[精華文章] DX100 : 開箱圖及簡單聽感

圖/文:jeff64hk

前言:
自Ibasso早前宣佈將推出Reference DAP – DX100,便一直密切留意其推出日期。採用32Bit高級解碼晶片ES9018、Android 2.3系統加觸控屏幕式控制,支援最高24bit/192kHz解碼,並可作升頻輸出處理,內置可輸出24/192光纖及同軸插位,Lineout配合外 接擴音,可應付8-600ohm耳機嘅內置Amp部件…..以上每項都對音質有要求的用家產生極大吸引力,究竟將高規格元件放在一機內,應用家要求加 入多項渴求功能,是否就真的變成神器,成為最終方案解決所有用家嘅問題?好奇加上一直尋找代替Player+Amp出街推Sennheiser HD25 II嘅一體播放器原因,便托好友協助預訂,並於上週入手,在此再次多謝好友嘅幫忙!

以下係開箱圖及使用個多星期後嘅使用感…..

開箱圖

包裝盒:高貴精美
Box.JPG Unbox 1.JPG

跟機保養咭
Warranty Card.JPG

配件:火牛及3.5頭/蓮花插同軸線一條
Accesory.JPG

叉電時間:用完第一次電後再叉,叉滿需時較長,約需7-8小時,之後約需4至五小時便可叉滿!
叉電中畫面
Charging.JPG

系統:現時跟機採用2.3系統,開機後,會先check內置記憶有否error,需時約十數秒,故若此段時間按播放器,可能會無反應。之後就見到 Android五頁式Menu,播放器預設放置正中一頁,方便使用,最左同最右係空白頁、左二係主要功能頁面,中間就係播放器、右邊係播放列表。對使用 Android手機用家而言極易上手。
Android.JPG

播放器介面:簡單介面、詳盡介面
Play 1.JPG Play 2.JPG

播放清單介面:可下載Android軟件協助處理專輯封面,即使Wav檔亦無問題,對睇慣Cover嘅用家例如我黎講十分重要。
List.JPG

聽感:

EQ及SRC關閉, Digital Filter : 開啟Slow Roll Off下直推

直推配耳塞:
With IEM.JPG
用Low Gain夾常用嘅六對包括 W3, UM3X, X10, Monster Copper, Monster Miles Davis, TF10Pro, 個別聽感不贅述,但整體而言,感覺高頻修飾得圓潤,有未上盡感覺,夠清唔夠脆,但聽落會有舒服感覺,尤其夾用動鐵類耳機會令耳仔無咁疲勞,中頻至中低頻係 出得最靚一段,聲音密度高,令不論人聲或樂器都有味道,低頻量足但有偏肥感覺,但可能解碼方面做得理想,令音樂保持分析力及細緻度,未致出現低頻過量而遮 蓋其它頻段情況。聽落音樂感好,令人容易投入音樂當中,如果講改善,最明顯應該係中低至低頻段,令包圍感提高,如果用緊嘅Player推耳機有聲音密度、 包圍感不足同低頻欠量,可以嘗試夾下試聽。畢竟上述耳塞追求嘅推力,呢部機一定出到,但味道就要以自己喜愛為準。

直推配耳筒:
With Headphones.JPG

用Mid Gain夾改用650線嘅HD25II及原裝線Adidas:改善左聲標嘅情況,聲音密度高,因此定位準確,低頻量增,包圍感良好。完全感覺到推力足嘅優點,以直推而言,已經收貨有餘,唯一都係高音唔夠滑同清脆,但整體聽感良好。

用High Gain夾原裝線Q701:一直用Q701原因係比同廠K701及K702易推,聲音仍有一定水準,Bass部份較易推出量,而且較雜食。雖然較易推,但 要推出有一定質素嘅Bass,用Portable Player+Portable Amp仍有一定難度,我用Fuze/IPC + P3Mod/GoVibe Sharps推,即使扭到音壓足夠,但Bass仍然不足,一直唔滿意。直推測試中最驚喜係夾Q701,音壓足夠之餘Bass亦出得足夠,令包圍感充足,分 析力、聲音密度及線條、空間感、定位,都有一定水準,顯見Amp部份推力良好,當然同枱Amp比仍有不及,但以一體化產品而言,已經係非常理想!至於公認 難推好嘅耳筒如HD800、K702,恕我未擁有作測試,不能提供意見。

直推表現:解碼方面,ES9018表現身價,分析力、細 節、分離度都有水準,反而比較下如果要挑剔,係Amp部份可以有改善嘅空間,呢個結論係比較用Lineout/Coaxial出其它機得出。推力方面絕對 無問題,整體音樂感良好,明顯減低數碼味道,聲底偏厚暖,控制力好。其它Player常有嘅高音尖或剌耳、聲底偏乾硬冷、低頻一係不足一係偏肥或散嘅問 題,DX100都相對處理得比較好。是否各方面都優勝?起碼我聽過嘅Korg MR1高音比DX100出得靚及滑,但考慮整體平衡、推力、及便携性,DX100仍然係值得考慮嘅機種。

注意事項:

續航力:叉滿電,關閉Wi-Fi,光度50%情況下播放16/44.1 Wav檔,可連續播放約6小時。

支援格式:播放16/44.1, 24/96, 24/192 Wav、FLAC、Apple Lossless (M4A)、AIFF 、.CUE檔測試無問題,中、日文支援未見大問題,但M4A、AIFF未能顯示封面。

其它功能:

同軸/光纖輸出:

試用同軸輸出接Cambridge Magic Plus升頻至24/384推Q701,提升效果明顯,背景寧靜,高中至高頻出得比直推好得多,分離度、音場都有改善,令整體音樂表現更悅耳。

Lineout:
採用3.5插頭輸出,試用Lineout接P3Mod及GoVibe Sharps Mod推HD25II及Q701,只用普通接線一條,但效果非常出色,比直推多番高中頻,同時低頻量減低(P3Mod)或者收實左(GoVibe Sharps Mod),整體平衡度極之理想,令人有一聽就唔想放低對耳筒嘅魅力,如果要分高低,夾P3Mod會更好,因為音色線條更靚,亦可能Op-Amp調音係根據 自己喜好設定而成。不過對DX100嘅Lineout我仍然有唔清楚嘅地方,因為Lineout下音量控制仍然有效,究竟有否bypass左Amp部份 呢?不過點都好(即使雙重放大下),非常非常悅耳係事實,對我黎講已經足夠,技術層面其實無咩意義,純粹好奇!

升頻:
會對音檔作倍數升頻輸出,如44.1,可選擇變為88.2或176.4,並於封面圖右上方顯示,呢部份未詳細測試,粗略試用,係對音色有變化,好壞要再試先確定,但初步感覺無Cambridge Magic Plus咁好效果。

數碼濾波:
分Slow Roll Off同Sharp Roll Off,純個人口味選擇

總結:
解碼部份出色,Amp部份推力足夠,已內置64GB及可支援32GB插咭,支援差不多大部份市面流行音檔,玩法多變化,作為一體機,值得考慮入手。但另一 方面,一體機設計限制音色變化係必然嘅短處,尤其試過Lineout出P3mod嘅表現十分出色,真係有矛盾嘅感覺,原意代替Player+Amp,但純 計音質,可能最佳方案係DX100+Amp,變左帶出街仲大件左……..點玩法?有排諗…….

優點:
– 解碼出色、推力足夠應付一般要求
– 一體化設計、便於携帶
– 輸出選擇多、玩味十足
– 音質扎實,搭配耳機/筒容易
– 支援格式多
– 可上網下載軟件,為使用增值

有待改進:
– 應附加說明書
– 機身易發熱
– 無音樂播放下黑屏待機時,再開機會出現電流聲
– 待機聽歌時,必須開機解鎖後方可調整音量
– 太多插孔位,容易入塵或於出外使用時跌入雜物,應附送膠塞遮蔽
– 應設計於軟件中可選擇開啟/關閉不同輸出,現時Lineout/Coaxial/Optical/大小Phone Out可同時輸出


歡迎進入我們的影音玩樂討論區發表意見.
http://www.post76.com/discuss/viewthread.php?tid=112960&extra=page%3D1%26amp%3Bfilter%3Dtype%26amp%3Btypeid%3D207

*** 溫馨提示:想更緊貼更多影音界的最新資訊,請到以下的 Facebook 專頁按「讚好」 Google+ 專頁按「加到社交圈」加入我們,每天就會收到全新的中文影音免費資訊呢!! ***


🏠 ★ Post76網店經已開幕 《store.post76.hk》

Post76 Reporter

關於Post76 Reporter

身為76戰地記者, 人玩我又玩, 人唔玩我都要玩, 咁先係76新聞, 事事上心, 願天下毒物都任我們76記者任玩任試.

觀看所有 Post76 Reporter 的文章

相關文章