始終都係Marantz......(SR7005)

245141525 · 發表於 2011-3-15 20:35

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

本帖最後由 245141525 於 2011-3-21 07:45 編輯

玩影音，講到尾都係想輕鬆吓、享受吓；輕輕鬆鬆睇套戲、舒舒服服聽首歌，確係一大樂事。

享受嘅定義人人唔同，每個品牌有唔同特性，自然可以滿足唔同人嘅需要，但就未必切合到我個人喜好。好似，有D埋身嘅震撼雖然好刺激，但長期處於興奮狀態，好難做到輕鬆，唔係咁鍾意；有D分析力太高，就要用自己嘅分析力，去分析佢分析出嚟嘅分析力（哈~明唔明我講乜？），都唔係咁鍾意；亦有D機DSP係一絕嘅設計，但自問無咁嘅技術同心機去調校，有等於無；更有D又好似太過平均，出新款又快，都唔係咁啱。

其實自己睇戲聽歌嘅比例大約係50：50，間中又會打吓機，用一半時間聽歌，比例都算好高了，分家當然係最理想嘅方法，但如果揀 AV AMP，自己感覺 Marantz 差唔多係不二之選，之前又一直用開Marantz，所以今次升級，始終都唔捨得轉會。

我今次揀嘅，係近期評價唔錯嘅SR7005，睇過好多師兄嘅報告，都係讚多過彈，何況自從舊年影音展一睹其真身之後，一直念念不忘，佢俊俏嘅外表唔在講，優美嘅內涵，加上屁股上嘅刺青(made in japan)，確係令人難以抗拒，咁啱宜家又做緊退紙盒嘅環保計劃，於是我決定點都要買佢返嚟，退返個紙盒，為環保盡一分力~ ha~ha~haaaaa~

好喇，講返部機，果然無令我失望，雖然唔係第一次喺屋企點燈(之前用過一個禮拜2065)，但係今次更加感動，一開聲真係想喊出嚟！我唔知同大家嘅感覺一唔一樣？點燈嘅感覺就好似身邊嘅喇叭一直都係睡火山，平平無奇；但忽然間，全部爆發，一發不可收拾，所有嘢好似打通奇經百脈，根本就係另一個世界，相信好快會忍唔住將屋企嘅碟重頭睇一次。

聽歌方面，的確係馬仔嘅強項，音樂感好好，聽演唱會尤其一流，太巨體嘅我唔識形容，總之就覺得空間感大咗、層次豐富咗......咁上下啦~
暫時用咗個幾禮拜，基本上無乜投訴，唯一最唔滿意嘅係，部機好快就將我套系統嘅弱點表露出嚟......我個電視機......；影像處理好咗，加上1080p嘅格式，對我部HD Ready嘅電視機，簡直係越級嘅挑戰，畫面反而比以前更差，唯有強行將輸出降做720p頂住先。

玩影音就係咁，升級完一樣，就自然見到另一樣缺點，自然又想升級，之後當然又會見到另一樣缺點，沒完沒了......
相信不久嘅將來，我又要升級了......