[精華文章]《那些年,我們一起追的女孩》觀後感 (有內容)

圖/文:ykluk


早喺個幾月前, 商台903已經不停咁講呢套戲, 網絡鬼才九把刀拿下台灣四億票房既青春片已經夠叫座力, 再加上日播夜播既主題曲 – 胡夏既《那些年》, 令一直鍾意睇愛情青春片既小弟一個月前已經買咗隻ost嚟聽. 唔知點解優先場唔睇, 終於等到正式公映, 今日就同老闆入場睇.

問心, 呢個月不斷吹捧, 睇完套戲嗰陣唔多唔少會有少少失望…"邊有啲人吹到咁好睇呀!!" 反而老闆出嚟出乎小弟意外話好好睇, 因為佢連九把刀係乜水都唔知, 莫講話呢套係乜戲.

p9-3.jpg
但係過咗個幾2個鐘, 宜家一路聽住隻ost, 一路諗返套戲既片段, 反而有少少戚戚然想寫少少感想.

03.jpg
成套戲好簡單, 其實根本就係編劇導演九把刀既個人自我滿足既表演, 佢將佢小時候同一個女仔既初戀(或者叫曖昧, 因為未正式一齊過!)既故仔講出嚟. 打正真人真事橋, 但係小弟覺得唔多唔少裡面既情節有啲係誇大, 甚至係九把刀既個人觀感 – 正如小弟覺得女仔未必如九把刀咁諗係咁鍾意佢, 如果唔係都唔會一早嫁咗第二個, 甚至之前同佢老友拍拖! 當然睇戲無謂駁古, 係真係假呢啲只有當事人先知, 或者九把刀呢套戲會搞到真人版沈佳宜同佢老公關係變差!

01_1.jpg
反而小弟最想講既係, 九把刀同小弟年紀差唔多(佢33, 小弟34), 裡面有好多事件令小弟有一定共鳴: 七龍珠, 王祖賢楊采尼既明星相同海報, 飯島愛既av片, 大學時要排隊打電話比女朋友等等. 一種以曾相識既感覺, 一種莫明既掛念, 當然相比台灣人, 我作為香港仔能夠有既共鳴感係少啲. 要一讚既係套戲既青春熱血感覺, 的確可以帶返小弟返去兒時既感覺, 為咗表現自己而同老師作對, 喺班房成日扮晒大佬搞吓啲同學咁, 既好笑又好睇!

港產片真係出唔到呢類片, 記得好耐以前既《香蕉成熟時》都唔錯, 但之後已經無以為繼. 反而台灣, 日本甚至韓國都會有呢類片種.

16Cry.jpg
作為一個老青年, 諗返以前唔多唔少會為過去既無知幼稚而覺得可惜, 會因為為咗證明自己而去打交, 會因為面子而同啲高材生鬥成積, 會因為想搏得女友一笑而跑到腳抽筋都要拎個獎牌返嚟, 會因為想同女友睇一套《整蠱專家》而成個星期唔食lunch去慳錢, 會因為一啲無聊而低能既事可能就會放棄一段戀情. 不過回憶係自己人生最好最寶貴既寶藏, 既獨特而又無人可以拎走. 所以有時睇返呢類愛情青春片, 可以搵到一片片既回憶都幾開心. 誠如九把刀所講:"我的青春很快樂很瘋狂, 郤也有很好遺憾, 這些遺憾是青春美好的副作用, 帶著我回到十七歲那年的青春盛夏."

早排因為影結婚相既關係, 係間房執嘢時搵到一啲中學同大學時期既書信, 相片同紀念冊. 睇返自己以前青春時代都轟轟烈烈過, 亦會諗到如果當時做既決定或者行為有少少唔同, 今時今日都未必係咁情況, 或者唔係同宜家個老闆一齊. 好似戲裡面沈佳宜所講:"曖昧既時候係最美麗, 如果可以長一啲就可以享受多一啲." 宜家呢種曖昧感覺只能回味, 或者藉著電影比我咯.

當然時間唔會返轉頭, 就算得我都未必想, 但小弟有時會諗, “如果當初唔係咁會點呢?" 而呢啲如果, 只能夠好似戲裡面咁(個人覺得都係九把刀所諗), 如果真係有平行世界既話, 我諗我可能同以前既某某一齊結咗婚生埋仔…有時對一啲自己無可奈何既事, 放咗喺所謂既平行世界去進行, 內心都會有另一種釋然…

02.jpg
如果有ching睇到嚟呢個位, 真係唔好意思, 小弟借咗呢套戲呢個機會去舒發咗某種感覺同某種個人思想. 而呢樣亦都係九把刀喺《那些年,我們一起追的女孩。》裡面所做既同一事情!

歡迎進入我們的影音玩樂討論區發表意見.
http://www.post76.com/discuss/viewthread.php?tid=90296

*** 溫馨提示:想更緊貼更多影音界的最新資訊,請到  http://www.facebook.com/post76 的專頁內頭頂按「讚好」加入我們,每天就會收到全新的中文影音免費資訊呢!! ***


🏠 ★ Post76網店經已開幕 《store.post76.hk》

Post76 Reporter

關於Post76 Reporter

身為76戰地記者, 人玩我又玩, 人唔玩我都要玩, 咁先係76新聞, 事事上心, 願天下毒物都任我們76記者任玩任試.

觀看所有 Post76 Reporter 的文章

相關文章