The Fifth Element 第五元素

第五元素, 呢套電影小瑟第一次睇時已經係10年前了, 當年小瑟仲係用緊VCD係電腦上面睇, 我唔係成日都係電腦上睇戲架, 但一開左呢套戲睇之後就唔熄得機, 因為真係太正了, 第一有我鍾意既 Bruce Willis做男主角, 另外就係故事內容非常新鮮, 我之前係未睇過呢類咁新穎既太空片, 而到中段, 當黑人 Chris Tucker出場(當時佢仲未拍 RUSH HOUR)時, 更加為呢套電影, 添上不小另人回味既火花, 就係咁, 呢套戲就係小瑟心目中, 佔上一個極之重要既位置呢.

而唔知咩原因, 小瑟當年都冇買VCD, 之後都好似買過一隻 SUPER BIT既 DVD, 不過, 就因為畫汁同音汁都唔係咁 SUPER, 所以最後都係放左出二手市場, 就係咁, 過下又一年, 過下又一年, 到今年, 小瑟終於都有左高清既系統, 可以學人玩下 BLU-RAY碟, 而我就最後以 $170蚊係灣仔188商場既二樓死角鋪買入呢隻小瑟認為非常之好睇既電影呢. 呢隻 BLU-RAY碟係籃光初初面世時, 已經出過一次, 當時係 2006年, 不過當時畫質既壓縮技術只係用上 MPEG-2呢個舊技術, 就當時時來講, 唔小買左呢隻碟既人都投訴呢隻碟畫汁差, 同DVD冇大既分別, 可能 SONY都聽到投訴既聲音, 係 2007年就重新做左一隻新版, 用上最新既畫積壓縮技術 MPEG-4 AVC (H.264)收錄, 仲可以比已經有左舊版既朋友以一換一既方式, 換返呢個新既 REMASTERED既版本, 不過以上我講既野都係來自美國既資料, 而香港SONY行呢邊就好似未有聽過呢個一換一既計劃勒, 不過依家買碟既朋友, 都應該唔會仲買舊版本呢, 下面圖片就係新版先有既圖示, 大家買呢隻碟時記得認清楚先好入手呀!!!!

MENU設計非常之簡單, 都係以實用為主, 而音效方面就分別有 PCM 5.1 (48kHz, 16-bit)(英語)同 Dolby TrueHD 5.1(英語), 之後就係法文 DD5.1, 今次 TrueHD 5.1係 PS3上可以內置解碼到再用 HDMI以 PCM方式輸出到AV AMP內, 所以, 今次小瑟可以欣賞到新音效所帶來既震撼力呢.XDDDDD

BLU-RAY畫質:本碟係用單面雙層 50GB碟片儲存, MPEG-4 AVC(H.264) 黎收錄 比例方面係 2.35:1, 現時來講每套影碟都應該有既格式, 而畫質方面, 以一套 1997年既電影黎講, 呢套已經 REMASTER得非常之好, 光暗對比同顏色都好鮮艷, 睇過呢套戲既朋友都知道, 呢套戲既戲服, 佈景, 人物造型都非常色彩斑斕, 而呢套戲係 BLU-RAY上, 更加發揮得淋漓盡致, 以前將 DVD放出二手市場呢個決定, 更加係明智之舉呢. 畫質有幾靚我識講比大家知, 不過我就可以講好唔過 I,ROBOT但就好過天煞, 咁好唔好大家就自己諗勒.XDDDD

BLU-RAY音質:聲音我用 PCM5.1來試聽既時候, 高音明顯係比較標既, 好似槍戰時既音效同爆炸都比較標小小, 有小小刺耳既感覺, ,不過始終係新世代音效格式, 始終比 DVD時代有非常之大既分別, 無論係分析力同定位, 都可以清楚聽到唔同既分別, 而其中最正既就係係太空演奏廳聽女高音唱歌時, WOW真係聽到我都想企起身大叫精彩呀~~~~~~^.^

下圖為本片音效與畫面之數據流量參考

BLU-RAY特別收錄:

特別收錄真係非常之小, 就只有一個

總結:
我呢次可以以 HKD$170呢個價錢購入呢隻經典既BLU-RAY電影, 我覺得非常之抵, 事關當日買呢隻碟既時候, 本身已經係旺角德發見到呢隻碟, 但係就賣 HKD$175蚊, 而咁岩小瑟當日就要去灣仔既關係, 知道灣仔不嬲碟價都平過旺角區既, 所以就去灣仔先入手, 不過都行哂三間先搵到, 好彩都冇忍錯手呢. 講返呢隻 BLU-RAY碟, 如果你係未睇過呢套戲既朋友, 而又鍾意天馬行空既太空電影既話, 呢套我諗都會係你影碟櫃中, 絕對不能小既一套經典影碟呢.

本片格式概覽

The Fifth Element (Remastered) (Blu-ray)

Sony Pictures | 1997 | 126 mins | Rated PG-13 | Jul 17, 2007

Video
Video codec: MPEG-4 AVC
Video resolution: 1080p
Aspect ratio: 2.35:1

Audio
English: PCM 5.1 (48kHz, 16-bit)
English: Dolby TrueHD 5.1
French: Dolby Digital 5.1

Subtitles
English SDH, English, French, Spanish, Portuguese, Chinese, Thai

Disc
50GB Blu-ray Disc

想一齊討論下影碟? 請進入BLU-RAY / DVD 電影軟件討論區啦!!^.*
本碟評只反映筆者之個人意見, 絕非任何專業角度之評論, 多謝觀賞.


🏠 ★ Post76網店經已開幕 《store.post76.hk》

小瑟

關於小瑟

一名永遠的入門玩家, 對電影, 音樂, 影音等玩意永遠雀躍, 其後為了可以將這個毒海無涯信念推展開去, 故建立了這個毒人唔洗本的影音娛樂資訊平台, Post76玩樂網.

觀看所有 小瑟 的文章 - 網站

相關文章