劇院式的影音西裝 Denon AVR-4520 + DBT-3313UD

好耐都冇玩過Denon既機, 其實小瑟人生中的第一個家庭影院用既就係 Denon AVR-3300, 有返咁上下資歷既朋友都知道, AVR-3300呢個MODEL最小都有15年了, 當年仲好記得係要自己去旺角德發樓上, 行上一層的旺角音響自己托部機返屋企, 諗起都幾辛苦呀.  @@"

而自上年我地攪左場"KEF x Denon x Epson 超強鐵三角體驗會“活動之後, 小瑟都一直想借來 Denon 呢套最新技術的西裝玩下, 試下係屋企玩呢套天龍西裝究竟係咩一回事, 終於上個月, 就的起心肝問 D&M Patrick哥借來玩下, 連佢都好出奇, 點解依家小瑟仲借來玩呢?? 其實目的就係為小瑟的 2014年換AMP大計打開序幕呢~~~呵呵!!!!

denon_4520_3313_93

改寫原汁原味的定義 – Denon Link HD
玩得天龍呢套西裝, 又點可以唔重點測試埋佢個Denon Link HD功能呢?? 大家都知道, Denon一向都對其自家Denon  Link 寵愛有加, 其實 Denon Link早已係 2002面世, 而現在Denon Link HD已經算係去到第五代了, 當 Denon AVR-4520配合 Denon DBT-3313UD藍光機, 其 Denon Link HD可協助消除數碼輸送時所產生既失真 (Jitter), 當Jitter減小, 原理上對音質既幫助係非常之大的. 就係因為咁, 小瑟就非常希望可以一試呢套AV界的西裝, 而今次 Denon Link HD既設計, 係加入一條同軸線, 將AV AMP同 Blu-Ray機的時鐘作一個同步, 咁就係處理音訊方面唔會讓HDMI線內的視訊干擾產生 Jitter而引致時鐘出錯, 影響音訊的純淨度呢. 其實呢個設計真係幾好, 始終 HDMI 聲畫在同一條線內, 而畫面的數據之大, 真係會產生非常之多既 Jitter, 所以呢個功能的確係天龍的一大重點呢, 而試過呢套西裝既朋友, 就會明白小瑟上面寫的 “改寫原汁原味的定義“.

denon_link_hd

denon_4520_3313_77

AVR-4520介紹
以天龍系列的慣性來講, 佢呢部AVR-4520照計今年2014年係呢個級別上, 都應該唔會有新機出架勒, 大家可以睇返佢旗艦級AVC-A1HD, 到依家都仲未有新款機去取代, 就知道佢地係旗艦機態度的取向會係如何啦, 而以 AVR-4520以2年時間去做R&D(研發)來講, 再睇埋佢既用料及技術, 已經有不少東西係比AVC-A1HD更強勁了(當然機身重量同售價都仲有一定距離啦^^"), 而技術方面, 例如D.D.S.C-HD 32(動態環繞分離電路) 都用上了32-bit DSP 處理所有環繞聲道的音效, 而Advanced AL24 processing 亦都升級了成為Advanced AL32 processing, 係 Denon系列中, 首部用上32bit的 AV AMP, 這樣就意味著在音訊的處理上, AVR-4520比之前的任何機種都來得更仔細, 更精準呢. 如何你想將AVR-4520作為前級用, 其實佢既解碼係可以總數處理到11.2聲道的環繞聲, 即係話如果你如果加後級來幫助的話, 你想玩 DTS Neo:X呢D咁高階既制式, 就絕對唔成問題啦!!!!!(不過小瑟屋企得5.1炸陰公~_~)

denon_4520_3313_78

denon_4520_inside denon_4520_back

denon_4520_3313_81

denon_4520_3313_79 denon_4520_3313_80

denon_4520_3313_94

睇完前面, 當然就要睇埋後面啦, 4520端子整齊, 話哂都係Denon重點推出的旗艦機, 呢方面一定交足功課啦!!!

denon_4520_3313_82

7入3出既HDMI插位, 基本上一定足夠應付需要, 而HDMI OUT方面, 仲有一個係比ZONE 4使用, 即係話你可以拉條線去另一個區域(例如房間), 就可以用主廳的器材來睇電影或其他娛樂系統, 都咪話唔過引!!

denon_4520_3313_84 denon_4520_3313_83

今次測試主角, Denon Link HD, 唔再用LAN線, 同埋只係作時鐘同步, 效果一陣話你知!!!

denon_4520_3313_85

最初諗在AV AMP整排SWITCH都好似幾無謂, 點知用落又覺得幾好, 尤其係對我呢D屋企電位唔多, 依家又樣樣器材都上網的情況下, 先知原來佢都真係幾幫到手架喎!!!

denon_4520_3313_86

11.2聲道既接線, 而輸出的POWER AMP就有9聲道, 一般香港家庭都夠玩有突啦, 如果都唔夠玩, EASY啦, 有無限金錢而又成日話自己食緊樹皮既76師兄們, 買後級加夠佢啦!!XDDDD

denon_4520_3313_87

DBT-3313UD介紹

現時來講, Denon方面既藍光機, 呢部DBT-3313UD基本上已經係賣街型號中, 最新同最強的型號, 除左可支援 3D 藍光碟, DVD, DVD-Audio, SACD , CD, 網絡串流方式睇YouTube, 雙HDMI呢D基本功能之外, 佢最值租的功能當然係首推可完全對應 AVR-4520的 Denon Link HD功能啦, 有左呢個 Denon Link HD之後, 天龍呢套西裝先可以完全發揮到極限呀.

denon_4520_3313_90

denon_4520_3313_88

denon_4520_3313_91

之所以今次試機叫得做西裝, “一對"既 Denon Link HD相信一定唔小得啦, 咁係DBT-3313UD大家就可以見到係HDMI隔離就多左一個 Denon Link HD既插線位, 將附送既 Denon Link HD線插上 Denon AVR-4520 + DBT-3313UD之後, 再係設定訊源位置上, 轉埋 D.LINK(下圖紅圈位置), 咁就可以正式對應Denon Link HD呢個功能勒, 小瑟可以同大家講, 如果真係想完全發揮天龍係新世代既真正威力, Denon Link HD呢個玩法, 必不可小!!!!

denon_4520_3313_92

dlinkmenu

另外, DBT-3313UD機身亦都非常足磅, 重量為7.9kg, 跟小瑟用緊的105D一樣重, 可見其機身非常足料, 而轉盤比我地平時見到的硬膠盤有一點不同, 3313用既係類似象膠物料既盤, 相信呢個有助光碟轉動時吸震方面有更好既表現有關的. 但如果可以設計個盤位深小小就更好勒, 依家有時放碟入去都要好準確先放得正, 始終個碟位太淺了!!!

denon_4520_3313_65

另外值得一提的, 就係佢個 Pure Direct功能勒, 一般的藍光機, 都會有呢個Pure Direct, 不過 3313既Pure Direct就有3個不同的模式既, 我地先要講解一下, 佢既HDMI分別一個叫 MONITOR(VIDEO), 而另一個就叫 HDMI OUT AMP(AUDIO), 而呢個 Pure Direct的模式分別係 “AV Pure Direct", “Pure Direct 1″ 同 “Pure Direct 2″ 三種, 呢三個Pure Direct功能都真係幾講究架.

denon_4520_3313_89

首先我地先講 AV Pure Direct, 呢個開左之後, 佢HDMI MONITOR(VIDEO)就只會出畫面的訊號, 沒有任何聲音的訊號, 而 HDMI OUT AMP(AUDIO)就會只出聲音既訊號而沒有畫面的訊號, 即係將聲畫完全分隔, 影音獨立自然二邊都會有效好既表現啦!! 而Pure Direct 1 就會停哂所有 HDMI既畫面輸出及3313面板的LED顯示燈, 而 Pure Direct 2  就會關閉左 HDMI的畫面但保留 LED面板的顯示燈, 小瑟個人認為 Denon呢個設定非常貼心, 尤其係對影音有要求既用家, 因為好多朋友有時會希望 Pure Direct mode只需要關閉左畫面的輸出就可以了, 面板顯示冇左好唔方便, 而又有D朋友覺得連個LCD面板電流都會影響左其聽音樂的純淨度既, 咁就可以用 Pure Direct 1, 將所有野關哂佢, 當佢係一部純CD PLAYER咁用. 呢個設定值得一讚呀!!!!

denon_4520_3313_61 denon_4520_3313_62

denon_4520_3313_63 denon_4520_3313_64

小瑟現時家中器材測試表

經過多年既改變, 依家小瑟屋企既器材都轉左小小, 係未同大家分享105D之前, 先同大家講解一下依家小瑟家中"炸斗"器材表先, 希望大家知道小瑟既平民組合中聽出既效果, 等大家可以作個參考.

TV: Panasonic TX-P42ST50
Pre-Amp: Denon AVR-4520
Power-Amp:
EMOTIVE XPA-5
5.1 Speaker: KEF XQ10(F), XQ50C(C),  KHT3001(R), MK SB-12(Subwoofer)
Blu-ray Player: Denon DBT-3313UD
Media Player: Popcrom C200
STB: Magic TV MTV3600D

(視頻方面)
Denon DBT-3313UD (HDMI 1 輸出) → Viablue S900 Silver(HDMI線) / Viablue X-60(電源線)
 Panasonic TX-P42ST50

(5.1 音頻方面)
Denon DBT-3313UD (HDMI 2 輸出)
Kordz LUX 1M(HDMI線) → Denon AVR-4520 + EMOTIVE XPA-5 + KEF XQ10(前), XQ50C(中),  KHT3001(後)

(2.0音頻)
Denon DBT-3313UD (RCA)
TARALABS M3 Denon AVR-4520 + EMOTIVE XPA-5 + KEF XQ10

_MG_7928

開機之後, 小瑟又試下佢系統中的Audyssey MultEQ XT32自動音場系統, 度一度家中環境, 試下佢既效果出來如何先. 基本上插左枝MIC之後, 系統都會帶你一步步去完成呢個動作的, 雖然好多人都會話, AMP內建的自己音場系統冇咩用, 點解都要做一次呢?? 事關小瑟覺得, 有時家中有D位既反射及註波問題, 一定要用EQ來幫手解決一下既, 而做好左自己音場之後, 你最多可以唔開EQ, 唔開 Audyssey既功能, 但EQ及 Audyssey既數據就用上系統準出數據來點都好過自己手調既, 所以 Auto Set呢個動作, 點都做一次啦!!!!^_^

denon_4520_3313_107

denon_4520_3313_108

如果大家測試時出左呢個圖片呢, 即係大家SUB仔開得太大昸關係勒, 請跟返指示, SET返一半啦!!!

denon_4520_3313_109

好勒, 正式開始自動音場效正勒, 係自動設定之後, 小瑟再返自己既儀器測試得出音壓同距離數據非常準確, 距離同大音壓唔會多過1db或0.5m以上, 都幾好, 而前置佢就測到係大size, 不過小瑟自己就比較喜歡改做 Small, 試試效果!!

denon_4520_3313_110

搖控

Denon AVR-4520 帶有自動亮燈功能, 當佢感覺到有非常"依郁"佢都會自動亮燈, 不過小瑟不停炸機時, 佢就一路長著住, 有時熄左好快又會著返, 小瑟個人覺得太敏感, 有時都會幾影響睇戲既心情呢!! 當然依家呢個年代, 咩都係APPS既世界下, 你又可以下載返個APPS來控制部機又得!!!

denon_4520_3313_118

denon_4520_3313_117

正式炸機
(以Denon AVR-4520直出接輸出不經後級測試)

好勒, SET完機之後, 一於搵D戲出黎試下先, 小瑟今次囉左好多碟出黎, 不過係今次測試時, 因為時間唔多, 所以最終都只係試左四套藍光碟, 一隻CD及一隻SACD, 不過就係咁試下試下, 都玩左一晚了, 以下落黎就遂一同大家分享啦!!!

denon_4520_3313_66

港版復仇者聯盟
denon_4520_3313_70

denon_4520_3313_99

denon_4520_3313_98 denon_4520_3313_100

呢套真係呢二年試機必試既藍光碟之一, 例牌菜, 搵來一段HULK變身一段,呢段又有大爆炸, 又有IRONMAN同外星人飛來飛去, 試包圍感同爆棚野就岩哂, 而畫面方面仲係 FULL 16:9畫面, 夠哂埋身啦, 岩哂小瑟勒, 畫面一開, 各人像膚色同背景既景深真係非常討好, 而小瑟最鐘意就係來來回回咁睇「黑寡婦」面上一點點的石屎碎, 及其衣物上既質感, 因為係3313直出小瑟既 PLASMA之下, 畫面就好似打左層"立"係面咁, 有一份鏡頭特有既"晶螢"感, 真係好正, 而美國隊長既衣衫上的質地及 IRONMAN面上的金屬反光感, 都比到小瑟一份難以挑剔的高清幼滑感. 聲音方面, HULK變身前咪有一句 “I am always anger" 既, 小瑟前後試過開Denon Link HD同冇開既分別, 未開前HULK好似講好快好求其咁既, 但開左之後, 真係一粒一粒字咁講出黎同埋有左一份厚度感既, 本來都唔覺呢個D.LINK有幾大功能, 但經過開/關測試之後, 真係唔到你唔信, 就算小瑟用上 Kordz既 1M LUX (影音教父 Joe Kane 唯一認可的 HDMI 線材) 都好啦, 都係明顯就係感受到分別既, 當唔開Denon Link HD其實真係會聽得出 LOSS左唔小數據的.  好勒, 講返套戲先, HULK兜拳打落隻怪獸, 再爆炸果下野, 小瑟家中五隻喇叭係聽到由前面沖埋身咁"COME"埋黎既, 成屋都震過貓王, 但爆棚野都未夠過引呀, 最過引真係「鷹眼」係天台射 D外星人, 有一幕係兜過畫面後面再射到隻外星人架麻, 之後再有 IRONMAN機飛來飛果追逐, 以前既系統想做一個5.1有咁包圍感既"圓位"出黎, 難免聽得出有小小位係走失左既, 但4520出既包圍感同連貫性, 係砌出一個"圓形"效果已經比以前明顯同埋身感大左, 完整左, 現在小瑟只用 4520直推都已經出到呢個效果, 就咁比較下, 4520絕對已經超越左之前小瑟用緊既5509前級了……~_~!!

激戰
denon_4520_3313_69

denon_4520_3313_71 denon_4520_3313_72

denon_4520_3313_73 denon_4520_3313_74

之後就試下我地港產代表, 激戰先啦, 其實呢套戲黎講, 可以試機既位唔算多, 尤其係可以突顯到音效既地方更加唔多, 不過如果想試臨場感同包圍感, 都有二個場口可以一試既, 就係開場冇耐, 當家輝係的士上比人追數, 之後音樂就響起果下野, 雖然短短的一段, 但果份滑到不得了既背景音樂, 非常之咁出位, 由 4520夾3313出黎既聲音, 一D都唔惡, 中置喇叭對白位像真度極高, 而音效整體來講, 比到小瑟前所未有既劇院味, 而畫質方面, 絕對有驚喜, 由3313直出小瑟42″ Panasonic PLASMA顯示出來既畫面, 立體感之強不在話下, 果份通透而又色彩艷麗既感覺, 冇過份渲染得黎, 又真係非常之咁鮮艷, 整體效果比小瑟用緊既 105D有過之而無不及, 非常吸引. 之後小瑟一跳就去到家輝最後既一場MMA決鬥, 大光燈打落家輝身體上, 果份皮膚反光出黎既質感好正, 大家如果想睇多小小, 可以試下CLICK大小瑟上圖既相片睇睇, 當然過左機出黎既效果係同現場有距離, 不過果份通透感既神髓都有6-7成既感覺, 而聲音方面, 3313+4520得到Denon Link HD既加持, 人物對白聲比起冇 Denon Link HD加持下, 會出好多, 尤其係中高頻以上位置, 明顯係聽得出輸出極之穩定, 完全冇數據流失既感覺, 而係呢段戲上, 二位旁白既人聲平時聽係會特別細聲既, 有時仲會比電影中背景音樂既低頻搶過左聽唔到佢地講咩添, 不過係開左Denon Link HD既情況下, 雖然對白音壓都係偏細聲架勒, 但就唔會比低頻搶左既情況出現, 呢個都有一點係受惠於4520+3313出黎既低頻係偏向爽快同乾淨既, 所以戲中既所有聲樂同對白, 都可以清楚聽到而唔會比搶過.

EAGLES – Farewell 1 Tour-Live from Melbourne
denon_4520_3313_67

denon_4520_3313_75 denon_4520_3313_76

好勒, 炸完二套戲, 小瑟就想試下聽歌, 搵來 EAGLES – Farewell 1 Tour-Live from Melbourne 呢個美版藍光碟, 用返DTS-HDMA 5.1黎聽, 平時小瑟九成係用PCM來聽架勒, 因為一般 DTS聲都會硬, 但呢隻碟既PCM又只得2.0. 咁冇計啦, 用返DTS-HDMA來聽啦, 大家有睇過都知道一開始吹色士風既男子係度好長氣拉長左一大段, 跟住就現場觀眾拍手架麻, 而果段野又真係非常考你既系統既, 因為一控制唔好, 就會得出一個"亂"字, 小瑟當日就係比果段野嚇一嚇, 因為小瑟果日真係好專心請左一日假, 自己一個人係屋企開盡哂個 VOLUME 咁去聽, 最小都上到72db咁聽呢個LIVE既, 就係呢段, 小瑟真係前所未見原來自己套KEF XQ系既高頻可以伸延到去呢個位, 仲要KEEP到果份清晰同細膩度, 上到咁高位但個像真度依然非常之高, 感覺就好似果個男人就係小瑟屋企吹色士風一樣, 二個字講哂, “好到" 呀!!! 老實講, 咁多年來, 玩左咁多AV AMP來講, 好小有一部機可以比到小瑟"高傳真度"呢個感覺, 所以小瑟上面都講, 呢套新既Denon Link HD的確係"改寫原汁原味的定義“, 又係果句, 有聽過既朋友就知道我究竟講既係咩一回事呢!!!!^^"

接駁XPA-5後級測試
denon_4520_3313_96

denon_4520_3313_95 denon_4520_3313_97

好勒, 試到呢度, 小瑟就開始身痕, 想接返自己部XPA-5後級來玩了, 但因為之前 5509小瑟係行 XLR平均線的, 就係因為咁, 小瑟又要攪過幾條RCA比4520接去後級用, 而小瑟一向以來都係對 Gotham線材情有獨鐘(實情就係貪其性價比超高XD), 所以就二話不說, 搵左我地二手區的「音響樂園」Hi-Fi Paradise 亞Andy哥幫手, 整左5條2M Gotham 10070 coaxial線材 + Canane 75ohm coaxial同軸RCA頭, 唔好睇小呢條 Gotham 10070幼幼地, 比較好多貴價野, 除左輸在線身唔夠粗身, 個樣冇咁嚇鬼之外, 係聲音上, 無論速度, 音樂中的線條同音樂感都有一份難以言喻既貴氣, 以數百元一條來計, 絕對係非常實用之選.

港版魔雪奇緣
denon_4520_3313_68

denon_4520_3313_103

denon_4520_3313_101 denon_4520_3313_102

經過一輪"戰鬥"(小瑟家中機櫃後實在太緊湊, 換一換線真係可以用戰鬥來形式, 因為一定成身汗!!~_~), 終於將4520插左上XPA-5上, 不過今次小瑟冇再AUTO SETUP了, 只需要用儀器 SET返音壓就開始測試了, 而一開始小瑟就拿出近日小囡至愛"魔雪奇緣“一幕 LET IN GO來測

試先啦, 畫面一黎就係一個大風雪既雪山, 小瑟睇既唔係3D版, 不過立體感真係好似突左出黎咁, 而歌者既聲音厚實得來又帶點高貴感, 呢個係以前小瑟用 Viablue既 XLR線時特別明顯, 大家都話XPA-5係惡聲, 燥聲, 就係因為咁, 小瑟早前就喂左佢食 EarlyBird Jungle Power 啦, 所以本身係聽音樂上都已經好返好多, 而4520駁上 XPA-5之後, 轉行Gotham 10070之後, 直頭好似係將成部4520力水加左個 Double咁, 力水同音質既線條完整性加強左一大節, 將4520睇戲既華麗式 “劇院感" 鉅世無遺咁表現出來, 尤其係當 Elsa一開始唱 Let it go時, 配合埋畫面, 小瑟家中未有試過既劇院殘音回彈竟然比小瑟FEEL到小小, 而當去到副歌位置, 每一下拍子推進, 果份激盪感, 絕對另人不期然激昂埋一份, 而最另小瑟回味的, 真係最後一句歌詞之後, 一關口既殘響…………..好感動呀……..@@"

{:6_128:}{:6_128:}{:6_128:}{:6_128:}{:6_128:}{:6_128:}{:6_128:}{:6_128:}{:6_128:}{:6_128:}{:6_128:}{:6_128:}{:6_128:}{:6_128:}

試CD/SACD
denon_4520_3313_116

Denon一向比人感覺唔可以聽歌, 不過今次試左 4520之後, 就我自己來講, 真係有D改觀, 小瑟唔知同佢同馬仔收購左其實會唔會有原因, 不過今次4520的確係聽歌既效果上絕對 “見得人", 小瑟測試時用 3313 配TARALABS M3直接輸出聽 Bianca既JAZZ THEME UP II, 第二首的月半灣, 一開始空氣感好突出, 正正就係呢隻碟既特色之一, 而Bianca一開聲之定位, 有當日小瑟測試 TEAC CD-2000 SACD/CD Player 7成的感覺, 歌者企得好前, 離箱感交足功課, 營造到一點企係小瑟面前唱的感覺, 而音樂感上比較一般以藍光宇宙盤玩"仔細度"的數碼感不同, 雖然 3313都係難免要帶一點點的數碼味, 但聽得出其調聲係帶有一點點音樂中高貴的Hi-Fi味. 再轉另一隻SACD亞銀的"青愛", 聽第一首的"傾城", SACD即係SACD, 背景又靜, 音場又廣又準, 亞銀一開聲已經將整個環境同化左, 而最另小瑟印象深刻的, 就係去到最後既結他位, 每一下回弦聲, 好有質感同味道, 以呢個價位既宇宙盤同一部以AV為主的合併機來講, 出到呢個音場, 出到呢個質地既音樂感, 小瑟相信呢SET西裝真係殺低唔小組合呢!!!

MEDIA SERVER測試

denon_4520_3313_111

denon_4520_3313_112 denon_4520_3313_113

denon_4520_3313_114 denon_4520_3313_115

小瑟順便就試埋4520及3313對應家中NAS行DLNA播歌是否可以正常播放呢, 小瑟先試 4520方面, 基本上係可以正常存取到小瑟NAS內既音樂檔, 不過在中文字支援方面, 4520就會有D字係出唔到來, 但存取係冇問題既, 播放亦都沒有問題既, 但3313方面, 小瑟試左好多次, 都發係搵唔到部NAS的, 所以呢個測試上, 小瑟就試唔到3313播檔案的效果勒, 而4520方面播音樂檔的效果都不俗, 只係音質上比3313做訊源時有一點點燥感, 唔夠3313的干淨, 呢個應該係小瑟NAS上的問題, 但如果可以方便地聽歌仔既話, 呢個直播檔案的方法已經夠用呢!!

總結小感
小瑟今次算係真真正正可以係自己地方, 試到天龍現時最新既技術同威力, 雖然小瑟真係好想真真正正一試 AVC-A1HD既效果, 不過因為始終家中環境放唔落部AVC-A1HD, 另外AV既野, 始終真係有新玩新, 4520依家貴為Denon系中的最新旗艦, 而且尺寸大小又岩哂小瑟機櫃, 所以就算係已經出左咁耐, 小瑟依然借返來玩下, 同埋又真係好想一試Denon Link HD既威力, 所以就連 3313UD 都借埋來玩, 早已聽過好多師父講, 天龍既D.Link HD絕對係唔講得少既野來,  所以小瑟就一直都好想親身一試, 今次一試之後, 絕對刻骨銘心, 因為呢套西裝一拍埋, 真係絕對可以"冇得輸"來形容, 經左 D.Link HD既幫助, 音效中的像真度, 仔細度, 空氣感, 埋身定位, 中高音的伸延穩定度, 絕對係聽完返唔到轉頭果隻, 而近年好多朋友都會覺得天龍依家力水炸左, 又偷輕左機身, 小瑟冇試過其他 MODEL唔敢講, 不過親身試過之後, 4520直推小瑟套KEF同比較起加左 XPA-5後級後推套5.1來講, 的確係穩定性, 爆發力度上, 比直推係強的, 不過又咁講, 現今的天龍機係聲底上有所轉變, 改投將睇戲同聽歌的比例由當初的8/2, 8睇戲, 2聽歌, 轉左做 6/4, 6睇戲, 4聽歌的性格, 所以就少了當初天龍果份硬生生BUM埋身的兇猛聲底, 而改左做有殘響, 有質感的埋身肉博, 感覺一聽可能係會比人覺得冇力左, 而有不少天龍迷會覺得"有冇攪錯呀?? 咁咪冇左天龍既性格囉??", 但小瑟反而認為咁樣可以更平衡地發揮到電影中帶給觀眾的劇院效果同投入感, 以一部唔洗二萬蚊的合併機來講, 仲要係MIJ, 小瑟自己就非常岩口味, 年尾換機大計呢部心目中的評分真的非常高呢. ^^" 而 DBT-3313UD 方面, 係出呢篇小評前, 曾經有機會行過尖沙咀某影音店, 睇到部DBT03313UD竟然只係作價 HKD$4XXX蚊, 再返來76 Search一下, 亦都見到有師兄以呢個靚價入手, 以4千幾蚊呢個價可以入手一部聽歌又見得下人, 又可以有D.Link HD功能既藍光機, 仲要機身都幾足秤喎, 如果你本身意屬以天龍作為你既影音系統既, 真係唔多洗諗. 引用呢期好興果句, “識玩一定係咁玩XD", 唯一有個問題就係如果大家都需要睇BD ISO的話, 呢部機就真係幫你唔到, 不過如果以睇藍光碟來計, Denon AVR-4520 + DBT-3313UD 呢套劇院式的影音西裝絕對係近年比到小瑟一點驚喜之作呢!!!!!

>

有你既支持,就係我地最好既推動力,齊齊參與

FUNPost76.com

<

歡迎進入我地論壇對本文章發表您的回覆啦^^"
http://www.post76.com/x2/forum.php?mod=viewthread&tid=188433

 

*** 溫馨提示:想更緊貼更多影音界的最新資訊,請到以下的 Facebook 專頁按「讚好」 Google+ 專頁按「加到社交圈」加入我們,每天就會收到全新的中文影音免費資訊呢!! ***


• Post76網店經已開幕,請到: store.post76.hk


小瑟

關於小瑟

一名永遠的入門玩家, 對電影, 音樂, 影音等玩意永遠雀躍, 其後為了可以將這個毒海無涯信念推展開去, 故建立了這個毒人唔洗本的影音娛樂資訊平台, Post76玩樂網.

觀看所有 小瑟 的文章 - 網站

相關文章