初入兩聲道選購的生路曆程

加里

小弟第一之出Post，前文比較長，因小弟想分享下最終入手的生路曆程，如果想直接睇開箱可以跳過

小弟剛剛加入兩聲道，之前係用AKG K702耳機 + 韓國Audinst HUD-DX1 的USB DAC耳廣聽音樂，而本人比喜歡聽古典，爵士，舒情同女聲多，喜歡音樂中的細緻度同層次感，偏向清淡監聽口味，但近一兩年開始想踏入兩聲道的喇叭世界。

當初係考慮主動式監聽喇叭，呢個時間得到位音響前輩同指點教導後放棄左主動式監聽喇叭，轉向綜合擴音機 + 被動喇叭，因財力所限當初的預算是喇叭連機係15k-20k內，之後係好多音響店同網上睇好多關於書架喇叭資料，最先鎖定係ELAC BS-312, 聽過佢D聲音好鍾意 ，無諗過書架喇叭有咁強勁音量輸出，而且細細隻好得意，特別係佢高音分析力，而佢上一級的Vela BS-403係低音方面更上一層樓，不過兩對喇叭價錢超晒班，所以轉向KEF LS50, 知佢係監聽級喇叭，但發現要發揮佢實力一D都唔易，如果要聽到音響舖試的味道，合併機要有返咁上下，而差唔多時間出左Wharfedale EVO 4系，EVO 4.2價錢同LS50差唔多但易推好多，試聽EVO後發覺可能受ELAC影響，對氣動高音單元D聲音特別有好感，所以就選擇佢。
之後係綜合壙音機到做左好多功課，由TEAC AX-505 > Audiolab M-DAC+ > Cambridge Audio CXA81，Cyrus One Cast等等，但左諗右諗都係差小小，可能因為對Elac諗諗不忘想買套可係方便以後有機會帶佢返屋企時用的合併機，就呢個時後個前輩提我，反正我有DAC前級，點解唔比多D錢買個好D後級，等將來升級都唔洗換咁多野換，咁又開始左後級尋找之路，但要應付到將來有機會入手的Elac呢隻有幾大W 食幾大W的性格，配得起佢的後級價錢都唔講得少，係呢個時候網上見人地話Nuprine STA-9推Elac BS-312好好力就再向呢個方向睇，不過唔試唔知，原來想BS-312出到我想要的聲起碼要到ST-10呢D無加味精的級數，但個價錢夠買兩部STA-9有多，又係錢⋯

見只差後級差唔多係時候去馬就同家中財務總監申請批文，話小弟會買喇叭，當然如實講買價錢同選擇EVO 4.2原因（就係錢），仲講左以後會再升級等後路比自己，點知得到個回覆係：『既然呢對唔係自己最想要點解又買呀，第時再換又嘥錢，如果係唔係都會再換就買最好啦，一次過麻，當然家用唔可以少個崩啦⋯！』聽到呢句說話我當堂感動到眼濕濕，唔通上天知我日做12個鍾搵錢辛苦所以憐憫我？(T^T)，收到上方寶劍當然二話不說就訂Elac Vela BS-403啦，馬死落地行，其他野之後先算。

不果因喇叭太貴，所以我不停搵有無其他門路可以平D入手，用左成個月時間最後都係決定係外國郵購返黎，價錢比香港代理平，當然相對風險高好多，不過慳左D錢可以當補貼買後級。

因銀彈不足下後級係到諗可能得NuPrime STA-9，最多到時發現唔夠力儲錢買多部行Mono，咁計都平過買一部ST-10，忽然發現網上有人提過NuPrime STA-9呢個價位得KECES S125有得同佢鬥⋯咁就好似發現新大陸咁去搵呢部傳說中的S125，點解係傳說？因為網上搵到佢D資料少之右少，多數係網媒或編輯介紹，用家開箱同分享文真係少到無朋友，YouTube介紹的片都唔多，不過有條片個外國人用S125同國內出品的Kinki Studio EX-M1比較，呢部EX-M1我都有留意佢，比好多人高度評價超強性價比的合併廣音機，不過都係果句⋯又係錢⋯

個外國人對部S125一樣讚不絕口，係價錢比STA-9貴少少而推力高咁多，我更想試下佢的聲底，所以約咗代理上去試機，順便試佢同門部S3 DAC(套裝強迫症發作)。帶左幾隻聽開的CD上去，一試之下，咁覺好似用緊自己個耳機聽歌咁，但高音伸延同分析力，低音下潛同層次感，樂器邊緣清脆聲，女聲活潑清爽，甜甜的感覺，完全係第二個層次享受，當然知道現場環境同代理器材有關，同代理老闆傾左一陣，佢話S3同S125係偏向清淡無味，你比咩佢食佢就比咩你聽，係好有監聽感的前後級，而且佢同STA-9的AB+D唔同，S125係一部A+AB純後級，係6ohm以下係已純A類放大，聽到我好心動。試聽左個幾鐘後已經覺得⋯係你啦⋯雖然超出預算(其實係買BS-403就超晒)，不過我都係咁乖乖比錢帶左S3同S125兩姐妹返屋企。(點解會多左部前級？財務總監話架麻，係唔係都會換就一之過買好D)，但今次就真係超支到凸晒肚，所以線材同其他補品只能買平野，真係要等儲夠錢先可以再換。

兩箱野差唔多20kg，帶住去坐巴士有D辛苦


以上就係小弟買機入手的生路曆程，以下就係不專業開箱。

一返到屋企喇叭已經送到


開箱前先幫佢地嚟張大合照先


喇叭開箱，上面張貼紙提示單元方向，要小心


包裝好嚴謹，膠袋入面仲有個布袋


登登登⋯正身出場


德國🇩🇪製造，信心保證


腳底有三粒防震膠


低音反射孔係後方向下，對我呢D地方細要貼近牆方係好消息


首先原裝Jumpers換成同喇叭線一套先


S125開箱


細細部但出奇的重





S3開箱


超鍾意佢個遙控器，成隻鋁金屬做，好有手感


雖然輕D，但一樣好重手




平價線，佢話Made In Taiwan唔知真定假，用他錶度過電阻都好低，用住先





經過幾個鐘執位走線終於set好個壇，唔完美，可接受，有代改善


以上就係小弟不專業開箱文，而家開始要進入慢長的煲機日子。

加里

aronchee0599 發表於 2020-11-5 09:06
恭喜你加入elac大家庭。我見你咁樣擺位都幾認同上邊師兄所講嘅發揮唔到呢個組合應該有嘅聲，就算有土地問題 ...

我都十分認同咁多位師兄所言，如果放客廳再落地用腳架會好D,但無奈屋企環境唔許可，只可以放電腦枱。
到而家只煲左60個鐘左右，聽音樂聲音有D焗，所以我都買左對小木腳架同腳釘，用咗之後聲音開陽同闊左，結像同分析力明顯高左好多，而家係諗緊點般走個前後級，到時聲應該會更好。

加里

小弟用的mon係27寸，有68cm闊，而家喇叭相隔70cm（2尺多少少）, 尋日買左個架會將前後級移過去，之後喇叭就可以向兩邊拉到相距5尺闊，希望有改善

加里

dplqb 發表於 2020-11-14 20:08
喇叭放枱上要加釘腳防震，減少反震焗聲。

謝謝提醒, 我已將對喇叭腳灌左7成鋼沙同加左腳釘, 不過結像仲係有d散, 可能同未煲夠有關, 唔知腳釘下加石板或玻璃會唔會有改善?
而家煲左120個鐘左右, 音牆明顯闊左, 冇咁烔. 每日返工就開住佢10幾個鐘煲到收工返去, 每晚聽歌都有明顯改善, 好開心.

加里

dplqb 發表於 2020-11-20 16:52
如果聲音結像是散散地，你可以試試換走啲鍍銀缐，用銅缐來聽聽是否有變化，一般鍍銀線會有調音作用不可用太 ...

而家換左對單晶銅聲音結實左，低音下潛力深左，係聽交響樂時候個氣勢強左好多

加里

Billyham 發表於 2020-11-25 09:55
師兄，

既然有喇叭腳灌左7成鋼沙，有冇試過喇叭唔用腳釘。

意思係喇叭腳D釘拆左佢，直接用Blue Tack將喇叭腳黐係枱面？

加里

Billyham 發表於 2020-11-25 13:31
對唔住，冇講清楚。

我意思係將上在喇叭底嘅錐形釘拆咗佢，用Blue Tack將喇叭底直接黐係腳架頂部平台。  ...

我喇叭底冇裝釘, 直接放左係腳架面, 就咁咩都無加放上去都好穩陣, 所以冇加BLUE TACK.

加里

dplqb 發表於 2020-11-27 13:20
恭喜恭喜，如果你用原装電源線，也可更換一下，力量之源是也。

小弟正打算去鴨記到買散線同插頭DIY兩條比DAC同AMP同, 而家努力扒緊文睇下買咩散線好, 仲有一個問題係唔知買英式定美式插頭好, 因為有計劃買個平衡隔離牛, 雖然知道可以選擇隻牛用英式定美式插座, 但市面好似美式選擇會多好多, 仲未諗通買英定美頭好

加里

Arong2020 發表於 2020-11-28 11:20
師兄新手想請教下單晶同響邊度入呢🙏🏿
SSP 高X 有冇呢🙏🏿
我都想低音結實啲人聲暖少少..有咩靚銅線介紹 ...

我用唔係咩名廠線，Nobility L-780LB OCC 6N, 係深水埗深之都3樓有賣，你可以參考一下。
因之前買左對 1.5m用，煲左100個鐘左右聲音都開左好多
因為喇叭同AMP轉位線唔夠長，見而家條線無咩大問題就買多一對同型號 3m 長換左去⋯家下多左對1.5m係到無用 早知當時比多少少買長D

加里

dplqb 發表於 2020-11-28 19:24
可試dac用華輝Belden紅缐和amp用聯x灰武缐30a, 英式要換人fuse，美式要買拖板(火缐不冋位），但電缐粗身 ...

謝謝師兄提點 ，等我聽日去深水埗睇下先