望穿秋水 …… 依然都係馬蘭士

是咁的……
差唔多四年之前,為咗高清音效點燈,換咗部 AV Amp,出咗第一次開箱文,芸芸品牌之中千揀萬揀,始終都係馬蘭士;當時熱衷睇戲,又熱愛聽歌,但後來無諗過會踏足兩聲道世界,今日…… 破戒了……,而且又係馬蘭士。
點解?原來當中都有個故事 ……

IMG_2876

話說小女出咗世之後,屋企套AV系統畀我廢晒武功,梳化移後到貼晒牆,後置喇叭拆晒,超低音賣埋,成套7.1變咗做3.0 (so sad);之不過…我心入面AV果團火係唔會熄嘅!所以我平時一樣有keep住開機睇碟,睇咩?睇”奇先生妙小姐”、”跟叻叻果叮韻律唱讀學英文”……囉 (so sad),亞女睇得不知幾投入~

用3.0睇戲,真係無乜癮,完全的唔起個心去睇,加上真係無乜時間坐定定睇晒成套戲,閒時咪唯有聽吓歌仔囉,聽歌勝在坐定定聽又得、做住嘢聽又得、行嚟行去又聽得、掃地吸塵洗衫晒衫煮飯洗碗幾時都聽得,聽吓聽吓、睇吓睇吓,自然又身痕,係人都知76係萬毒之窟,個個都話影、音要分家,分家我就無本事,一來無地方,二來無銀,唯有半分啦。

先前都提到,我未正式接觸過兩聲道,亦從來想像唔到用多聲道Amp聽歌,同用兩聲道Amp聽歌可以有幾大分別,宜家平時用超過90%時間聽歌,似乎係命運安排一個機會,畀我自己一個藉口,去分家了!

未準備好分家,已經出現咗第一道難題,一個新手常見嘅問題:預算有限,究竟買CD機先,還是買兩聲道Amp先呢?網上都有唔少類似討論,而兩邊都各有支持者,唔睇由自可,越睇就越難揀……,諗爆頭之後,結論係……雖然都有儲埋唔少CD,但始終有時聽歌時間短,都會貪方便聽吓File,所以最後都係決定從兩聲道Amp入手先。另外,始終都會睇吓碟,有埋AV Bypass嘅就最穩陣,我自己一向鍾情馬仔嘅聲底 (有睇過我之前個Report就知點解),又用緊B&W喇叭,所以好自然又會揀返呢對黃金組合,B仔搭馬仔,原本睇中嘅係PM-KI Pearl Lite,但因為已經停咗產,而且又啱啱出咗新型號,市面上已經好難揾到,所以最後就揀咗佢嘅後繼機PM8005
(註:但都要撲咗好耐先撲到部黑色返嚟……)

揀馬仔仲有一個原因,可能係我份人比較膚淺,注重內涵之餘,外表都好緊要,”等於三級片嘅女星都要隆胸嚟取悅觀眾“,馬仔嘅外型一向都好討人歡喜,黑魂機身,配藍光燈面,三個字:無懈可擊!再加埋佢屁股上嘅刺青”Made in Japan”,簡直perfect池!

欣賞完一大輪,急不及待諗住快啲駁好部機,點知抹吓塵、執吓位,搞吓搞吓,搞足大半日……,大家都知HIFI架後面果堆嘢唔係人咁品!好在男人都愛搞機,雖然搞得耐,但搞完都好有滿足感!

講咗咁耐,未講用後感之前,不如去一去圖先,話晒都開箱文嗎~

IMG_2870
指定動作~

 

IMG_2871
12kg機身,都幾墜手。

 

IMG_2873
現真身。

 

IMG_2874
玉背:鍍金端子、Marantz SPKT-1喇叭接柱,高貴~

 

IMG_2875
幾時都咁好睇嘅三個字:MADE IN JAPAN

 

IMG_2982
兩兄弟重逢。

 

IMG_2985
上架,點燈。

 

IMG_2984
全家福@春’2015

 

好嘞,即將就要解開我一直以嚟嘅謎團:兩聲道Amp同多聲道Amp真係咁大分別??

聽咗成個月,比較明顯嘅係聽多咗嘢,音場闊咗,音樂感同層次感都好咗,成首歌生猛晒,啲味道出晒嚟,感覺非常正面;的而且確,AV Amp同兩聲道Amp真係無得比,傳說中嘅第二個世界果然存在,而馬仔注重音樂感嘅表現,聽起嚟比分析力高嘅機種嚟得舒服,而且更耐聽,完全就係我心目中杯茶,買,真係無買錯。

數完優點當然要數吓缺點,不過都只係雞蛋挑骨頭,8005對比低一級型號6005少咗份DAC,變相玩少咗樣嘢,又不過咁……多隻香爐多隻鬼,專心做返自己嘢始終都係好事嚟,而另一樣美中不足嘅係,唔可以經network做開關,以前用部電話就可以開歌聽,聽完用電話又可以熄機,宜家每次都要摷返個遙控,又又不過咁……都話咗聽File聽懶人,聽CD時摷碟入碟,都係要搞三搞四嫁啦~ (笑)

跟住落嚟,下一步輪到CD機相信係意料中事,喺儲夠彈藥之前,當務之急,梗係嗱嗱臨煲返三、五、七百個鐘頭先啦~
Bye~~~


🙋‍ ★ 想睇版友討論以上文章?? 《點我進入討論》

🏠 ★ Post76網店經已開幕 《store.post76.hk》

245141525

關於245141525

245141525: 亞祺,BEYOND教信徒,聽BEYOND的歌長大,流住BEYOND的血,經[一次意外]得以看破凡塵,豁達人生,自此致力宣揚BEYOND精神,亦希望將崇拜BEYOND的態度,用於每一件事,仍在努力中......

觀看所有 245141525 的文章

相關文章