DacMagic + A2W + foobar2000 = CAS?

早排已經問過大家, 平平地有咩好既CAS喇叭可以介紹下, 上二個星期終於都正式入手Audioengine A2W作為小瑟第一套CAS既有源喇叭, 雖然好多師兄都阻止我買呢對喇叭, 不過以 HKD$14XX呢個價可以入手呢對有源既喇叭來代替小瑟用開既CHEAP CHAEAP 2.1喇叭聽歌, 呢對 Audioengine A2W為小瑟既入門CAS已經暫時足夠了!!!!

先比D開箱照大家睇睇先!!!!^^"

雖然係平平地, 不過佢既包裝都OK貴氣架!!!! 起碼有個袋仔裝好哂D配件先丫~~~~

之後每隻喇叭都有包裝袋袋好架~~~~

開出黎真係比我預計既細隻好多呢!!!!

好勒, 之後就要來個大執合………比個未改做之前既相比大家睇下先~!!! 嘩…………亂到呢!!!!

依家………WOW, 干淨哂, 一天都光哂呢!!!!


小瑟今次諗住逐步來, 咩線都唔會, 全部用哂原裝野先, 玩一陣先(真係一陣架炸), 之後換喇叭線, 電源線, 最後加埋部DAC入去, 呵呵, 有排玩了!!!

初插感受!
起初一睇個樣, 嘩…..個低音單元3吋都冇……會唔會真係零低音呢, 仲係掉套CHEAP CHEAP 2.1時, 有一秒諗過好唔好KEEP返個SUB仔幫手, 點知一開聲…喂, 唔係喎, 有低架喎, 當然大家唔可以諗係什麼打心口, 到哂肉果隻, 但一定唔係只FEEL到高中果隻囉. 我只係用 3.5mm入炸, 聽歌效果, 足以令我冇再擔心冇低音呢個問題先呢~~~~

小瑟部PC都有THX架, 唔知係咪因為咁, 我覺得佢 3.5mm既輸出都OK靜架喎, 不過我當然知道, 佢仲有好多好多既進步空間啦~

如是者, 小瑟就咁用3.5MM OUTPUT玩左呢對喇叭一個星期…..都冇, 終於都係頂唔住, 始終都係要開始學玩CAS…….

話說上回講到入左 Audioengine A2W, 以3.5MM直入PC上的 SPEAKER OUT聽左一個星期(其實正式來講係聽左二首歌… ), 頂唔住, 人聲高音好干又濛, 心諗都係冇計架勒, 想係電腦上聽返似樣小小既HIFI歌聲, 都係冇得慳, 一於入手部 DAC玩下, 爬左一陣文呢部 Cambridge Audio DAC magic係76上早年都有好多師兄玩過, 評價仲真係幾唔錯, 所以…….(唔洗我再多講啦!!)

小瑟用左 MOGAMI 2964 RCA線接上, 全部又係用返原裝線, 未點做優化, 將部DACMAGIC用最普通既USB線接上, 一插入PC, WIN7已經認到佢同埋裝好DRIVER, 好簡單, 再將原先用的 3.5MM線飛走, 再用 JADIS大師早前既教學 “CAS 上的 CD 播放程式探討!" 介紹的 Foobar2000 搵到岩岩STABLE版 v1.1.7, 裝上左之後, 都唔係好洗點SET野, 已經可以出聲, 係呢刻, 好心急既小瑟彭彭聲用返 “雪狼湖K2HD版RIP出來的 WAV FILE PLAY一次, 用邊首試聲最好呢??? 當然係 13 原來只要為你活一天(陳潔儀), 同14 原來只要共你活一天(張學友)二首來試聽啦!!

之前係TARALABS既試聽會聽過呢首真係一聽難忘, 到依家都仲記得當晚器材出到既空氣感, 陳潔儀既女高音, 當然最好試既就係果句 “原來給你真愛的我是無悔, 是每一天…………", 佢果個 “天" 字, 係未加DAC之前, 真係就係呢個 “天"字, 另我聽到側哂耳, 好想快D熄左部機佢, 加左DAC之後, 個天字比之前既已經有好好既修飾, 尤其係將個聲壓加大, 圓返唔小, 但聲底都仲係好干好澀, 反而學友把聲就好左唔小, 不過小瑟都知道架勒, 聽過萬萬聲既器材, 要係呢個幾千蚊既價位上取得 10分1既感覺, 的確係非常非常之難既難事, 不過小瑟知道, 依家我岩岩開始, 仲有大把野可以玩, 部DAC既電, 喇叭既電, 喇叭線, RCA(小瑟團購左條TARALABS都未囉, 呵呵~~), 進步既空間仲有好多好多, 況且依家成套野都係新CHOK CHOK, 仲有排煲, 依家加左DAC之後已經比我感覺開始入到門勒, 往後仲有好長既路要行呢…..

比我搵到呢二件野出來, 岩岩將原裝既磁環換上TDK呢粒, 效果其實唔係太明顯, 其實呢D牌子性既野我相信都係未必有好大的分別呢!!

依家終於明白, 點解D HIFI發燒友可以萬萬聲咁面不改容, 音響呢條路, 真係一條好難返轉頭既不歸路, 尤其係屋企有小朋友唔可以睇戲, 但聽歌冇話唔比勒卦~~~~

歡迎進入我們的影音玩樂討論區發表意見.
http://www.post76.com/discuss/viewthread.php?tid=85121
http://www.post76.com/discuss/viewthread.php?tid=84112

*** 溫馨提示:想更緊貼更多影音界的最新資訊,請到 http://www.facebook.com/post76 的專頁內頭頂按「讚好」加入我們,每天就會收到全新的中文影音免費資訊呢!! ***


🏠 ★ Post76網店經已開幕 《store.post76.hk》

小瑟

關於小瑟

一名永遠的入門玩家, 對電影, 音樂, 影音等玩意永遠雀躍, 其後為了可以將這個毒海無涯信念推展開去, 故建立了這個毒人唔洗本的影音娛樂資訊平台, Post76玩樂網.

觀看所有 小瑟 的文章 - 網站

相關文章