X系列已成性價代表- Philips Fidelio X2 開箱測試

大約兩年前, 又多一個小朋友落地, 屋企套過時hifi已無容身之所, head-fi似乎係唯一出路.  上post76爬文, 由於多正評, 本身又無對任何牌子有特別偏好, 自已又親耳試聽過, 覺得佢各方面都幾平均, 又有各方毒友推波助瀾, 最後我擁有了飛記Fidelio x1, 兩年來一直都相當滿意佢既表現, 係屋企無論聽歌睇戲我都靠哂佢. 兩年過去, 可能我呢排比較多野攪, 直到毒友”提醍”我, 我先知新一代x2低調地出咗….

DPP_0005

驟眼上外型跟上一代x1分別不大, 只係耳筒外金屬圈由銀色變成電導黑色, 但係試上去之後先發現魔鬼在細節…

DPP_0006

首先上一代x1載上去 Head Room對我來講剛剛好, 個頭再大d都幾頭痕, 今次x2有明顯改善將 Head Room加大, 載上去感覺鬆動咗唔少.   我度過 Head Band位 x2比 x1加咗一吋.     另外Head Band 頂真皮顏色由 x1既啡色轉為x2既黑色, 襯返隻耳筒顏色.

DPP_0010

DPP_0007

今次絲毧位耳棉(Earpad)可以拆出, 另可以再換上另一套絲毧耳棉可將 Bass聽感加重一點, 總之可以換等於壽命可以長一點, 好事黎!   仲有我覺得用絲毧比用真皮舒服同最緊要夏天無咁熱, 缺點係比較痴塵, 如果飛記可以跟埋個靚仔袋用完入返住佢就 Very Good喇!

DPP_0013

原生耳筒接線頭由6.25mm轉為3.5mm…呢個有好有唔好, 好似我用 Portable Amp當然叫好, 唔駛加轉插方便咗兼心理上音質都好咗…   但用開坐枱機既朋友就應該唔係咁唸, 呢個可能比到用坐枱機既朋友一d動力去換條再靚仔d既線…另外上次入x1時已經要讚條線夠長(3m), 睇戲插 Amp到梳化長度啱啱好.

DPP_0019

另外, 接線除咗接頭改變外, 外表極相似, 睇睇Spec, 原來內涵好唔同, 最主要係抗阻改善不小, 實際試落新舊線比較當然新接線聽感清晰通透d, 尤其低音方面改善更見明顯, 同埋就返唔需要太大力既 Amp都可以推得好, 認真照顧到我呢D平民用家…  不過呢樣既Upgrade太低調了, 再出x3時侯其實可以考慮轉換一下接線外貌, 可以比人一個Upgrade咗既感覺!

DPP_0017

由於外型更新不大, 係未真正去聽時候老實講我期望不太大, 因為其實x1以佢既身價已經交足功課.  新版又同舊版價錢差唔多, 既然外型小改, 內涵唔知會唔會都係呢?   首先, 講講我用開乜黎推隻HP, 佢地係ADL Cruise & ADL X1 Portable Amp, 另外鳴謝毒友借出L3, 希望可以試出/發揮出x2既小宇宙.  而我主力會用L3黎試..

DPP_0020

我自已本身係廣東歌支持者, 英文歌認知程度係停留係80/90年代…   所以我都係用我聽開既廣東歌黎比較一下新舊分別究竟有幾大. 另外我都唔會/唔識去講數據, 一切耳聽為實.    仲有我唔係專家, 只係一個極普通但又鍾意聽歌既HP用家想分享下好主觀既意見, 如有寫錯或不能引起共鳴, 請各位專家手下留情!  HP未正式聽之前先 Run In 咗20個鐘, 熱下身!

DPP_0011

音像/清晰度

呢個真係有d驚喜, 我可以咁去形容x1跟x2既分別 “感覺雖然無由VCD升上DVD咁震撼, 改善既幅度絕對有Blu-Ray 1080p上4K既感覺”  人係不斷追求, 當你睇1080p已經嘩嘩聲, 原來仲有更好既4K出現….  祈望民用8K快D來臨.  言歸正轉, 聽學友既”十二個音”, 聽到口水聲好正常, 今次 x2比到既係將呢D咁微弱既聲音再Detail咁出, 而學友有少少沙沙地既尾音亦比我之前用既 X1更加表現到出黎… 我只係想表達隻HP分析力相當高.

聲底

相當中性聲底, 無乜偏冷或者偏暖, 因為清晰度加強咗, 人聲厚咗同實淨咗. 相信呢隻HP既設計者係想求傳真, 無乜落到味精!

音場/空間感

呢隻係開放式耳筒, 音場濶度當然一定比封閉式好…   缺點當然大家都知道唔可以係噪集環境下使用, 太寧靜既話你心愛既另一半又會叫你細聲d甚至熄機…. 要花一花心思去揾一個Right Place and Right Time去享受一個人既世界!   講空間感, 當然要用一d有水準既現場錄音去聽聽. (例如: 胡琳Nice and Easy Concert裡面Disc1 第#12 – Interlude, 隊 Band每一件樂器左中右前後都清清楚楚, 所謂既 Layering做得唔錯, 其實最享受就係聽D, 感覺隊 Band就係係你前面玩緊咁.)

DPP_0009

樂器分離度/定位

比x1有明顯提升, 每一件樂器都好清楚聽到, 無含糊…. 就算連和音都清晰地分離到.

DPP_0012

低音

低音唔淨只係指鼓聲, Bass甚至於 Double Bass都係…   X2比 X1低音方面改善不少, 實淨咗好多…  聽校長Time After Time Album 裡面首”假如”, 首歌用咗大量既 Bass, 我只係用咗一次去比較 X1及X2, 已經非常清晰分辦到 X2呢方面改進非常大, 實淨得黎又無乜 Over…

DPP_0018

另外, 其中一個大突破係 Earpad可以拆除, 暫時市面上應該係唯一一對HP可以換 Earpad….    出得可拆除 Earpad仲要講明對低音有提升, 咁當然唔會吹水啦, 我非常欣賞用 Earpad去改善低音而唔係用電子野谷D低音出黎, 我個人覺得咁對於耐聽性方面有所顧及, 無乜加味精既低音用原裝 Earpad, 想重少少低音又唔會聽得辛苦就換另一對 Earpad….   最重要係有得換好過無得換, 有得揀對香港人好重要咖麻, 係咪?

DPP_0014

耐聽性

如前所說, 各方面都有提升, 而且平均, 幸好 Bass無 Over, 我連續聽咗兩個鐘都唔覺得需要休息, 我亦都試過幾次聽聽下係梳化瞓咗…@@"

DPP_0015

睇戲

既然有多一對加重 Bass既 Earpad, 當然要開套爆得下既戲去試試佢…. 就試美國巨腸.  一如聽音樂一樣, 各方面都有提升, Bass唔在講, 我試咗約27分鐘嗰段, Nick Fury比人Setup, 子彈聲夠實淨之外, 仲有背景音樂都比之前 X1出得清晰好多…  拜高分析力有所提升所賜!

DPP_0008

舒適感

睇戲連續用兩個半鐘都唔覺得辛苦, 鬆緊程度合適, 我無開冷氣耳仔位亦無出汗. 又因為 Head Band位加大咗, 的而且確比 X1舒服D…. 整體上呢隻飛記旗艦級HP, 無論外型及品質上絕對配得上”旗艦” 呢兩個字….  我可以講佢係無乜性格, 因為佢無乜邊樣係零舍突出, 每樣都做到咁平均/平衡, 唔需要太大力度推力已經可以發揮到 X2約8成功力 (以Portable Amp ADL Cruise 黎講), 你聽 POP 又或者 Jazz 又或者女聲, 甚至 Metal都可以比到你, 我曾經用過 Beyerdynamic 一隻中階耳筒, 人聲尤其女聲方面非常突出, 中高音甜而滑, 但係就完全無低音可言, 咁我又唔係發咗, 我亦都怕麻煩, 無理由聽女聲用一款耳筒, 聽其他又轉用另一款耳筒!

DPP_0016

結語

係呢個瘋狂高物價年代, 聽得下既 In-Ear Headphone 都話要成3-4仟, 你比相同價錢可以擁有一隻各方面咁平均既HP, 比起其他牌子HP旗艦分分鍾過萬, 呢隻HP性價比真係超高…  而我不嬲都力撑高性價比產品, 支持下又可以等其他廠商知道原來消費者係真係會放低品牌效應, 越貴等於越好既概念… 你我一齊做, 做到既話, 絕對係消費者之福!

>

有你既支持,就係我地最好既推動力,齊齊參與

FUNPost76.com

<

歡迎進入我地論壇對>>本文章<<發表您的回覆啦^^"
>

*** 溫馨提示:想更緊貼更多影音界的最新資訊,請到以下的 Facebook 專頁按「讚好」 Google+ 專頁按「加到社交圈」加入我們,每天就會收到全新的中文影音免費資訊呢!! ***


🏠 ★ Post76網店經已開幕 《store.post76.hk》

影音浪人

關於影音浪人

「影音浪人」, 顧明思義是對任何品牌都沒有既定立場, 一切從感官角度出發, 要聽過聲睇過畫先肯收貨, 向品牌效應說不 !!!

觀看所有 影音浪人 的文章

相關文章