,實在沒有不換機的道理。

76_RZ900_0127

martin


🙋‍ ★ 想睇版友討論以上文章?? 《點我進入討論》

🏠 ★ Post76網店經已開幕 《store.post76.hk》

Post76編輯部

關於Post76編輯部

新聞中心的編輯們,為喜歡生活影音的您,每天送上最新資訊,有您的支持,就係我地最好既推動力,齊齊參與 「有玩、有FUN ... Post76.com」.

觀看所有 Post76編輯部 的文章

相關文章