香港四大串流 APPS 大比拼

其實小瑟想做呢個分享好耐, 不過一直都拿唔出時間來同大家分享, 呢日終於都有時間同大家影下相, 分享一下小瑟平時係街聽串流歌仔既一點點感覺勒, 拿……..首先小瑟先講講平時我都會用 Sony ZX2 + XBA-H3 來聽歌的, 不過有時出街, 又 Notebook 又電源又文件, 自己 D 骨頭都唔聽洗, “咩"咁多野上身雙肩的確有一點點頂唔住, 所以有時都只會用一部  Sony X3 手機 + MRD-1A BT  無線來聽歌就算勒, 因為好多時D歌手未出碟既歌, 係串流平台上聽都真係幾方便架, 所以玩玩下, 自己都裝過哂幾個不同的串流平台亦都有二個已經比錢Join左(有一個係比手機台焗屈 Join 的).

streamapps

 

今日小瑟同大家分享的串流平台就有 JOOX, KKBOX, MOOV同SOLITION 四個平台, 四大平台各有捧場客, 不如就由小瑟同大家介紹一下呢四個平台先啦.

《KKBOX》台灣串流老祖宗

2004年出生的《KKBOX》, 絕對可以話係串流界的先峰第一人, 於2009年正式進軍香港, 當年音樂盜版MP3成行成市時, 係佢一手打破了人人下載盜版聽歌呢個行為, 令到一眾後生仔可以一個APPS, 一個超平月費就可以聽哂整個音樂庫的歌曲, 但又因為KKBOX既出現, 真真正正改變了世人對音樂是應該要收費娛樂這個想法, 因為一個月幾十蚊, 就咩歌都有得聽, 大家仲需要比成百蚊去買碟嗎?? 相信唱片業有唔小朋友對 KKBOX其實係又愛又恨呢.

《JOOX》中國音樂大台

《JOOX》其實佢媽媽就係我地香港人都非常熟悉的騰訊公司,所以佢同Wechat係有非常完美既整合度既, 就好似你冇比月費但如果你每日都係 JOOX上SHARE一首歌去你的朋友圈中, 你當日就可以免費聽歌勒, 而佢既介面設計簡單易上手, 而當中最吸引小瑟試玩的就一定要數佢其實係第一家推行高質串流的第一家平台, 當佢一開張時, 已經可以比大家選擇以高音質去收聽音樂, 而每首歌大約就係10MB左右, 不過時而世易, 因為有MOOV更新左Hi-Fi音質之後, JOOX就再唔係最靚音質的APPS了.

《MOOV》全港最有錢的音樂平台

要試串流平台又點可以冇香港代表《MOOV》的份兒呢? MOOV係屬於 PCCW旗下的音樂平台, 因為財力充足的關係, 推出不久就已經超多客戶, 原因好簡單, 因為大家上PCCW台時, 果幾十蚊的唔知什麼附加費, 大家九成十都會用來 Join MOOV呢個音樂平台, 想冇客都難啦, 佢地仲不時會搞好多音樂會, 所以好多人都基本上手機上都一定會有個MOOV APPS的.

《Soliton》神秘莫測的音樂平台

香港代表除左MOOV之後, Soliton絕對係可以用異軍突起來形容, 尤想起當年2011年我地係巴士站, 好多潮流地帶都掛滿了 Soliton的大海報, 橫額, 氣勢一時無兩, 而佢既APPS亦係非常型格, 以黃綠二色及平面圖文方式作展示概念, 型到爆燈, 而當中仲盛傳 BEYOND的PAUL哥都有份投資 Soliton, 不過姒家仲係唔係就不得而知勒, 但以小瑟所知佢地都係一群對音樂非常有熱誠的業內人士創立的, 希望可以讓大家對音樂更加尊重及珍惜本地樂壇.

音質實試 – 聽感分享

講左咁耐, 咩都係假, 最緊要聽呢D串流平台出來既音樂其實會唔會好難聽呢?? 四個平台之中, 又有冇邊個平台係最好聲的呢??? 如果大家正要加入串流呢個行列的話, 小瑟呢個分享大家就可以作為一個小小的參考, 等大家可以知多一點點, 而且依家各大平台都一定有得比大家免費試聽一段時間, 大家又可以試真再決定比唔比錢都得呢. 今次小瑟會同大家測試的歌曲為李克勤近日係串流平台上聽都幾唔錯的《戀愛為何物》, 事先聲明, 純個人觀感, 而收聽標準亦都唔會以聽Hi-Fi的水平去作出評價的, 希望大家多多包涵啦!!!

《KKBOX》
音質取向 : 先以串流大哥KKBOX同大家測試, KKBOX音色係走中低音向路線, 即係音質比較注意中頻以下至低頻位置, 聽男人歌就可以另到 人聲幾突出, 但轉調來講高頻弁四APPS之中佢係最暗,最淡的一位, 從而另到低頻的張力欠奉, 比較死實, 唔夠立體感。

介面操作 : 叫得老大哥, 一定收集左最多的用戶體驗, 所以以四APPS來講, KKBOX的介面最好用, 支援功能最完善,如 Google Mirror Cast等功能都一一對應, 而且APPS穩定性最高,絕少有停歌或無啦啦死APPS情況出現.

Musicstream_app_01

∇ KKBOX備有一般音質及高音質比大家選擇, 不過講緊既高音質其實都只係 320kbps的 MP3格式音樂.

Screenshot_2015-08-26-22-09-02    Screenshot_2015-08-26-22-09-41

∇ 設定內都有好多不同設定比大家玩, 而歌單自動同步呢個功能就幾貼心, 因為一個戶口可以連三台裝置的, 而你都唔想下下都要又整過歌單架.

Screenshot_2015-08-26-22-09-32    Screenshot_2015-08-26-22-09-25

《Joox》
音質取向 : 國內大哥, JOOX音質上亦都係"低音向"一名,同一般MP3音色中以標榜中低頻來取悅聽眾為目標, 亦都係最切合依家流行曲特色,注重中低頻來討好大眾,但佢既高中頻略窄, 唔夠開揚, 而值得留意既就係佢既聲壓要推到好盡先夠聲。

介面操作 : JOOX的介面其實都非常型仔, 中間圈形歌手照片會好似一張黑膠碟模式出現, 仲會不停地轉動, 四APPS之中最有音樂感覺, 而穩定性都不俗, 只係點歌需要等既時間比較長同慢左小小.

Musicstream_app_03

∇ 以設定來講, JOOX的音質設定叫做最細心同簡潔, 無論在2, 3,4G網絡下的音質至到WIFI網絡下的音質都清楚讓你知道現狀, 亦可以比你確定下載歌曲的音質是如何, 算幾有誠意.

Screenshot_2015-08-26-22-01-00    Screenshot_2015-08-26-22-00-56

《MOOV》
音質取向 : HiFi音質就是HiFi音質, 就算係手機上經無線傳送去耳機進行收聽, 都的確有分別, 三頻平衡度真係好好多,  克勤人聲質感最到位,  樂器每件都可重播出7成應有效果,  背景細微聲都幼滑得多, 數據量大始終真係可以係歌曲中反映出來.

介面操作:咁多個串流APPS當日, MOOV的穩定性最低,  有時係WIFI的情況下, 都會有機會經常無啦啦停歌, 唔知係佢對連線既品質太敏感還是什麼原因, 非常奇怪, 而在4G的環境下, 在地鐵絞聽更加非常容易出事, 有時搭左幾個站都仲未開到首歌, 當然如果想係4G環境下聽到HiFi音質就更加係難上加難呢.

Musicstream_app_02

∇ 經過一輪更新之後, 現在的介面已經算得上比較成熟, 而選擇音樂品質的選項亦非常細緻, 而受惠於MOOV經常有音樂會的關係, 佢地可以睇返自家MV或音樂會的品質更加可以去到 1080p, 手機睇尚算唔錯, 但始終係低 Bitrate的關係, 如果要放上大電視睇就絕對會起格的啦.

Screenshot_2015-10-25-17-43-01    Screenshot_2015-10-25-17-43-13

Screenshot_2015-10-25-17-43-25    Screenshot_2015-10-25-17-43-36

《Soliton》
音質取向 : 低音向, 亦係一般注重中低頻向但高頻亦都係比較暗淡, 分析力一般MP3質素, 沒有什麼突出的地方, 如果聽開串流的朋友亦不會有什麼投訴的.

介面操作:介面型格, 以平面單色作設計, 非常前衛而且選曲都非常簡潔, 而且佢地有非常之多的獨家專訪, 對於本地音樂市場的動態非常緊貼, 而且經常籌辦音樂會益返自家用家, 對用家有一定的照顧, 例如早前周國賢重返樂壇佢地就率先邀請佢表演一場, 仲創下一開即爆的驚人紀錄, 之後仲有SUPERGIRL都非常叫好叫座, 而最正的係, 佢地係唔洗收會員演唱會的費用, 間接回饋用家對佢地的支持, 以一家自給自足的音樂串流平台來說, 佢地的確非常有心呢.

Musicstream_app_04

∇ 操作介面簡潔之外, 就連設定位置都非常簡潔, 對於音質方面可以話係沒有任何設定.

Screenshot_2015-08-26-22-04-56    Screenshot_2015-08-26-22-04-43

後話

早排就有一個市場調查講及串流音樂在香港的使用率有64%之多, 證明呢個串流的使用率是絕對地高昂的, 而我們一般每日返工, 搭車, 等人, 都有機會一部手機+一隻耳機就會收聽音樂, 係呢個環境下, 我地都好希望可以挑選到一隻音質表現比較好的串流平台去加入, 始終每月只付數十元就可以聽足整個音壇多年來的大部份歌曲, 以消閒的角度來說, 絕對係非常化算的, 而且因為MOOV為電話網絡商PCCW的關係, 分分鐘就係你JOIN台時的附加服務中, 別無選擇下都一定加入串洗平台的, 而眾多個串流平台中, 的確大企業支持的一定會有非常唔錯的優勢, 例如HiFi品質所產生的數據流量成本一定比其他沒有自家網絡的平台平好多, 呢點都係對於流動串流商的一大頭痛問題. 除了流量或音質的考量, 該平台支援的市場亦是重點之一, 就好似KKBOX這個台灣始祖, 的確對於台灣本土的音樂有最快的支持, 就以蘇打綠新作《冬.未了》為例, 無論優先試聽或唱片推出之後的更新程度, 都係KKBOX先行支持, 呢點相信對於鐘愛聽台灣音樂人的朋友應該都知道其優勢. 所以其實每個平台都有其優點及缺點, 如果大家將來需要選擇串流平台時, 唔知又會唔會係內容行先定係音質行先呢??? 小瑟就希望大家都可以在音質方面多下一點苦功勒, 因為小瑟個人覺得在可見的將來, 可以推出唱片的歌手會買少見少, 大家都只會以PLUG歌作為維持在樂壇生存的一個象徵, 真的會出碟的歌手只會是少數中的少數, 所以串流或網上平台即將會取代我們多年以唱片聽歌的生態呢.


• Post76網店經已開幕,請到: store.post76.hk


小瑟

關於小瑟

一名永遠的入門玩家, 對電影, 音樂, 影音等玩意永遠雀躍, 其後為了可以將這個毒海無涯信念推展開去, 故建立了這個毒人唔洗本的影音娛樂資訊平台, Post76玩樂網.

觀看所有 小瑟 的文章 - 網站

相關文章