Eight HD-838高清機頂盒入手了!! (上集)

話說我屋企個大廈終於都貼出通告話會係 5月中至5月尾就進行高清天線升級既工程, 小瑟對屋企既 TVB質素就不嬲都唔係好滿意, 一聽到呢D消息當然係興奮都震啦, 拿拿林開始上網睇下咩機頂盒係最多人用, 而口啤最好, 最穩定, 聽左咁多位網友既意見, 再加埋老友雷因同MING SIR都係用佢, 終於係今日收工時, 經雷兄既介紹, 就出左深水寶, 鴨記一家名為”聯通電業”既HIFI鋪, 睇下岩心水就買返屋企勒~~~~

真係你當我賣廣告又好, 吹水唔抹咀都好, 我好耐冇讚過D鋪頭既 SALES哥哥架勒, 不過今次呢位仁兄真係要讚讚, 服務態度真係非常之一流, 佢除左有禮貌之外, 唔係我話買, 佢就包野比我收錢走人咁簡單喎, 佢自己自動自覺開哂成部機, 插埋電源, 接埋天線, 駁埋電視機, 開機幫我 SET好哂台, 之後仲由開機操作, 至到SEARCH台, 轉台, 預校錄影, EDIT預校錄影, FORMAT USB HD, 就連點解折除埋 USB HD既方法, 都一一做一次比我睇, 仲要係好有心機, 慢慢講果隻, 連有客問佢野佢都教埋我先, 唔會話知道我一定係買就即時做新客或者快快手手係咁椅講下D基本功能就算, 真係唔知幾時開始, 我已經冇試過買一件電器用品, 係可以有一個咁圓滿既服務, 當場我同小肥都真係好滿意, 好滿意, 仲要係好耐都未試過咁滿意果隻…………^^”

好勒, 題外話就講完, 講下部機勒, 機頭其實呢部都算係中規中矩, 四平八穩, 算係幾好, 不過個 REMOTE真係完全體現哂”國貨”既標準, 好樣定唔好樣我就唔講勒, 大家自己睇啦.XDDDD

不過市面上部部都係咁, 冇計啦, 但呢部機既功能都幾好(即係就咁睇, 未試哂咁多野既), 好似設定既介面呀, 都幾靚仔, REMOTE既按鈕設計都幾就手, 同D DVD機既 REMOTE設計差唔多. 而今晚只快快手咁手手咁接駁左一次來睇, 發覺現時只係SEARCH到3個台, 分別係”高清翡翠台”, “J2”, “高清生活台”. 我就岩岩睇到 “原來愛上賊”既高清版本, 不過唔知係始終天線方面未整好定點樣, 我覺畫面唔係真係話有好高清既感覺, D光位一係就爆爆地, 一係就黑位黑過頭, 需要係TV作出一D調校先掂, 而因為只有三個台, 小肥唔接受睇唔到明珠台果D, 所以我今晚就先還原基本步先, 聽日再買多條天線分插同多線天線, 實行係呢個過度期, 二邊都睇住先. 下次. 我就同大家講下當我座大廈攪掂哂天線既升級工程之後, 畫質同其他方面有冇咩改進啦!!!^_^


🏠 ★ Post76網店經已開幕 《store.post76.hk》

小瑟

關於小瑟

一名永遠的入門玩家, 對電影, 音樂, 影音等玩意永遠雀躍, 其後為了可以將這個毒海無涯信念推展開去, 故建立了這個毒人唔洗本的影音娛樂資訊平台, Post76玩樂網.

觀看所有 小瑟 的文章 - 網站

相關文章