2008年周年版聚

圖: 小瑟
文: lkljason

一年一度既POST76周年版聚又係炒媽拆蟹聲中結束勒,大家千其唔好誤會當晚係咪有d乜野唔愉快既事情發生,事實岩岩相反大家應該都能夠盡慶而歸 ,因為當晚18個麻甩佬 (或者麻甩仔啦,自己對號入座~~XDD),一位Lady都無 (上菜個阿姐唔算啦),所以當晚大家會比平時會豪邁一點,小小助語詞就更加唔能夠缺小,講真,如果唔係大家岩晒咀形都好難有咁既氣氛,希望唔會嚇親d新朋 友仔啦,我平時真係好x小講粗口架~~一笑!

今年都有d第一次出席既朋友仔我係未見過既,例如type R、阿定、WE300B同龍貓王子….等等(排名不分先後呀o下),雖然係初次見面,但大家唔會話好生保唔出聲果隻,反而係一 “火達" 即著唔使點warm up,可能係大家平時網上已經係暢所欲言乜都講,所以感覺好似已經識左好耐咁。其次就係好耐無見過既力哥仔,咁耐無見風采不減當年 (你會問點解用當年呢,因為真係差唔多4-5年無見,好開心可以見翻d舊朋友)

今次地點係新蒲崗既得龍酒樓,由雷老板 (雷因) 幫手訂到到間 “廂房" 比我地班嘩鬼肆無忌大咁嘈喧把弊,希望唔會影響到雷因呢個熟客仔形像啦。一如以往因為版聚日期接近聖誕,所以都會玩下交換禮物仔,今年大家選購既禮物都係 d熱門野多,手指 (usb記憶體) 搭模型呢條單Q就係其中較多人選購既禮物,抽到乜野禮物並唔重要,最重要係個過程同氣氛,呢樣野真係幾多錢都換唔到既。

一年一次既聚會,其實年年都講一次真係好難遷就到所有朋友仔,所以希望黎緊盡可能一年搞兩至三次聚會 (私聚唔計呀o下,小瑟麻煩你諗諗佢丫),大家一齊出黎食o下飯吹下水,咁就唔使年年都要望穿秋水咁等周年版聚嘛!


🏠 ★ Post76網店經已開幕 《store.post76.hk》

小瑟

關於小瑟

一名永遠的入門玩家, 對電影, 音樂, 影音等玩意永遠雀躍, 其後為了可以將這個毒海無涯信念推展開去, 故建立了這個毒人唔洗本的影音娛樂資訊平台, Post76玩樂網.

觀看所有 小瑟 的文章 - 網站

相關文章