OPPO BDP-103無敵宇宙盤 之 小試牛刀

由年頭風吹吹到年中,由年中等到年尾,好多人都對 OPPO 新一代的藍光機非常期待,係網上世界,部機就好似影音界既iPhone4當年咁,大家都留意住佢既動態,希望可以盡快得到第一手既資訊,好似外觀呀,入面既零件呀,晶片呀,究竟佢仲係咪 Qdeo Processing呢??4K就一定唔小得架啦,畫汁同音汁比熱賣既BDP-93比較又如何呢?當然,最多人想知既就係,究竟依家部BDP-103係咪真係已經唔再支援BDISO呢??呢D好多既問題都係大家升唔升級既一個因素之一。

而我地版上既師兄們都係最IN既玩家,好多都已經第一時間首批空運或 Pre-Order 行貨入左手,疑問亦都已經一一解開,但BDP-103 至今日來講(2012年11月7日),可以玩到既朋友依然唔係咁多,小瑟係 OPPO既小FANS之一,當然身先士卒,快快問香港代理,借來一部全新行貨BDP-103來同依家小瑟手上既BDP-93,來一個主客之戰,因為小瑟都想知道,究竟小瑟部BDP-93,係呢個新機既衝擊中,究竟係去定留架麻!!!XD

好廢話小講,依家就同大家睇下開箱照先。

基本上成箱野同BDP-93係一模一樣的,除左個 Model No. 改左之外,張相有小小唔同之外,任何野都冇變過呢。

好勒,去到 Remote方面,新 Remote上方係多左D 美國先用得既制,好似VUDU高清電影 同 Netflix即時流媒體,呢D係香港都係用唔到的。但基本上大家會睇戲時用到既果幾個制,都係冇咩變過,係個Setup制由中控四粒制既位轉左去下方呢下有D唔習慣,不過好彩Setup又唔係成日用。而呢個Renmote係可以控制返部舊BDP-93的,換句話講,93果個都可以控制到部103的。不過………….

今次就係由黃燈轉左極型仔的LED型的泠白光,掂哂啦,依家週街D車既車頭燈都轉玩HID LED燈,咁先夠型架麻,估唔到103個Remote都來型一下,呢個轉變OK喎!!!!XDDDDDD

如果大家好似小瑟咁,屋企有哂93同103的話,二個Remote互相干擾咪好煩??放心,廠方非常貼心地為各位用家設定左三種不同Remote Code,讓大家可以設定自己既搖控係屬於那一組的呢。(下面會提到的.)

好,囉埋個袋出來先!!!

橫掂都係,黎個機身寫真先。

以下二張機身以及機背大家可以CLICK以高清解像來睇呢。

機面依家除左有個USB端子之外,依家仲多左個非常流行既MHL/HDMI IN既插口,用 Android 手機既朋友,依家可以直接插返條支援 MHL既 HDMI線就可以將手機既畫面直接同步上去呢。

好勒,今次小瑟主力係測試一下,究竟呢部新世代既BDP-103會唔會可以另到小瑟動起換機念頭既,如果大家想睇BDP-103既數據既話,大家可以到我地新聞中心早前官方公佈既<OPPO 多功能藍光播放機 BDP-103>就可以瞭解清楚架勒。

以下呢張就係93同103呢二個兄弟既合照,好快佢地就要分別開工勒!!!!^^"

以下二張機身以及機背大家可以CLICK以高清解像來睇呢。

我諗好多人既睇法同小瑟一樣,93同103既分別,就係呢幾粒野勒。XDDDDDD

背面睇就可以見到,103多左一個USB INPUT,一個HDMI IN,同埋飛走左色差輸出,都岩架勒,去到呢代,色差都應該飛走架勒。

好勒,二位坐好勒,可以開工正式試一試D基本野先勒。先同大家介紹一下今次小瑟二部機既接駁線材同現有既器材表先啦。因為小瑟唔想咁快就比補品部機試,所以今次測試會以小瑟認為最基本既線材去比二部機去用,而呢二組線係早前都係小瑟既器材表中服役左一段幾長既時間,而小瑟又有哂二套係手,咁就最岩比哂佢地二兄弟做同樣既測試勒。

(視頻方面) OPPO BDP-103 (HDMI 1 輸出) BJC 1.3(HDMI線) / Northwire 18A(電源線) PHILIPS 42PFL9664H LCD TV

(5.1 音頻方面) OPPO BDP-103 (HDMI 2 輸出) BJC 1.3(HDMI線) / Northwire 18A(電源線) ONKYO PR-SC5509 + EMOTIVE XPA-5

(2.0音頻) OPPO BDP-103 (RCA) TARALABS M3 ONKYO PR-SC5509 + EMOTIVE XPA-5

小瑟現有器材 –

LCD TVPHILIPS 42PFL9664H LCD TV
Pre-AMPONKYO PR-SC5509
POWER-AMPEmotiva XPA-5 5 Channel Power Amplifier
BLU-RAYOPPO BDP-93
BLU-RAYOPPO BDP-103
MEDIA PLAYERPopcorn Hour C-200
SPEAKERKEF XQ10 (前置) / KEF XQ50C (中置) / KEF HTS3001SE (後置)
SUBWOOFERMK SB-12
SPEAKER CABLE(5ch)Gothem 50025
HDMI CABLEQed Performance HDMI
HDMI CABLEAudioquest HDMI-X
HDMI CABLEViablue S-900 SILVER HIGH-SPEED HDMI®-CABLE WITH ETHERNET
XLR CONNECTIONViablue analogue XLR signal interconnects cable
POWER CABLEEarlyBird Power-3.5 / Viablue X40 / Viablue X60 / Neotech NEP-3001 Ultra 7N
POWER BARJohnBlue PCS-6 美式拖板

開機畫面,103睇落已經簡潔左好多,依家二行12個ICON,最左邊多左一個BD的圖示,比用家知道直接LOAD碟係邊個位置,呢個設計好過93果個要出返MENU先可以搵返個BD既設計,而最右就加多一個SETUP圖示,小瑟個人覺得整個介面雖然冇咩大變動,不過依家上面一行六個的ICON來得更加實用同清晰好多了。

– OPPO BDP-103介面

– OPPO BDP-93介面

今次我地會用上2010年及2012年都非常之高質既藍光電影<變形金剛三>及<蝙蝠俠二>來作測試的。

試畫面 (行版變形金剛第三集 & BATMAN第二集)

首先,我地首試一下經常用來試機既一段鐵蛇一幕,二部機都冇任何調校,只是用上基本原裝設定,上圖為BDP-103既畫面,而下圖係BDP-93既畫面,二者係畫質上一比較,BDP-103無論係黑位,仔細度,色深,都好明顯………(留意,係好明顯果隻),好明顯地比93來得有層次,銳利,鮮艷。而呢個情況在小瑟的42″LCD TV上其實都試過可以做到的,就係上一次小瑟用Viablue HDMI線時,就感受過呢個咁有力,對比度咁深同立體感咁好呢個畫質。不過Viablue HDMI係一條上千既線材,而小瑟依家只係用左BJC 1.3既5年前買落既HDMI線,所以小瑟係一開機時,其實都真係即時扎一紮醒咁,估唔到呢代既BDP-103可以係機內既晶片又係真正既再一次進化。

試音效

大家都知道,呢場既環境用來試哂咁多隻喇叭既連貫性同環繞聲既效果氣氛絕對係最好不過既,如果講BDP-103畫面比93好已經係有驚喜,咁當大家用BDP-103睇返你地之前既電影,我相信大家會有將屋企既碟重新囉來睇一次呢份衝動,因為BDP-103係聲音處理上,絕對係更上一層樓呀,那份埋身,到位,真實既感覺,絕對係有過之而無不及,係呢代既聲音處理上,好明顯係聽到Detail位清晰同Sharp左好多,因為高音位置清晰左,變相所有野都再埋身一D,再近一D,任何野都聽得一清二楚,但又絕不含湖,而會唔會因為增加左高音而影響左低頻呢? 大家可以放心,呢點絕對唔會,反而依家既低頻深厚得來層次感有相當好既提升,而感覺就好似將肫低頻修左一修,依家出係一份圓滑既低頻,就以返呢幕鐘蛇為例,當佢縷斷棟大廈果一野,小瑟唔再需要將音壓不停提升去幫助埋身感就可以感受到鐵蛇包緊整棟大廈一縷"列"一聲五隻喇叭同時發出金屬爆裂果種質感呢。

BDP-103畫面

BDP-93畫面

BDP-103畫面

BDP-93畫面

其他功能

搖控中的三個客戶碼?

好勒,試完基本聲畫就同大家介紹一下BDP-103既其實功能啦,第一樣野,Remote有三個不同既Code的,呢個Code有咩用呢?主要係如果你有三個OPPO既Remote的話,呢個功能就岩哂你,因為呢個可以比你三個Remote用唔同既Code,咁就可以避免左互相干擾既情況勒,就好似小瑟有哂二部BDP-103同BDP-93係手,我按Power二部都有反應,對於試野時就非常麻煩,所以我就轉左BDP-103既Remote Code做 "2"就咁唔怕會撞埋部BDP-93勒。

USB外掛中文字幕

大家都知道BDP-93係可以用USB直掛中文字幕上去,咁大家手上既美版藍光就可以有返親切既中文字幕,小瑟係美國時可以安心咁掃貨,呢個功能絕對係不可小的,但去到BDP-103之後仲可唔可以掛到USB中文字幕呢?小瑟試過係"絕對可以"的,只要先將BDP-103既系統轉做繁體中文,咁你照返科林上lut兄呢個教學去做,就已經可以架勒。

OPPO-93,95/CA-651,751 BDP外掛字幕攻略
https://post76.hk/forum.php?mod=viewthread&tid=123972&fromuid=4

外掛Synology NAS 系統上的 BDISO 檔

可以大家都會好希望BDP-103可以支援BDISO呢個檔案制式,不過就小瑟測試之後,發覺硬碟上既任何ISO檔,係BDP-103上,係完全視而不見的,但網絡上有說話只要手上有Synology NAS系統,就可以將NAS上的BDISO檔先係Synology DiskStation的系統上,將BDISO先掛上,之後再係BDP-103上的HOME環境中,按入My Network再找你網絡中的NAS系統,再直接找到已經在Synology DiskStation上已經分享出來的虛擬光盤,咁就可以直接播放到ISO檔而唔需要事先將ISO解壓。

大家先參考以下網址去掛上你NAS上的ISO檔: <ISO Image Mount on the Synology DiskStation>,找出ISO檔再按MOUSE 右鍵就會出左一個功能表,之後找"掛載虛擬裝置"。以下小瑟就用上得利港版天際100分鐘來作個測試。

小瑟將掛上既ISO檔以AVCHD FOLDER名掛上,但事實上,其實唔洗一定係用AVCHD FOLDER名都係可以的。

呢個AVCHD FOLDER就係小瑟係 NAS 度掛載好的虛擬光碟裝置呢,一按BDP-103的OK就…………………………..

大大個得利係畫面上出現,而藍光碟的選單亦都可以正常顯示,呢個情況下,同小瑟入碟入去既情況完全一樣。咁樣,小瑟就唔洗怕手上既藍光碟有一天又自動死亡時睇唔返呢。

USB硬碟直播BDMV

而大家都好關心既,就係硬碟中的BDMV 檔,究竟在BDP-103中,究竟又睇唔睇到呢?有人話會冇左藍光菜單,一LOAD就入電影內,究竟係咪真係咁呢?因為冇左菜單,如果想跳Cheapter就非常之唔方便呢,尤其好似小瑟呢D成日都只係囉一段來睇既用家,冇左菜單真係非常麻煩的,咁究竟,用USB直駁硬碟既情況下,究竟又會係點呢?

播好硬碟後,進入主控台的MOVIE位置,就會可以見到硬碟,大家可以見到,硬碟中既中文字,同之前93一樣,都係有D字係出唔到既,不過呢個冇所謂啦。好,正式進入電影內容。

入到黎呢度,大家應該已經知道答案了吧!

直播Youtube

近日大熱既PSY – GANGNAM STYLE (강남스타일) M/V另小瑟都多左係Youtube搵MV,103預備好Youtune Apps比大家睇片,小瑟又試下入去睇睇呢個1080p的江南STYLE MV畫質如何呢?

基本上畫質都叫做高清畫質,不過就當然冇小瑟係電腦MON內睇咁靚架勒,始終42"同24"既分別都有成20"放大左係比較上冇咁靚呢,但Youtune炸喎,將就下啦!!!而小瑟當日試睇呢個片時,亦都專登用上Wireless方式進行連線,試試係網速唔夠既情況下,會唔會有科林師兄提及既"窒"既情況出現呢?答案係冇的,唯一唔好既,就係 Search就只可以用英文字作搜尋,如果有一日可以用中文字的話,就真係太好了。

手機Apps Remote

來到依家呢個手機大哂既年代,基本上如果同電子有關既野,如果冇個手機Apps支援一下,基本上都幾趕唔上呢個新世代既潮流,而係BDP-93年代,小瑟就非常希望可以有一個手機Apps可以支持唔洗開電視就可以搖控到部藍光機,因為OPPO既宇宙盤光碟機係音質表現上,算得上是中規中舉,當然再高一級既95係DAC既處理上會更好呢,但如果以我地呢D對音響發唔起燒但又想可以有好小小聽歌質素既朋友來講,一部方便又性價比好正既CAS控制中心,的確係非常有用的。而呢部103就已經新增手機Remote Apps程式,不過老實講,另小瑟大為失望呢。

暫時來講,呢個Remote Apps只係將實體搖控器虛擬化左,但就做唔到唔需要開TV就睇到依家咩Cheapter,冇選歌單,冇內容睇到,換句話講,如果想係手機內想知道My Network中既歌曲列表,就暫時未做到勒。好希望呢個功能,係不久既將來會可以實現呢。

首試OPPO BDP-103總結

聲畫方面

小瑟其實一開始,係唔覺得103會有比93更明顯既升幅的,因為小瑟心目中覺得93係聲畫上已經係非常之唔錯既表現,另外小瑟都唔希望又要換機,因為要換即係又要進貢。不過試過103同 93之分別後,生性貪心的小瑟已經將手上之93,放售到一名好友手上了,因為親身咁樣一對一咁比較過之後,小瑟實在返唔到轉頭,試過將93接返上TV上睇戲,唔夠15分鐘就熄機了。但當然,呢個只係小瑟自己既感受,唔代表人人都會一樣有同小瑟一樣既睇法,不過如果你諗住升級或物色緊一部五千元以下既藍光 機,小瑟解膽講你絕對一定要去影音店親身一試埋部BDP-103先下決定,如果唔係,你後悔既可能性係十分之高的呢!!!!

功能性方面

其實小瑟都唔多用93的硬碟或網絡來睇戲的,因為呢個工作不嬲都交比PopCron C200負責的,所以係任何既BDMV或BDISO的對應上,其實都唔算太擔心的,而BDP-103可以以網絡支援直接存取NAS上的檔案,只需要在任何的檔案前加多一個AVCHD的FOLDER在上面,就可以自由地播放,這個小小的工序,相信都唔會有太多人需要投訴的呢。最後,因為時間的關係,基本上小瑟仲有一個HDMI IN既功能未能可以一一測試,呢點可以要等小瑟正式接左BDP-103入宮之後,再同大家係科林上作一次測試的呢。

在本測試前一星期,科林上已有大量有關OPPO BDP-103的討論,歡迎大家一同進入影音玩樂討論區發表意見.
https://post76.hk/forum.php?mod=viewthread&tid=137629&fromuid=4

*** 溫馨提示:想更緊貼更多影音界的最新資訊,請到以下的 Facebook 專頁按「讚好」 Google+ 專頁按「加到社交圈」加入我們,每天就會收到全新的中文影音免費資訊呢!! ***


🏠 ★ Post76網店經已開幕 《store.post76.hk》

小瑟

關於小瑟

一名永遠的入門玩家, 對電影, 音樂, 影音等玩意永遠雀躍, 其後為了可以將這個毒海無涯信念推展開去, 故建立了這個毒人唔洗本的影音娛樂資訊平台, Post76玩樂網.

觀看所有 小瑟 的文章 - 網站

相關文章